سەنات توراعاسى بيىل پارلامەنت جاڭا جاعدايدا جانە جاڭا تالاپتار مەن مىندەتتەردى ەسكەرە وتىرىپ جۇمىس ىستەيتىنىنە توقتالدى. سونداي-اق سەنات وڭىرلەردىڭ مۇددەسىن بىلدىرەتىن ينستيتۋت بولۋعا ءتيىس ەكەنىن اتاپ ءوتتى. سوعان بايلانىستى پالاتا سپيكەرى دەپۋتاتتارعا سەنات ءىس-شارالارى بارىسىندا ازاماتتاردى تولعاندىراتىن ماسەلەلەردى بەلسەندى كوتەرۋدى تاپسىردى.
الداعى وتىرىستا مەملەكەت باسشىسى قاسىم-جومارت توقاەۆ ۇسىنعان كانديداتتاردى جوعارعى سوت سۋديالارى قىزمەتىنەن بوساتۋ ماسەلەسى زەردەلەنەدى. سونداي-اق «قازاقستان رەسپۋبليكاسىنىڭ تۇڭعىش پرەزيدەنتى – ەلباسى تۋرالى» قازاقستان رەسپۋبليكاسى كونستيتۋتسيالىق زاڭىنىڭ كۇشى جويىلدى دەپ تانۋ تۋرالى» كونستيتۋتسيالىق زاڭنىڭ جوباسى بويىنشا پارلامەنت پالاتالارىنىڭ بىرلەسكەن كوميسسياسىنىڭ مۇشەلەرىن جانە سەناتتان قوسىمشا بايانداماشى سايلاۋدى جوسپارلاپ وتىر.
سونىمەن قاتار دەپۋتاتتار «قازاقستان رەسپۋبليكاسىنىڭ ۇكىمەتى مەن شۆەيتساريا كونفەدەراتسياسىنىڭ فەدەرالدىق كەڭەسى اراسىنداعى باعالى مەتالداردان جاسالعان بۇيىمدارداعى سىنامالىق تاڭبانى ءوزارا تانۋ جونىندەگى كەلىسىمدى راتيفيكاتسيالاۋ تۋرالى» زاڭدى قارايدى. ونىڭ ەرەجەلەرى ەلدەر اراسىنداعى ىنتىماقتاستىقتى وڭايلاتۋ ءۇشىن باعالى مەتالداردان جاسالعان بۇيىمدارداعى سىنامالىق تاڭبانى ءوزارا تانۋدى كوزدەيدى. بۇل رەتتە بۇيىمدار وسى كەلىسىمنىڭ تالاپتارى مەن يمپورتتاۋشى تاراپتاعى مەملەكەتتىڭ ۇلتتىق زاڭناماسىنا سايكەس كەلۋگە ءتيىس.
كۇن تارتىبىندەگى تاعى ءبىر ماسەلە - «قازاقستان رەسپۋبليكاسىنىڭ ۇكىمەتى مەن قىتاي حالىق رەسپۋبليكاسىنىڭ ۇكىمەتى اراسىنداعى ازاماتتىق اۋە كەمەلەرىن اۆياتسيالىق ىزدەستىرۋ جانە قۇتقارۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ. قۇجات اپاتقا ۇشىراعان ۇشاقتاردىڭ جولاۋشىلارى مەن ەكيپاجدارىن ىزدەۋ مەن قۇتقارۋدا مەملەكەتتەر اراسىنداعى ىنتىماقتاستىقتى ودان ءارى كۇشەيتۋگە باعىتتالعان.
سونداي-اق بيۋرو مۇشەلەرى ماجىلىستەن كەلىپ تۇسكەن زاڭداردى سەناتتىڭ تۇراقتى كوميتەتتەرىنە ءبولىپ بەردى.
ماۋلەن اشىمباەۆ وتىرىستا بيۋرو مۇشەلەرىنە سەنات اپپاراتىنىڭ جاڭا باسشىسىن تانىستىردى. بۇل قىزمەتكە سپوتكاي ماكسيم الەكساندروۆيچ تاعايىندالدى.
ال بۇعان دەيىن اپپارات باسشىسى بولىپ كەلگەن ءاليا راقىشەۆا ءوز ءوتىنىشى بويىنشا قىزمەتىنەن بوساتىلدى. سەنات توراعاسى بۇكىل دەپۋتاتتىق كورپۋستىڭ جانە ءوز اتىنان ءاليا راقىشەۆاعا پارلامەنتتىڭ زاڭنامالىق جۇمىسىن جەتىلدىرۋگە قوسقان زور ۇلەسى ءۇشىن العىس ايتىپ, سەناتتىڭ قۇرمەت گراموتاسىن تابىس ەتتى.
