«2023 جىلدىڭ ساياسي كۇن ءتارتىبىن وتكەن جىلداعىداي پرەزيدەنت بەلگىلەگەن ساياسي رەفورمالار ۆەكتورى ايقىندايدى. ءبىرىنشى كەزەكتە, بۇل ەل كونستيتۋتسياسىن جاڭارتۋ جونىندەگى رەسپۋبليكالىق رەفەرەندۋم قورىتىندىلارىن ءىس جۇزىندە ىسكە اسىرۋدى كوزدەيتىن شارالارعا قاتىستى بولماق. جىل باسىنان باستاپ مۇلدەم جاڭا ينستيتۋت – كونستيتۋتسيالىق سوت ءوز جۇمىسىن باستايدى. ول ادام قۇقىقتارى جونىندەگى ۋاكىل مەن باس پروكۋراتۋرانىڭ جاڭا كونستيتۋتسيالىق مارتەبەسىمەن جانە حالىقتىڭ الەۋمەتتىك وسال توپتارىن قولداۋ جونىندەگى ومبۋدسمەننىڭ جاڭا لاۋازىمىن قۇرۋمەن قاتار ازاماتتاردىڭ ىرگەلى قۇقىقتارىن قورعاۋدىڭ جاڭا جۇيەسىن جابادى», دەپ جازدى ەرلان قارين Telegram-داعى ارناسىندا.
مەملەكەتتىك كەڭەسشى اتاپ وتكەندەي, 1 قاڭتاردان باستاپ سايلاۋ زاڭناماسى مەن سايلاۋ جۇيەسىنە قاتىستى بىرقاتار جاڭا وزگەرىستەر كۇشىنە ەنەدى.
ء«بىر مانداتتى سايلاۋ وكرۋگتەرى مەن ءتيىستى سايلاۋ كوميسسيالارىن قۇرۋ پروتسەسى باستالادى. اۋماقتىق سايلاۋ كوميسسيالارىنىڭ مۇشەلەرى ەندى ءوز وكىلەتتىكتەرىن كاسىبي تۇراقتى نەگىزدە جۇزەگە اسىرادى. بۇل سايلاۋ راسىمدەرىنىڭ ساپاسىن ارتتىرۋعا مۇمكىندىك بەرەدى. جاڭا جىلدا 2022 جىلدىڭ كۇزىندە باستالعان جاڭا سايلاۋ تسيكلى جالعاسادى. 14 قاڭتاردا پارلامەنت سەناتى دەپۋتاتتارىنىڭ سايلاۋى وتەدى, سودان كەيىن ءبىرىنشى جارتىجىلدىقتا ساياسي جۇيەنى ۇدەمەلى قايتا جۇكتەۋدىڭ پرەزيدەنتتىك جوسپارىنا سايكەس ءماجىلىس پەن بارلىق دەڭگەيدەگى ءماسليحاتتار دەپۋتاتتارىنىڭ كەزەكتەن تىس سايلاۋى ءوتۋى ءتيىس. الداعى سايلاۋ ناۋقانى مۇلدەم جاڭا ەرەجەلەر مەن نورمالار بويىنشا وتەتىنىن اتاپ وتكەن ءجون», دەيدى ول.
ايتا كەتسەك, 2023 جىلدان باستاپ اۋداندار مەن وبلىستىق ماڭىزى بار قالالاردىڭ اكىمدەرىن پيلوتتىق رەجيمدە تىكەلەي سايلاۋ پروتسەسى وتكىزىلەتىن بولادى.
«اۋىل اكىمدەرىنىڭ كورپۋسىن جاڭارتۋ جالعاسادى. 350-دەن استام اۋىل, كەنت جانە اۋىلدىق وكرۋگ اكىمدەرىنە تىكەلەي سايلاۋ وتكىزۋ كوزدەلىپ وتىر. بۇل سايلاۋ مىڭنان استام اۋىلدىق ەلدى مەكەندەردى قامتيدى. وسىلايشا الداعى جىل الدىڭعى جىلمەن سالىستىرعاندا ىشكى ساياسي وقيعالارعا تولى بولۋعا ۋادە بەرەدى. ەڭ باستىسى - پرەزيدەنتتىك جاڭعىرتۋ باعدارلاماسىن ۇدەمەلى ىسكە اسىرۋ جالعاسۋدا. بۇل 2023 جىلعى ساياسي كۇن ءتارتىبىنىڭ نەگىزى بولماق», دەپ جازدى ەرلان قارين.
