قازاقستان سۋرەتشىلەر وداعىنىڭ مۇشەسى, كەسكىندەمەشى, قازاقستان بالالار كورمەسىنىڭ كۋراتورى بولات ءحامزيننىڭ ايتۋىنشا, «Art palette» قوعامدىق قورى بىرنەشە جىل بويى قازاقستان مادەني ديپلوماتياسى حالىقارالىق قاۋىمداستىعىمەن ىنتىماقتاستىقتا بالالاردىڭ سۋرەتتەرىن شەتەلدەردە ناسيحاتتاۋمەن اينالىسىپ كەلەدى. وتكەن جىلى اتالعان قور تاراپىنان بالالار شىعارماشىلىعى جوباسى ازىرلەنىپ, «بۇكىل الەمدە – بەيبىتشىلىك» ۇرانىمەن « ۇلى جىبەك جولى» اياسىندا كوشپەلى كورمە باستاۋ العان بولاتىن.
وسى جوبا بويىنشا وتكەن جىلى پاريجدەگى لۋۆر مۋزەيىندە وتكەن الەم بالالارىنىڭ سۋرەت كورمەسىندە قازاقستان جانە قىرعىزستان جەتكىنشەكتەرىنىڭ دە تۋىندىلارى قويىلدى. بۇل كورمە ونەرتانۋشىلار تاراپىنان جوعارى باعاسىن الىپ, الداعى ۋاقىتتا « ۇلى جىبەك جولى» اياسىندا ورتالىق ازيا ەلدەرى مەن تۇركيادا جالعاسىن تاباتىن بولادى.
«جوباعا قازاقستان بالالارىنىڭ بەلسەندى قاتىسۋى ەرەكشە نازار اۋدارۋدى قاجەت ەتەدى. سۋرەت ارقىلى بالالار قورشاعان ورتاعا كوزقاراسىن, ىشكى كوڭىل-كۇيىن بىلدىرە الادى. ولار سالعان سۋرەتتەردە ادەبيەت, مۋزىكا, فيلوسوفيا جيىنتىعى, ادامي قۇندىلىقتار كورىنىس بەرەدى. وسى ورايدا تالانتتى دا تالاپتى بالالارعا تۋعان ولكەسىن عانا ەمەس, الەمدى تانۋعا مۇمكىندىكتەر قاراستىرۋ ولاردىڭ شىعارماشىلىق تۇرعىدان دامۋىنا ىقپال ەتەدى», دەيدى ب.حامزين.
زارينا بايمەنوۆا, ارينا ەربولقىزى, دارىگۇل تاڭاتاروۆا, اياجان اقىلتاي, قۇرالاي ءامىرحان, الينا جەكسەمبەك, الىبەك قادىروۆ, اسقار بەيشەكەەۆ, اقبوتا تاۋسوۆا, داميرا ساعىناي, مانسۇر شاكىرجان, رايناز كۇشكىمباەۆا, ميراش تاستەمىروۆا, الماس ەرلەر, داميرا رايناز, ت.ب. كوپتەگەن بالانىڭ سۋرەتتەرى بۇگىندە «مىڭ بوياۋلى الەم», يۋنەسكو-نىڭ «مادەنيەتتتەر مەن داستۇرلەر توعىسىندا» حالىقارالىق كونفەرەنتسياسى اياسىنداعى بالالار سۋرەتتەرىنىڭ كورمەسىنە قويىلىپ, سەرتيفيكاتتارعا يە بولعان.
بۇگىندە قازاقستان بالالار سۋرەتتەرىنىڭ شىعارماشىلىق قورجىنى جاڭا تۋىندىلارمەن تولىعىپ, حالىقارالىق بەيبىتشىلىك ميسسياسىنداعى ءرولىن كۇشەيتۋگە ىقپال ەتىپ كەلەدى.
الماتى
