باياندى باستاما – ۇلگىلى ءۇردىس

ومىرگە ىڭكار سەزىممەن قاراۋ, باستاماشىلدىققا ۇمتىلۋ قاشاندا جاستارعا ءتان, جاستىققا جاراسىمدى. جاسىنداي جارقىلدايتىن جاستىق جىگەردىڭ المايتىن قامالى جوق. سوندىقتان عوي پرەزيدەنت نۇرسۇلتان نازارباەۆتىڭ جاستاردى قولداپ, ولاردى ەل بولاشاعىنىڭ ەرتەڭگى تىزگىن قاعارلارى رەتىندە باعالاپ كەلە جاتقانى. ەلباسى ءوزىنىڭ “جاڭا ونجىلدىق – جاڭا ەكونوميكالىق ورلەۋ – قازاقستاننىڭ جاڭا مۇمكىندىكتەرى” اتتى بيىلعى قازاقستان حالقىنا جولداۋىندا: “ۇشىنشىدەن, ەكونوميكالىق ورلەۋ – ارقايسىمىزعا قاتىستى بۇكىلحالىقتىق ءىس. بۇل – قوعامنىڭ الەۋمەتتىك ماسەلەلەرىن شەشۋ جانە بارشامىزدى تابىسقا باستاۋدىڭ كىلتى” دەگەن بولاتىن. ال مۇنداي بۇكىلحالىقتىق ىستەن جاستاردىڭ تىس قالۋى مۇمكىن بە, مۇمكىن ەمەس. بۇل – ۇرپاقتان ۇرپاققا جالعاسىپ كەلە جاتقان ومىرشەڭ ءۇردىس. اقتوبەلىك جاستاردىڭ “اۋىلدىڭ گۇلدەنۋى – قازاقستاننىڭ گۇلدەنۋى” اكتسياسىنا باستاماشىل بولۋى دا وسىنداي وركەندى ونەگەنىڭ جەمىسى. جىل باسىندا “نۇر وتان” حدپ اق­توبە فيليالى “جاس وتان” جاس­تار قاناتىنىڭ بەلسەندى مۇشەلەرى شالعايداعى ەلدى مەكەندەردى ابات­تان­دىرۋعا, الەۋمەتتىك مەكەمەلەردى سالۋ مەن ولاردى جوندەۋگە اتسا­لى­سۋعا باستاما كوتەرگەن بولاتىن. باياندى باستامانى وبلىس جاستارى ءىلىپ اكەتتى, ول مەملەكەت باسشىسى نۇرسۇلتان نازارباەۆ تاراپىنان دا قىزۋ قولداۋ تاپتى. وڭ باستاما كوپ ۇزاماي-اق رەسپۋبليكا جاستارىنىڭ كەڭ اۋقىمدى اكتسيا-ەستافەتاسىنا اينالدى. تەك وبلىستىڭ وزىندە عانا ستۋدەنتتەر مەن قۇرىلىس جاساعى جالاۋىنىڭ استىندا 70 مىڭنان استام جاس بىرىكتى. وبلىس اكىمدىگى الدىنداعى الاڭ­دا وتكەن “اۋىلدىڭ گۇلدەنۋى – قا­زاق­ستاننىڭ گۇلدەنۋى” جاستار ما­را­فون-ەستافەتاسىنىڭ سالتاناتتى مي­تينگىسىنە 20 مىڭنان استام جاس جينالدى. وسىمەن ءبىر مەزەتتە اۋدان ورتالىقتارى مەن اۋىلدىق وكرۋگتەردە 30 مىڭ اۋىل جاسى باس قوسقان ميتينگتەر ۇيىمداس­تى­رىل­دى. اقتوبە وبلىسىندا جۇمىس ساپا­رىمەن جۇرگەن “نۇر وتان” حدپ توراعاسىنىڭ ءبىرىنشى ورىنباسارى نۇرلان نىعماتۋلين تۋعان ولكەنى گۇلدەندىرۋگە جۇمىلعان وبلىس