جاڭا جىل مەرەكەسىندە ءبۇتىن ءبىر قالادا ءىشىنارا نان تاپشىلىعى سەزىلە باستادى. ويتكەنى اتالعان كاسىپورىن قالا حالقىنىڭ نانعا دەگەن قاجەتتىلىگىنىڭ 10 پايىزىن وتەپ تۇرعان ەكەن. قازىر تۇتىنۋشىلاردىڭ الاڭداۋشىلىعى باسىم. ايدىڭ-كۇننىڭ امانىندا اس اتاسىنا جارىماۋ نە دەگەن سۇمدىق دەيدى ولار. زاۋىت نان عانا ەمەس, نان-توقاش ونىمدەرىن دە شىعاراتىن.
– بىرنەشە دۇكەنگە كىرىپ نان تابا المادىم, – دەيدى قالا تۇرعىنى ەركەن ءسابيتوۆ, – شىنىن ايتقاندا, نان زاۋىتىنىڭ ءونىمى جاقسى ەدى. ادال ءدام تۋرالى عايبات ايتۋعا بولماس, دەگەنمەن, كوپتەگەن ناۋبايحانانىڭ پىسىرەتىن نانى كوڭىلدەن شىعا بەرمەيدى. كەيبىرى ساعىزداي سوزىلىپ جاتقان ءدامسىز, ۇلبىرەپ, ۇگىلىپ جاتىر. جۇمىستان شىعا نان ساتاتىن دۇكەنگە جۇگىرەتىن بولدىق. كەشتەتىپ بارساڭ, نان بولماي قالادى. ال كۇندىز الۋعا جۇمىستان شىعا المايسىڭ. كوپ الساڭ ءب ۇلىنىپ كەتەدى, از الساڭ كەلەسى كۇنگە جەتپەي قالادى.
ماسەلەنىڭ ءمان-جايىن بىلمەك بولىپ اقمولا وبلىستىق كاسىپكەرلىك جانە تۋريزم باسقارماسى باسشىسىنىڭ ورىنباسارى الەكساندر زاگرەبينمەن سويلەستىك. باسقارما باسشىسىنىڭ ورىنباسارى بولعان جايدان حاباردار ەكەن. بىراق كاسىپورىننىڭ جابىلۋى تۋرالى انىق بىلمەيدى. ماسەلە نەگە قاتىستى, ۇن قىمباتتادى ما, جوق الدە الدەبىر تەتىگى ىستەن شىقتى ما, ول جاعى بەيمالىم. زاۋىت ديرەكتورى انۋاربەك وماروۆ شەتەلدە ءجۇر ەكەن. ايتاتىن ءۋاجى – ەندىگى ارادا نان ءپىسىرىپ ساتۋ مۇلدە ءتيىمسىز.
تاعى ءبىر وكىنىشتىسى, وسى زاۋىتتىڭ جابىلۋىنا بايلانىستى ونداعان جۇمىسشى قىستىڭ كوزى قىراۋدا جۇمىسسىز قالدى. ولاردىڭ دەنى زەينەت جاسىنا تاياپ قالعان ماماندار. ەگدە ادامدار تۇگىلى تەپسە تەمىر ۇزەتىن جاستاردىڭ ءوزى ەكى قولعا ءبىر كۇرەك تابا الماي وتىرعاندا, ەندىگى ارادا جۇمىس تابىلا ما, جوق پا, بۇل جاعى دا بەلگىسىز.
– كاسىپورىن قۇرىلتايشىلاردىڭ شەشىمىمەن بيىلعى 1 قاڭتاردان باستاپ جابىلدى. جۇمىسسىز قالعان مامانداردىڭ سانى – 59. ولار قىسقارتىلاتىنى تۋرالى ەسكەرتۋدى 1 جەلتوقساننان باستاپ العان. زاڭعا سايكەس جۇمىسشىلارعا بارلىق تولەمدەر تولەندى. وكىنىشكە قاراي, زاۋىتتىڭ قۇرىلتايشىلارىن بىلمەيمىز. تەك ديرەكتورىن عانا بىلەمىز, – دەيدى وبلىستىق كاسىپكەرلىك جانە تۋريزم باسقارماسىنىڭ باسشىسى ەربول وسپانوۆ.
باسقارما باسشىسىنىڭ ايتۋىنا قاراعاندا, جەكەمەنشىك زاۋىت قوجايىندارىنا مەملەكەت تاراپىنان كورسەتىلەتىن قولداۋ ۇسىنىلعان ەكەن. ءتىپتى تيىمدىلىگىن جاقسارتۋ ماقساتىندا «كوكشە» الەۋمەتتىك-كاسىپكەرلىك كورپوراتسياسى ارقىلى جەڭىلدىك شارتىمەن نەسيە دە ۇسىنىلعان. الداعى ۋاقىتتا بۇل ۇسىنىستار زاۋىت قوجايىندارى تاراپىنان قابىلدانا ما, جوق پا, بەلگىسىز. قالاي بولعان كۇندە دە كوكشەتاۋلىقتاردىڭ ساپالى ناننان سىباعاسى كەمىگەندىگى انىق.
كوكشەتاۋ
