ءىس-شارا اياسىندا ايماقتىق ورتالىق مۋزەيدە بالۋاننىڭ سپورتتىق جولى مەن قوعامعا سىڭىرگەن ەڭبەگىن ايگىلەيتىن كورمە ۇيىمداستىرىلدى. مەكەمە باسشىسى ايشاگۇل ازاماتقىزىنىڭ ايتۋىنشا, بۇل رەتكى كورمە ەكسپوزيتسياسىنا بالۋاننىڭ ءار جىلداردا العان جۇلدەلەرى: مەدال, كۋبوك, سيمۆولدىق بەلگىلەر, الەم جانە وليمپيادا كىلەمدەرىندە بەلدەسكەن فوتوسۋرەتتەرى مەن ۇستىنە كيگەن سپورتتىق كوستيۋمدەرى جانە ءار جىلدارى العان ماراپاتتارى (وردەن, مەدال, العىسحات, ديپلوم, ت.ب.) بارلىعى 569 زاتتىق جادىگەر قويىلىپتى. ونىڭ سىرتىندا, بالۋاننىڭ وتكەن جىلدارداعى سپورتتىق شەجىرەسىن تانىتاتىن قابىرعا ستەندتەرگە جەتكەن جەتىستىگى, سىڭىرگەن ەڭبەگى جايلى كەڭىنەن جازىلىپ, بۇل دەرەكتەر كوپشىلىكتىڭ كوزايىمىنا ۇسىنىلىپتى.
وسىنداعى دەرەكتەرگە كوز جۇگىرتسەك, 1954 جىلى باي-ولكە ايماعىنىڭ ورتالىعى ولگەي قالاشىعىندا دۇنيەگە كەلگەن بالۋان, 1971-1972 جىلداردان باستاپ موڭعول ۇلتتىق كۇرەسىمەن اينالىسىپ, جاسوسپىرىمدەر اراسىنداعى مەملەكەتتىك چەمپيوناتتا جۇلدەلى ورىنعا يە بولعان. باقىت ودناي ۇلى ورتا مەكتەپتى بىتىرە سالىسىمەن ەل استاناسى ۇلانباتىرعا اتتانىپ, سوندا ەركىن كۇرەس ۇيىرمەسىنە قاتىسادى. ءبىر تاڭدانارلىق جاعداي, جاتتىعۋعا كىرىسكەنىنە جىل تولماي جاتىپ, قالالىق جانە ايماقتىق بىرىنشىلىكتەردە ۇزدىك ونەر كورسەتىپ, 1974-1975 جىلدارى موڭعوليا جاستارىنىڭ بىرىنشىلىگىندە 2 دۇركىن چەمپيون اتانادى. وسىلاي ەركىن كۇرەستەن تۇساۋى كەسىلگەن نار قازاق موڭعوليانىڭ ەرەسەكتەر اراسىنداعى چەمپيوناتتاردان 4 دۇركىن التىن, 10 دۇركىن كۇمىس, 4 دۇركىن قولا مەدالدى ەنشىلەپ, ايدى اسپانعا شىعارماسا دا, اعايىندى اۋزىنا قاراتىپتى. ونىڭ سىرتىندا حالىقارالىق ينتەرناتسيونال باسەكەسىنىڭ 2 دۇركىن جەڭىمپازى جانە 4 رەت جۇلدەگەرى اتانسا, «دينامو» سپورت قوعامى حالىقارالىق ءتۋرنيرىنىڭ 3 دۇركىن چەمپيونى بولىپ, 1986 جىلى «ىزگى نيەت» ويىندارىندا 4-ورىنعا قول جەتكىزگەن ەكەن.
«ەركىن كۇرەس تۇرىنەن مۇنداي بيىككە جەتكەن قازاق از, زامانىندا ايگىلى كۇش يەلەرى س.انديەۆ, كاسيموۆ (كسرو) ب.باۋگارتنەر (اقش), ا.ساندۋرسكي (پولشا), ا.شرەيدەر (گدر), ي.بوللا (ۆەنگريا) سياقتى مىقتىلارمەن بەلدەسىپ, ءارتۇرلى جارىستاردان 80-نەن استام مەدال العان العاشقى قازاق», دەيدى ايماقتىق سپورت باسقارماسىنىڭ باستىعى قاينار قايساناي ۇلى.
بۇل جەردە بالۋاننىڭ ايتا كەتەرلىك تاعى ءبىر جەتىستىگى – قازاق كۇرەسىنە قوسقان ۇلەسى. قازىرگى تاڭدا بالۋان ايماقتىق «قازاق كۇرەسى» فەدەراتسياسىن باسقارادى. 2006 جىلى باي-ولكە ايماعىندا قازاق كۇرەسىنەن ازيا چەمپيوناتىن وتكىزۋمەن قاتار, قازاق كۇرەسىنەن ءوتىپ جاتقان الەم جانە قۇرلىقتىق بىرىنشىلىكتەر مەن قازاقستان بارىسى, الەم بارىسى, ەۋرازيا بارىسى سياقتى جوبالاردىڭ جوعارى دەڭگەيدە وتۋىنە اتسالىسىپ ءجۇر. باقىت بالۋاننىڭ قازاق كۇرەسىنە باپتاعان شاكىرتتەرى الەم چەمپيوناتىنان 2 كۇمىس, 2 قولا جانە ازيا بىرىنشىلىگىنەن 6 التىن, 8 كۇمىس, 8 قولا مەدال ەنشىلەگەن ەكەن.
