ءىس ماتەريالدارىنا سايكەس, جاسوسپىرىمدەر دوسى ءۇشىن كەك الۋ ماقساتىندا ەر ادامدى سوققىعا جىققان.
«2020 جىلدىڭ 30 مامىرىندا سوتتالۋشىلاردىڭ ارقايسىسى كامەلەتكە تولماعان د-نى قورعاۋ ءۇشىن كەشىرىم سۇراۋدى تالاپ ەتۋ كەزىندە گ-نى كەزەكپەن ۇرعان. جابىرلەنۋشى كەشىرىم سۇراپ, ۇرىپ-سوعۋدى توقتاتۋدى سۇراعان, بىراق جاسوسپىرىمدەر ونى ۇرۋدى توقتاتپاعان. وقيعا سالدارىنان گ. ەسىمدى ەر ادام العان جاراقاتتارىنان قايتىس بولدى», دەپ حابارلايدى قاراعاندى وبلىسىنىڭ كامەلەتكە تولماعانداردىڭ ىستەرى جونىندەگى مامانداندىرىلعان سوتىنىڭ ءباسپاسوز قىزمەتى.
جابىرلەنۋشى تاراپ جاۋاپكەرلەردى كىنالى دەپ تانىپ, 10 000 000 تەڭگە مورالدىق زياندى وتەۋ تۋرالى ازاماتتىق تالاپ ارىزىن قاناعاتتاندىرۋدى سۇرادى.
«سوتتالۋشىلار قر قىلمىستىق كودەكسىنىڭ 106-بابى بويىنشا قىلمىستىق-اتقارۋ جۇيەسىنىڭ ورتاشا قاۋىپسىزدىك مەكەمەسىندە جازاسىن وتەۋ ءۇشىن 6 جىل 8 ايعا باس بوستاندىعىنان ايىرىلدى. سونداي-اق سوتتالعانداردان جابىرلەنۋشى تاراپتىڭ پايداسىنا 10 000 000 تەڭگە كولەمىندە مورالدىق شىعىن ءوندىرىلدى», دەپ اتاپ ءوتتى دەپارتامەنتتە.
ۇكىم زاڭدى كۇشىنە ەنگەن جوق.
