پرەمەر-مينيستر ءاليحان سمايىلوۆتىڭ توراعالىعىمەن وتكەن القا ماجىلىسىنە قاتىسۋشىلار ىشكى جانە سىرتقى ساۋدانى دامىتۋ, ونەركاسىپ كووپەراتسياسى جانە لوگيستيكا, ۇلتتىق تاۋار وتكىزۋ جۇيەسىن قۇرۋ, تسيفرلاندىرۋ جانە شيكىزاتتىق ەمەس ەكسپورتتى دامىتۋ ماسەلەلەرىن قارادى.
پرەمەر-مينيستر ءوز سوزىندە بيىل سىرتقى ساۋدا اينالىمى مەن ىشكى ساۋدانىڭ وڭ ديناميكاسىن ساقتاي وتىرىپ, مەملەكەت باسشىسىنىڭ سايلاۋالدى باعدارلاماسىندا, قازاقستان حالقىنا جولداۋلارىندا جانە ۇكىمەتتىڭ كەڭەيتىلگەن وتىرىستارىندا بەلگىلەگەن مىندەتتەرىن ىسكە اسىرۋعا بارلىق كۇش-جىگەردى جۇمساۋ قاجەتتىگىن اتاپ ءوتتى.
ءاليحان سمايىلوۆ الەۋمەتتىك ماڭىزى بار ازىق-ت ۇلىك تاۋارلارى باعاسىنىڭ تۇراقتىلىعىن قامتاماسىز ەتۋ جونىندەگى جۇمىسقا ەرەكشە نازار اۋداردى.
«حالىق ءۇشىن بۇل جۇمىستاردىڭ ماڭىزى وتە زور جانە ول مەملەكەت باسشىسىنىڭ ەرەكشە باقىلاۋىندا. باعا بەلگىلەۋگە كوپتەگەن فاكتورلار اسەر ەتەدى, سوندىقتان دەلدالدىق ارەكەتتەردى انىقتاپ, رۇقسات ەتىلگەن ساۋدا ۇستەمەسىنىڭ ساقتالۋىنا مونيتورينگ جۇرگىزۋ جانە باعانىڭ نەگىزسىز كوتەرىلۋ فاكتىلەرىنە قارسى شارالاردى كۇشەيتۋ قاجەت», دەدى ۇكىمەت باسشىسى.
سونىمەن قاتار پرەمەر-مينيستر ساۋدا الاڭدارىن ودان ءارى جاڭعىرتۋدىڭ, زاماناۋي فورماتتاردى ەنگىزۋدىڭ جانە جاڭا فۋنكتسيونالدى كوكونىس قويمالارىن سالۋدىڭ ماڭىزدى ەكەنىن اتاپ ءوتتى.
«وسى سالاداعى ستاندارتتاردى ارتتىرۋعا ۇمتىلۋىمىز كەرەك, ويتكەنى بۇل باعانى ۇستاپ تۇرۋعا جانە ادال كاسىپكەرلەردىڭ تابىسىن ارتتىرۋعا ىقپال ەتەدى. بۇل باعىتتا جۇمىس ىستەيمىز», دەدى ءاليحان سمايىلوۆ.
قورىتىندىلاي كەلە, ۇكىمەت باسشىسى ۇلتتىق تاۋار وتكىزۋ جۇيەسىن قۇرۋ ەلدەگى تاۋارلاردىڭ باعاسى مەن بالانسىن تالداۋدىڭ تيىمدىلىگىن ارتتىرۋعا مۇمكىندىك بەرەتىنىن اتاپ ءوتتى. بۇل ساۋدا پروتسەستەرىن جەدەل رەتتەۋ ءۇشىن وتە قاجەت. ءا. سمايىلوۆتىڭ ايتۋىنشا, بارلىق ساۋدا سۋبەكتىسى قىزمەتىنىڭ پروتسەستەرىن اۆتوماتتاندىرۋ جانە ۇلتتىق تاۋار وتكىزۋ جۇيەسىن مەملەكەتتىك ورگاندار مەن ساۋدا قىزمەتىنە قاتىسۋشىلاردىڭ اقپاراتتىق جۇيەلەرىمەن تولىققاندى ينتەگراتسيالاۋدى جۇرگىزۋ ماڭىزدى.