جاس­تارىنىڭ فورۋمىندا ءسوز سويلەپ, قاتىسۋشىلارعا ىزگى تىلەگىن ءبىلدىردى, ەل يگىلىگىنە باعىتتالعان باستاماعا قاتىسۋشىلارعا ءسات ساپار تىلەدى. – تاۋەلسىزدىكتىڭ 20 جىلدىعى­مەن ورايلاستىرىلعان قالالاردى جانە اۋىل-ايماقتى كورىكتەندىرۋ-كوركەيتۋ اكتسياسى اقتوبەلىكتەردىڭ باستاماسى­مەن بۇكىل ەل اۋماعىندا وتكىزىلۋدە. بۇل باستاما مەملەكەت باس­شىسى, “نۇر وتان” حدپ ءتور­اعا­سى نۇرسۇلتان نازارباەۆ تارا­پى­نان دا قولداۋعا يە بولدى. اۋقىم­دى جوبا تەك ايماقتاردىڭ تازالىعىن رەتكە كەلتىرىپ قانا قوي­مايدى, جاس ۇر­پاقتى وتانسۇيگىش­تىك­كە تاربيەلەۋى­مەن دە ماڭىزدى, – دەدى ول. جاستار قوزعالىسىن ۇيىمداس­تى­رۋ­شىلارعا العىسىن جەتكىزگەن وب­لىس اكىمى ەلەۋسىن ساعىندىقوۆ كەز كەلگەن مەملەكەتتە جاستار قوعام­نىڭ قوزعاۋشى كۇشى ەكەنىنە باسا نازار اۋداردى. وبلىس باسشىسىنىڭ مالىمدەۋىنشە, ستۋدەنتتەر مەن جاستاردىڭ قۇرىلىس جانە “جاسىل ەل” جاساقتارى, مەكتەپ وقۋشى­لارى­نىڭ وتريادتارى, قالا جانە اۋدان جاس­تارى 385 ەلدى مەكەندەگى سايا­باقتار مەن سكۆەرلەردى كوركەيتىپ, گۇل ەگەدى, كوگالداندىرادى. اۋماعى 2200 گەكتار وزەن-كول جاعاسىن تا­زارتۋ جانە كوگالداندىرۋ مەن ساني­تارلىق تازالاۋ جۇرگىزىلەدى. ۇزىن­دىعى 980 شاقىرىم ورمان القاپ­تارىن قوقىس پەن قۋراعان ءشوپ­تەر­دەن تازارتىپ, جول بويى كوگالدان­دىرىلادى. قۇرىلىس جاساقتارى جانە جاستاردىڭ قاتىسۋىمەن 200-دەن استام الەۋمەتتىك نىساندار بوي كوتەرىپ, جوندەۋ جۇرگىزىلەدى. اۋىل­دار­دا 216 جاڭا سپورت كەشەندەرى مەن وزگە دە نىساندار پايدا بولادى. – بۇل باستاماعا ءوز ەڭبەگىمەن ۇلەس قوسۋعا تىلەك بىلدىرۋشىلەر كو­بەيە تۇسۋدە. بۇرىنعى بەلگىلەن­گەن­نەن باسقا تاعى دا 10 مەكتەپ, 18 بالاباقشا, 15 دەنساۋلىق ساقتاۋ مە­كەمەسى سالىنادى جانە ءجون­دەلەدى, – دەدى وبلىس باسشىسى. ەلەۋسىن ناۋرىزباي ۇلى اتالعان نىساندارداعى ەڭبەك تولىققاندى جۇزەگە اسىرىلۋى ءۇشىن بارلىق جاعداي جاسالعانىن, سونىڭ ىشىندە جۇمىسپەن قامتاماسىز ەتۋ, جالاقى تولەمىنە كەپىلدىك, كولىكپەن الىپ ءجۇرۋ, تاماق جانە وزگە دە كەرەك-جاراقتاردى ۇيىمداستىرۋ باستى نازاردا ەكەندىگىن جەتكىزدى. بۇعان