سىرىم دات ۇلى داڭعىلىنىڭ بويىندا جاڭادان جاساقتالعان ادەمى الاڭ قالا تۇرعىندارى مەن قوناقتارى سەرۋەندەپ, دەمالىس ۋاقىتىن ءتيىمدى وتكىزۋگە بولاتىن ادەمى مۇيىسكە اينالعان. قالامگەرلەر اتىن يەلەنگەن الاڭنىڭ اشىلۋىنا باتىس قازاقستان وبلىسىنىڭ اكىمى ناريمان تورەعاليەۆ, ورال قالاسىنىڭ اكىمى ميرجان ساتقانوۆ, قازاقستان جازۋشىلار وداعى وبلىستىق فيليالىنىڭ جەتەكشىسى, قادىر مىرزا ءالى اتىنداعى ونەر مەن مادەنيەت سارايىنىڭ ديرەكتورى باۋىرجان حاليوللا جانە جەرگىلىكتى اقىن-جازۋشىلار قاتىستى.
– قوعامدا اقىن-جازۋشىلار مەن ۇلت زيالىلارىنىڭ ورنى ەرەكشە. سوندىقتان قالامگەرلەردىڭ قادىر-قاسيەتىن ارتتىرىپ, توردەن تۇسىرمەي قۇرمەتتەگەن ەلمىز. بۇگىنگى اشىلىپ جاتقان «قالامگەرلەر الاڭى» دا سول ءسوزىمىزدىڭ جارقىن ءبىر مىسالى. ال, ارنايى قويىلعان بەلگىتاس – دۇنيەدەن وتكەن اقىن-جازۋشىلاردىڭ رۋحىنا تاعزىم, – دەپ اتاپ ءوتتى ءوڭىر باسشىسى.
بۇل ايتۋلى وقيعاعا وراي قازاقستان جازۋشىلار وداعى باسقارماسىنىڭ توراعاسى ۇلىقبەك ەسداۋلەت پەن قازاقستان جازۋشىلار وداعىنىڭ باسقارما حاتشىسى, استانا فيليالىنىڭ ديرەكتورى داۋلەتكەرەي كاپ ۇلى قۇتتىقتاۋ حات جولداعان ەكەن.
ءىس-شارا سوڭىنان ءوڭىر باسشىسى جەرگىلىكتى قالامگەر قاۋىممەن داستارقان باسىندا جۇزدەسىپ, كوپتەگەن سۇراققا جاۋاپ بەردى. وبلىس اكىمى قىزمەتىنە جاقىندا عانا تاعايىندالعان ناريمان تورەعالي ۇلى مەملەكەت باسشىسى ۇسىنىپ وتىرعان «ادىلەتتى مەملەكەت – ادىلەتتى ەكونوميكا – ادىلەتتى قوعام» تۇجىرىمداماسىن جۇزەگە اسىرۋدىڭ ءمانى مەن ماڭىزىنا توقتالىپ, اق جايىقتىڭ اقىن-جازۋشىلارىن وسى جولدا جۇمىلا قىزمەت ەتۋگە شاقىردى.
باتىس قازاقستان وبلىسى
