زالدار «قازاقستان حالقىنا» قوعامدىق قورىنىڭ «24 بالالار سپورت زالى» جوباسى اياسىندا جاراقتاندىرىلدى. قور قاراجاتى ەسەبىنەن بوكس, كۇرەس جانە باسقا دا سپورت تۇرلەرىمەن اينالىسۋعا ارنالعان سپورتتىق قۇرال-جابدىقتار ساتىپ الىندى. باستامانى ىسكە اسىرۋداعى قوردىڭ سەرىكتەسى «باتىر بولامىن!» قورى جوبانىڭ ۇيىمداستىرۋشىلىق ماسەلەلەرىمەن اينالىسادى. ەكى زالدى جابدىقتاۋعا «قازاقستان حالقىنا» قورى 18,2 ميلليون تەڭگە باعىتتادى.
«زالدى وسىلايشا جابدىقتاعانى ءۇشىن «قازاقستان حالقىنا» قورىنا كوپ راقمەت ايتقىم كەلەدى. مەن مما-مەن 3-4 جىلدان بەرى اينالىسىپ كەلەمىن, ەندى جاقسى جاتتىعۋ وتكىزەتىن بولامىز», دەدى سەنەك اۋىلىنداعى زالدىڭ تاربيەلەنۋشىسى يسلام ءالىمحان.
اشىلۋ سالتاناتىندا بوكستان الەم چەمپيونى ەردوس جاڭابەرگەن, مما چەمپيونى رۋسلان ساريەۆ جانە ارالاس جەكپە-جەكتەن جاتتىقتىرۋشى جەڭىس قايرانوۆ بالالارعا شەبەرلىك ساباعىن وتكىزدى.
«بۇگىنگى تاڭدا بىرلەسكەن قايىرىمدىلىق باعدارلاماسى اياسىندا ماڭعىستاۋ وبلىسىندا 4 زال جۇمىس ىستەيدى. تامىز ايىندا بەينەۋ جانە اقجىگىت اۋىلدارىندا اشىلدى. اۋىلدىق جەرلەردە ۇيىرمە, جاقسى جابدىقتالعان زالدار جوق, سوندىقتان بالالار مەن ەرەسەكتەر سپورت زالدارىنىڭ اشىلۋىن اسىعا كۇتەدى», دەپ اتاپ ءوتتى «باتىر بولامىن» قورىنىڭ جەتەكشىسى ارمان ۋاحاپ.
ايتا كەتەيىك, «قازاقستان حالقىنا» قورى ىسكە اسىرىپ جاتقان «24 بالالار سپورت زالى» جوباسى ەلىمىزدىڭ شالعايداعى ەلدى مەكەندەرىندە نەمەسە بالالار ءۇشىن سپورتقا قولجەتىمدىلىك دەڭگەيى تومەن اۋىلدىق جەرلەردە بالالار سپورتىنىڭ قولجەتىمدىلىگىن ارتتىرۋعا باعىتتالعان. جوبانىڭ نەگىزگى ماقساتتى اۋديتورياسى – 5 جاستان 18 جاسقا دەيىنگى, از قامتىلعان جانە كوپبالالى وتباسىلاردان شىققان بالالار. 24 زالدى اشۋعا ارنالعان قايىرىمدىلىق باعدارلاماسىنىڭ بيۋدجەتى - 183 623 000 تەڭگە.
