ناۋقان ايازدى كۇندەرى تۇرعىنداردى قالا بويىنشا تەگىن تاسىمالدايتىن 20 جۇرگىزۋشىنىڭ جۇمىسىنان باستالدى. جۇرگىزۋشى رەتىندە مەشىتتەردىڭ يمامدارى مەن شاكىرتتەرى قاتىستى.
«مۇنداي اكتسيالاردى بىرنەشە جىلدان بەرى وتكىزىپ كەلەمىز. استانانىڭ ايازدى كۇندەرىندە ازاماتتارىمىزعا قول ۇشىن سوزعىمىز كەلەدى. باسقا جۇرگىزۋشىلەردى دە اكتسياعا قوسىلۋعا جانە تۇرعىندارعا كومەكتەسۋگە شاقىرامىز», دەدى «ازىرەت سۇلتان» مەشىتىنىڭ باس يمامى ەربولات ءجۇسىپوۆ.
ەرىكتىلەر جول جۇمىسشىلارىنا ىستىق شاي مەن پالاۋ تاراتتى. كوممۋنالدىق ۇيىمداردىڭ 200-گە جۋىق قىزمەتكەرى قامتىلدى. جۇمىسشىلاردىڭ بارلىعى قالا بويىشا قار كۇرەپ جۇرگەن ادامدار.
سونىمەن قاتار جىلىتۋ ماۋسىمىنىڭ سوڭىنا دەيىن دەمەۋشىلىك كومەك ارقىلى مەشىت بىرقاتار وتباسىعا كومىر ساتىپ الۋعا جانە ازىق-ت ۇلىك سەبەتتەرىمەن قامتاماسىز ەتۋگە كومەكتەسەدى. تۇرعىنداردى تەگىن تاسىمالداۋ ناۋقانى ايازدى كۇندەردىڭ سوڭىنا دەيىن جالعاسادى. تەگىن تاكسيلەردى اۆتوموبيل كورپۋسىنداعى جاپسىرما ارقىلى اجىراتۋعا بولادى.
ەستەرىڭىزگە سالا كەتەيىك, بۇل كۇندەرى استانادا سارشۇناق اياز ورناپ تۇر, تەرمومەتر باعانى -30 گرادۋستان تومەن كورسەتىپ تۇر. قالانىڭ كوممۋنالدى قىزمەتتەرى كۇندىز-ءتۇنى توقتاۋسىز جۇمىس ىستەپ جاتىر. ەلوردا تۇرعىندارى مەن قوناقتارى مۇنداي جاعدايدا اباي بولۋى, كوكتايعاق كەزىندە قوزعالىس ەرەجەلەرىن قاتاڭ ساقتاۋى جانە جاراقات پەن ۇسىكتىڭ الدىن الۋ ءۇشىن كوشەدە ۇزاق ۋاقىت بولماۋى قاجەت.
