بۇرىنعى اكىم ابات كوبەنوۆ پەن ونىڭ ادۆوكاتى اپەللياتسيالىق شاعىمدا باس بوستاندىعىنان ايىرۋ جازاسىن ايىپپۇلعا اۋىستىرۋ تۋرالى ءوتىنىش بىلدىرگەن. ادۆوكات سوتتالۋشى ءوز كىناسىن تولىق مويىنداعانىن جانە وكىنگەنىن, زالالدى وتەگەنىن, سونداي-اق ونىڭ اسىراۋىندا قارت اناسى, ءۇش بالاسى بار ەكەنىن, ولاردىڭ بىرەۋى سوزىلمالى پسيحيكالىق اۋرۋمەن اۋىراتىنىن اتاپ ءوتتى.
اپەللياتسيالىق سوتتا سوتقا دەيىنگى تەرگەۋ مەن ءبىرىنشى ساتىداعى سوت بۇزۋشىلىقسىز وتكەنى انىقتالدى. كوبەنوۆ سوتتالعان باپتىڭ سانكتسياسى باس بوستاندىعىنان ايىرۋدان باسقا, ۇرلانعان م ۇلىك سوماسىنان جيىرما ەسەگە دەيىن ايىپپۇل تۇرىندە جازا قاراستىرادى. قورعاۋدىڭ دالەلدەرىن تىڭداپ, جەڭىلدەتەتىن جاعدايلاردى ەسكەرە وتىرىپ, سوت القاسى سوتتالۋشىنىڭ اپەللياتسيالىق شاعىمىن قاناعاتتاندىرۋ جانە باس بوستاندىعىنان ايىرۋ جازاسىن ايىپپۇلعا وزگەرتۋ تۋرالى شەشىم قابىلدادى.
وسىلايشا اقتوبە قالاسىنىڭ №2 سوتى قر قك 190-بابى 3-بولىگىنىڭ 2-تارماعى بويىنشا سوتتالعان ابات كوبەنوۆكە قاتىستى ۇكىمدى وزگەرتىپ, 13 839 150 تەڭگە مولشەرىندە ايىپپۇل سالدى. سونداي-اق ول مەملەكەتتىك قىزمەتتە, جەرگىلىكتى ءوزىن-ءوزى باسقارۋ ورگاندارىندا, ۇلتتىق بانكتە, كۆازيمەملەكەتتىك سەكتور سۋبەكتىلەرىندە قىزمەت اتقارۋ قۇقىعىنان ءومىر بويىنا ايىرىلدى.
ەسكە سالا كەتسەك, 2022 جىلدىڭ 26 قازانىندا اقتوبە قالاسى الماتى اۋدانىنىڭ بۇرىنعى اكىمى ابات كوبەنوۆ الاياقتىق جاساعانى ءۇشىن ءۇش جىلعا باس بوستاندىعىنان ايىرىلدى. ول اقتوبە اكىمدىگى اپپاراتىنىڭ باسشىسى لاۋازىمىندا بولا تۇرا, 2020 جىلى تانىسىنا جەر ۋچاسكەسىن بەرۋ سىلتاۋىمەن ودان 1 383 000 تەڭگە كولەمىندە پارا الماقشى بولعان.
