«بەتكەيلەردەن قار ماسسالارىن ءتۇسىرۋ جۇمىستارى جۇرگىزىلىپ جاتىر. الدىن الۋ ءىس-شارالارىن جۇرگىزە وتىرىپ, ءبىز جاعدايدى تۇراقتاندىرامىز جانە سول ارقىلى تۇرعىندار مەن اۆتوجولدار ۋچاسكەلەرى ارقىلى وتەتىن كولىكتەردىڭ قاۋىپسىزدىگىن قامتاماسىز ەتەمىز. بارلىعى 40500 تەكشە مەتر قار ءتۇستى, ال قىس مەزگىلى باستالعالى بەرى بارلىعى 80000 تەكشە مەتر قار ءتۇسىرىلدى», دەدى «قازسەلدەنقورعاۋ» شق فيليالىنىڭ باسشىسى ومار دۇزگىمباەۆ.
ونىڭ ايتۋىنشا, «قازسەلدەنقورعاۋ» فيليالىنىڭ باقىلاۋشىلارى جۇرگىزەتىن تۇراقتى مونيتورينگ قاۋىپتى ۋچاسكەلەردى انىقتاۋعا مۇمكىندىك بەرەدى. مونيتورينگ قار جامىلعىسىنىڭ بيىكتىگىن ولشەۋدى, اۋا مەن قاردىڭ تەمپەراتۋراسى مەن ىلعالدىلىعىن تىركەۋدى, قار جامىلعىسىنىڭ تىعىزدىعىن انىقتاۋدى قامتيدى.
وبلىس بويىنشا بارلىعى 325 وشاق 71 وبەكتىگە قاۋىپ توندىرەدى, ونىڭ ىشىندە 44 تۇرعىن ءۇي, 93 كم اۆتوموبيل جولدارى بار (15 كم - رەسپۋبليكالىق ماڭىزى بار جولدار, 78 كم - وبلىستىق ماڭىزى بار جولدار). ەڭ قاۋىپتى باعىتتار - وسكەمەن - سامار 95-102,132-137 كم, وسكەمەن - تاۋلى ءۇلبى 30-37 كم, وسكەمەن-سولتۇستىك-سەرەبريانسك 58-65 كم كوشكىن قاۋپى بار ايماقتا 5 دەمالىس بازاسى بار. ولاردىڭ ەكەۋى - ريددەر قالاسىندا, ۇشەۋى - تاۋلى ۇلبىدە ورنالاسقان.
«وبلىستا كوشكىن قاۋپى بار. بۇل ۋاقىتتا تاۋلى جەرلەرگە شىقپاۋعا كەڭەس بەرىلەدى. قاتتى ايقاي مەن شۋ قار كوشكىنىن تۋدىرۋى مۇمكىن. كولىكتە قار كوشكىنى قاۋپى بار ۋچاسكەنىڭ جانىنان ءوتىپ بارا جاتقاندا توقتاماي, ءوتىپ كەتۋ قاجەت. توتەنشە جاعداي كەزىندە 112 ءنومىرى بويىنشا حابارلاسۋ كەرەك», دەپ ءتۇسىندىردى شقو تجد باستىعىنىڭ ورىنباسارى ارمان توقانوۆ.
قار كوشكىنى كەزىندە كەلەسىدەي ارەكەت ەتۋ قاجەت:
- جارتاستىڭ, اعاشتىڭ ارتىنا تىعىلۋعا تىرىسىڭىز, جەرگە جاتىڭىز, باسىڭىزدى قولىڭىزبەن قورعاڭىز;
- كوشكىنگە تاپ بولعان جاعدايدا قاردىڭ بەتىندە قالۋ ءۇشىن ءجۇزۋ قيمىلدارىن جاساڭىز;
- قارعا باتىپ كەتسەڭىز تىزەڭىزدى اسقازانعا قاراي تارتىڭىز, قار كوشكىنى توقتاعانشا كۇتىڭىز, ۇستىڭگى جانە استىڭعى جاعىڭىزدى انىقتاپ, قاردان شىعۋعا تىرىسىڭىز.
