دەپۋتات حالىقارالىق قانت ديابەتى فەدەراتسياسىنىڭ مالىمەتى بويىنشا, وتكەن جىلى الەمدە ەرەسەكتەردە 537 ملن قانت ديابەتى سىرقاتىنىڭ تىركەلگەنىن اتاپ ءوتتى. قازاقستاندا بۇل كورسەتكىش شامامەن 450 مىڭ ادامدى قۇرايدى. ونىڭ ىشىندە 5,5 مىڭعا جۋىعى 17 جاسقا دەيىنگى بالالار بولىپ وتىر.
«ەلىمىزدە اۋىر دەرتكە شالدىققاندار سانى ودان دا كوپ بولۋى مۇمكىن. سەبەبى اتالعان دەرت كوپكە دەيىن بەلگى بەرمەيتىندىكتەن, ناۋقاستاردىڭ كوبىسى اسقىنعان كەزدە عانا دارىگەرگە جۇگىنەدى. ارينە, ءبىزدىڭ ەلىمىزدە وسىنداي ناۋقاستار ەمدەلۋ ءۇشىن امبۋلاتوريالىق دەڭگەيدە قانتتى تومەندەتەتىن دارىلىك زاتتارمەن, مەديتسينالىق بۇيىمدارمەن قامتاماسىز ەتىلەدى. سونىمەن قاتار بۇگىنگى تاڭدا قانت ديابەتى – قازاقستانداعى ەڭ قىمبات الەۋمەتتىك ماڭىزى بار اۋرۋلاردىڭ ءبىرى. رەسمي اقپارات بويىنشا, ناۋقاستاردى ءدارى-دارمەكپەن قامتاماسىز ەتۋ ءۇشىن بيىل 30 ملرد تەڭگەگە جۋىق قاراجات بولىنگەن», دەدى سەناتور.
دەپۋتاتتىڭ ايتۋىنشا, ەل وڭىرلەرىندە ەندوكرينولوگ-دارىگەرلەردىڭ جەتىسپەۋشىلىگى دە وزەكتى ماسەلە بولىپ وتىر. قازىرگى كەزدە قازاقستاندا جەكە سەكتوردا جۇمىس ىستەيتىندەردى قوسقاندا 900-دەن استام وسىنداي مامان بار ەكەنىن ايتا كەتكەن ءجون.
«ۇكىمەت تاراپىنان جوعارىدا ايتىلعان ماسەلەلەردى ەسكەرە وتىرىپ, قانت ديابەتىمەن ءتيىمدى كۇرەسۋ ءۇشىن باستاپقى پروفيلاكتيكا مەن پاتولوگيانى ەرتە انىقتاۋعا باعىتتالعان قانت ديابەتى بويىنشا ۇلتتىق باعدارلاماسىن ازىرلەۋدى سۇرايمىن. وعان كەلەسى باعىتتاردى قوسۋدى ۇسىنامىن: قازاقستاندا مامانداندىرىلعان ديابەتتىك كومەك كورسەتۋدىڭ زاماناۋي جۇيەسىن قۇرۋ; كورسەتىلەتىن كومەكتىڭ ساپاسىن ارتتىرۋ ماقساتىندا دياگنوستيكانىڭ جانە ەمدەۋدىڭ زاماناۋي ادىستەمەلەرىن ەنگىزۋ; ەلىمىزدە قانت ديابەتىنىڭ تارالۋىن ءدال باعالاۋ ماقساتىندا قانت ديابەتى مەن سكرينينگتىڭ جەتىلدىرىلگەن ۇلتتىق تىركەلىمىن پايدالانۋ; جۇكتىلىك كەزىندە, انا مەن بالا ءولىمىن ازايتۋ ءۇشىن قانت ديابەتىن ۋاقىتىلى جانە دەر كەزىندە ەمدەۋ كەرەك. سونداي-اق پاتسيەنتتەرگە ءوزىن-ءوزى باقىلاۋ ادىستەرىن ۇيرەتۋ ماقساتىندا قانت ديابەتى مەكتەپتەرىن, ديابەتتىك تابان, ديابەتتىك رەتينوپاتيا كابينەتتەرىن ارتتىرۋ قاجەت», دەدى سەناتور.
