«قازىرگى تاڭدا سوت س.كۇدەباەۆتىڭ ءىسىن قاراپ جاتىر. پروتسەسس تالدىقورعان قالالىق سوتىندا ءوتىپ جاتىر», دەدى جەتىسۋ وبلىستىق سوتىنىڭ ءباسپاسوز قىزمەتىنىڭ جەتەكشىسى نۇرسۇلتان ورىنباساروۆ.
ونىڭ ايتۋىنشا, باستاپقىدا سوت جابىق ەسىك جاعدايىندا ءوتۋى ءتيىس بولعان, كەيىن «اشىلدى».
ەسكە سالايىق, سەرىك كۇدەباەۆ الماتى پوليتسيا دەپارتامەنتىن 7 جىل باسقارعان. 2020 جىلى الماتى وبلىسى پوليتسياسىنىڭ باسشىسى بولىپ تاعايىندالدى. قاڭتارداعى تارتىپسىزدىكتەردەن كەيىن ول قىزمەتىنەن بوساتىلدى.
بۇگىن ماجىلىستە قاڭتار وقيعاسى تۋرالى جاڭا دەرەكتى فيلم كورسەتىلدى. كادرلاردا سول كەزدە الماتى وبلىسىنىڭ پوليتسيا باسشىسى قىزمەتىن اتقارعان سەرىك كۇدەباەۆتىڭ ءوزى كۇزەتۋى ءتيىس دەپارتامەنت عيماراتىنان قارۋلى كۇزەتشىلەرمەن قالاي شىعىپ كەتكەنى كورسەتىلگەن.
«قاڭتار وقيعاسى كەزىندە بىرقاتار وبلىستاردا ۇقك جەرگىلىكتى بولىمشەلەرى مەن ىشكى ىستەر دەپارتامەنتتەرىنىڭ باسشىلارى قاراماعىنداعىلارعا جۇمىس ورىندارىنان كەتۋگە بۇيرىق بەردى. مىسالى, مىنا كادرلاردان الماتى قالاسى ءىىد بۇرىنعى باستىعىنىڭ قالاي ارەكەت ەتكەنىن كورۋگە بولادى. سول كەزدە كومەندانت بولعان سەرىك كۇدەباەۆ پوليتسيا عيماراتىنان شىعىپ كەتەدى», دەلىنگەن ۆيدەونىڭ سيپاتتاماسىندا.
مامىر ايىندا باس پروكۋراتۋرا الماتى وبلىسى پوليتسيا دەپارتامەنتىنىڭ بۇرىنعى باسشىسى سەرىك كۇدەباەۆتىڭ قاڭتار وقيعاسىنا قاتىسى بارىن حابارلادى. سوتقا دەيىنگى تەرگەپ-تەكسەرۋ قىلمىستىق كودەكستىڭ 370-بابىنىڭ 4-بولىگىنىڭ 1-تارماعى «اۋىر زارداپتارعا اكەپ سوققان قىزمەتتەگى ارەكەتسىزدىك» بويىنشا جۇرگىزىلدى.