دەيىن وبلىس باسشىسى جاستار مارافون-ەستافەتاسىنىڭ قورىتىندىسى بويىنشا ەڭ ۇزدىك دەگەندەرگە 50 جەڭىل اۆتوكولىك پەن 1000 نوۋتبۋك جانە استانا قالا­سىنا 2000 جولداما تابىس ەتىلەتىنىن ايت­قان بولاتىن. ميتينگتە ءسوي­لە­گەن كەزىندە جاستاردىڭ قۇلشىنىسى مەن جۇمىس اۋقىمىن سارالاي كەلە, تاعى دا ون اۆتوكولىك ءبولۋدى شەش­كەنىن مالىمدەدى. جاستار دۋىلداتىپ ءۇن قوستى. سالتاناتتى ميتينگتە “جاسىل ەل” جاساعى مەن ورتا مەكتەپ جانە ستۋ­دەنتتەر قۇرىلىس وتريادى, سون­داي-اق, جۇمىسشى جاستار اتىنان اقتوبە مەملەكەتتىك پەداگوگيكالىق ينستيتۋتى ستۋدەنتتىك-قۇرىلىس جانە “جاسىل ەل” وتريادىنىڭ كومان­ديرى بيبىگۇل اقجىگىتوۆا, اقتوبە فەرروقورىتپا زاۋىتى جاس ماماندار كەڭەسىنىڭ توراعاسى ەرلان نازاروۆ جانە باسقالار ءسوز سويلەپ, بۇل باستامانى ءونىمدى ەڭبەكپەن باياندى ەتەتىندەرىنە سەندىردى. ەل ءۇشىن, ەلباسى ءۇشىن ەڭبەك ۆاحتاسىن تابىستى جۇرگىزەتىندىكتەرىن جەتكىزدى. سوعىس جانە ەڭبەك ارداگەرى سۇلتان دوسمۇراتوۆ جاستاردى اعا ۇرپاقتىڭ ۇلگى-ونەگەسىن وسىلاي ءساتتى جالعاس­تىرا بەرۋگە شاقىردى, اۋىلداردى كوركەيتۋگە اتتانىپ بارا جاتقان جاستارعا ساتتىلىك تىلەدى. بۇدان كەيىن “نۇر وتان” حدپ توراعاسىنىڭ ءبىرىنشى ورىنباسارى نۇرلان نىعماتۋلين مەن وبلىس اكىمى ەلەۋسىن ساعىندىقوۆ اقتوبە قالاسى مەن وبلىستىڭ 12 اۋدانىن­داعى جاستار وكىلدەرىنە سالتاناتتى تۇردە ەڭبەك جولداماسىن تابىس ەتتى. وبلىس جاستارىنىڭ “اۋىلدىڭ گۇلدەنۋى –قازاقستاننىڭ گۇلدەنۋى” اتتى مارافون-ەستافەتاسىنىڭ باس­تالۋىنا ارنالعان شاراعا قاتىسۋ­شى­لار وسى ساتتە قاناتتاس ءوتىپ جات­قان مۇعالجار اۋدانىنداعى جاستار ميتينگىسىن تىكەلەي جەلىدە كوردى. سالتاناتتى شارانىڭ سوڭىندا اقتوبە جاستارىنىڭ قازاقستان جاستارىنا ۇندەۋى وقىلدى. ميتينگ جاستار مارافون-ەستافەتاسىنىڭ ءانۇرانىنا اينالعان “اتامەكەن” ءانىن شاراعا ارنايى شاقىرىلعان قازاقستان رەسپۋبليكاسىنىڭ ەڭبەك سىڭىرگەن ءارتىسى ەسكەندىر حاسانعا­ليەۆ­تىڭ ءوزى ورىندادى. جيىننان جىگەرلەنىپ شىققان جاستار قالالار مەن اۋىلداردى اباتتاندىرۋعا اتتانىپ كەتتى. ساتىبالدى ءساۋىرباي, اقتوبە وبلىسى.