بۇقپا تاۋىنىڭ ەتەگىندە وتكەن ءدۇبىرلى دودا ەل تاۋەلسىزدىگىنە جانە جەرلەس بۇركىتشى ءماسىپ باتىرحان ۇلىن ەسكە الۋعا ارنالدى. ءسوز اراسىندا بايراقتى باسەكەنىڭ 2017 جىلدان باستاپ حالىقارالىق مارتەبەگە يە بولعاندىعىن سىنالاپ ايتا كەتەلىك. اسىلىندا مۇنداي ەل نازارىن وزىنە اۋداراتىن ايتۋلى جارىستى ۇيىمداستىرۋ كونە دۇنيەنىڭ كومبەسىن اشىپ, ۋاقىت توزاڭى تۇمشالاعان الاشتىڭ عاجايىپ سالت-ءداستۇرىن قايتا تىرىلتۋگە, بۇگىنگى ۇرپاق كادەسىنە جاراتۋعا, جاس تولقىننىڭ كوكىرەگىنە ەجەلگى سال-سەرىلەر ءداۋىرىنىڭ سالتانات سەزىمىن سەبەزگىلەۋگە ىقپال ەتپەك. ءارى ەل اراسىنداعى ىنتىماقتىڭ التىن ارقاۋىن بەكىتە تۇسۋگە دە سەپتىگى بار.
– قازاق حالقىنىڭ تاريحى وتە باي. كەيىنگى ۇرپاق ونى ۇمىتۋعا بولمايدى, – دەيدى وبلىستىق دەنە شىنىقتىرۋ جانە سپورت باسقارماسىنىڭ باسشىسى اسەت بۋكۋباەۆ, – ۇلى دالانىڭ ۇلاعاتى مەن رۋحاني بايلىعى شىمىرلاپ قايناپ, كەيىنگى جاستىڭ سۇيەگىنە ءسىڭۋى كەرەك.
بايراقتى باسەكە ۇلاعاتى مول ۇلتتىق ءداستۇردى ناسيحاتتاۋعا كەڭ جول اشقاندىعىن ايتا كەتۋگە ءتيىستىمىز. ءزاۋ بيىكتە ەركىن سامعاعان قىران قۇستار كوڭىلىڭدى جەلدى كۇنگى تەڭىزدەي تولقىتادى ەكەن.
جارىس ءۇش كەزەڭمەن وتكىزىلدى. اۋەلى بۇركىت پەن سۇڭقارلاردىڭ سىرتقى ءپىشىنى, تۇعىرعا قونىسى, بۇگىنگى اڭشىنىڭ كىلەڭ تەرىدەن تىگىلگەن, بىلعارىمەن قاپتالعان جەڭىل, ىقشام, جىلى سپورتتىق كيىمدەرى ساراپقا سالىندى. قۇستاردىڭ كوك اسپاندا سامعاپ ۇشۋى, قۇسبەگىنىڭ شاقىرۋىنا وراي قايتادان ورالۋى ەكشەلدى. شىرعا تارتىلدى. ەڭ ءبىر قىزىقتى تۇس وسى بولدى. اق قاردىڭ ۇستىندە ساي-سايدى جاعالاپ, جان ساۋعالار بۇتا ىزدەپ جوسىلا شاپقان قىزىل تۇلكى يەن دالادا ءبىر ۋىس وت زىمىراپ بارا جاتقانداي كورىنەدى ەكەن. قوس قاناتىن قومداپ, وقتاي اتىلعان, بابى كەلىسكەن قىران اتقان وقتاي زاۋلاپ كەلىپ, وتكىر تۇياعىمەن ىلگەندەگى كورىنىس قايتالانبايتىن ءبىر قىزىق.
ەكى كۇندىك جارىستىڭ قورىتىندىسى بويىنشا الماتى وبلىسىنان كەلگەن قۇسبەگى سەيىتجان ايان ۇزدىك دەپ تانىلدى, الماتى قالاسىنىڭ وكىلى ەسەنتاي سۇلتانسەرى ەكىنشى ورىندى يەلەنسە, قاراعاندى وبلىسىنىڭ تۇرعىنى بەردىبەك سەز ءۇشىنشى ورىنعا ورنىقتى. «سۇڭقارمەن اڭ اۋلاۋ» اتالىمى بويىنشا الماتىلىقتار بايانتاي ەرمۇحان مەن سەيىتجان الماز جەڭىسكە جەتسە, استانالىق قۇسبەگى ەراسىل سەرىكبەك ۇلىنىڭ مەرەيى ۇستەم بولدى. قاراعاندىلىق تاڭات وسپانقۇلوۆ, اقمولالىق ءۋاليحان شىڭعىس, كەڭەس دارحانداردىڭ دا ونەرىن اتاي كەتكەن ورىندى بولماق.
تۇركيانىڭ قازاقستان رەسپۋبليكاسىنداعى ەلشىسىنىڭ ءبىرىنشى كەڭەسشىسى تۋرحان ديلماچ ەكى ەل اراسىنداعى تاريحي جانە رۋحاني بايلانىستىڭ وزەكتەس ەكەندىگىن تىلگە تيەك ەتتى. ءسوز سوڭىندا زامانىندا قۇس ءتىلىن ءبىلىپ, ونەرىن ورىستەتكەن ءماسىپ باتىرحان ۇلى تۋرالى ءبىر اۋىز ءسوز ايتا كەتەلىك. 1930 جىلدارى قىران قۇسىنىڭ ارقاسىندا تۇتاس اۋىلدى اشتىقتان امان الىپ قالعان. ەكىنشى دۇنيەجۇزىلىك سوعىس جىلدارى باعالى اڭ تەرىسىن ساتۋدان تۇسكەن قاراجاتتى مايدانعا كومەك رەتىندە بەرگەن. اتى اڭىزعا اينالعان تۇلعانى ەسكە الۋ ءۇشىن وسىنداي بايقاۋلار ءجيى وتكىزىلەدى.
اقمولا وبلىسى
