ۆيتسە-ءمينيستردىڭ ايتۋىنشا, قازاقستاندا 2024 جىلعا دەيىنگى بالالارعا ونكوگەماتولوگيالىق كومەكتى جەتىلدىرۋ بويىنشا جول كارتاسى بەكىتىلگەن.
«ەلىمىزدە جىلىنا ورتا ەسەپپەن ونكولوگيالىق اۋرۋى بار 500-600 بالا انىقتالادى. ونىڭ 41 پايىزى جەدەل لەيكەميامەن, 14 پايىزى ورتالىق جۇيكە جۇيەسىنىڭ ىسىكتەرىمەن, 9 پايىزى جۇمساق تىندەردىڭ ساركومالارىمەن جانە باسقا اۋرۋلارمەن اۋىرادى. 1-2 ساتىداعى بالالاردا ونكولوگيانىڭ انىقتالۋى 38 پايىزدى قۇرادى. جاس قۇرىلىمىندا 33 پايىزى - 3 پەن 10 جاس ارالىعىنداعى بالالار. بارلىعى ءارتۇرلى ونكولوگيالىق جانە گەماتولوگيالىق اۋرۋلارى بار 3833 بالا ديناميكالىق باقىلاۋعا الىنعان, ونىڭ ىشىندە 968 پاتسيەنت امبۋلاتوريالىق جولمەن ارنايى پاتوگەنەتيكالىق تەراپيا الۋدى جالعاستىرىپ جاتىر», دەدى ۆياچەسلاۆ دۋدنيك وكق بريفينگىندە.
ونىڭ ايتۋىنشا, بۇگىنگى تاڭدا ەلىمىزدە دياگنوستيكا مەن ەمدەۋدىڭ جوعارى تەحنولوگيالىق زاماناۋي ادىستەرى ەنگىزىلگەن.
سوڭعى بەس جىل ىشىندە 335 بالاعا گەموپوەتيكالىق ءدىڭ جاسۋشالارى ترانسپلانتاتسيالاندى, ونىڭ 49-ى بيىل جاسالدى.
«مەملەكەت باسشىسى قاسىم-جومارت توقاەۆتىڭ تاپسىرماسى بويىنشا مينيسترلىك ونكولوگيالىق اۋرۋلارمەن كۇرەس بويىنشا كەشەندى جوسپار ازىرلەدى. 2025 جىلعا دەيىن بالالار ونكولوگيالىق اۋرۋحانالارىنىڭ ماتەريالدىق-تەحنيكالىق بازاسىن كۇشەيتۋ, ءدارى-دارمەكپەن قامتاماسىز ەتۋدى جاقسارتۋ جانە وسى قىزمەت ماماندارىنىڭ بىلىكتىلىگىن ارتتىرۋ بويىنشا ءىس-شارالار كوزدەلگەن. سونداي-اق قازاقستاندا بالالارعا ارنالعان ۇلتتىق ونكوگەماتولوگيالىق ورتالىق قۇرۋ جوسپارلانۋدا», دەپ تولىقتىردى سپيكەر.
