قازاقستان مەن وزبەكستان سەناتورلارى ارال پروبلەماسىن تالقىلادى

كوميسسيانىڭ جۇمىسىن اشقان ماۋلەن اشىمباەۆ قازىرگى تاڭدا قازاقستان مەن وزبەكستان اراسىنداعى دوستىق پەن تاتۋ كورشىلىككە نەگىزدەلگەن بايلانىس سىندارلى جانە سەنىمدى ديالوگ قۇرۋعا مۇمكىندىك بەرگەنىن اتاپ ءوتتى.

«بۇگىندە ءبىزدىڭ مەملەكەتتەرىمىزدىڭ باسشىلارى ىنتىماقتاستىق پەن ءوزارا ءىس-قيمىلدىڭ جوعارى ۇلگىسىن كورسەتىپ كەلەدى. قازاقستان پرەزيدەنتى قاسىم-جومارت كەمەل ۇلى توقاەۆ ءوزىنىڭ مەملەكەت باسشىسى رەتىندەگى العاشقى ساپارىن باۋىرلاس وزبەكستان ەلىنەن باستاۋى زور مانگە يە. سونداي-اق 2021 جىلعى جەلتوقسان ايىندا وزبەكستان پرەزيدەنتى شاۆحات ميرزيەەۆتىڭ قازاقستانعا جاساعان مەملەكەتتىك ساپارىنىڭ ناتيجەسىندە ءبىزدىڭ سەرىكتەستىگىمىز وداقتاستىق قارىم-قاتىناس دەڭگەيىنە كوتەرىلدى. ءبىزدىڭ پالاتالارىمىز اراسىنداعى ىنتىماقتاستىق جونىندەگى كوميسسيا دا بەلسەندى جۇمىس ىستەپ كەلەدى. وسى رەتتە كوميسسيانىڭ ەكى تەڭ توراعاسىنىڭ ناتيجەلى قىزمەتىن ەرەكشە اتاپ وتكىم كەلەدى»، دەدى ماۋلەن اشىمباەۆ.

ەكى ەل پارلامەنتتەرى سەناتتارىنىڭ توراعالارى كوميسسيا جۇمىسىن وڭ باعالاپ، قول جەتكىزىلگەن جوعارى ساپا پالاتالار اراسىنداعى ءوزارا ءىس-قيمىلدىڭ ماڭىزىن ودان ءارى ارتتىرا تۇسەتىنىن اتاپ ءوتتى.

وتىرىس كەزىندە سەناتورلار ارال پروبلەماسىنا، ونىڭ سالدارىن جويۋعا قاتىستى بىرلەسكەن جۇمىسقا باسا ءمان بەردى.

«بىرىككەن ۇلتتار ۇيىمى جانە بارلىق الەمدىك قوعامداستىق ارالدىڭ قۇرعاۋىن قازىرگى تاڭداعى جاھاندىق ەكولوگيالىق پروبلەمالاردىڭ ءبىرى رەتىندە اتادى. قازاقستان مەن وزبەكستان ارال وڭىرىندەگى جاعدايدى ايتارلىقتاي تۇراقتاندىرۋعا مۇمكىندىك بەرەتىن ءتيىستى شارالاردى جانە جوبالاردى ىسكە اسىرۋدا. بۇگىنگى وتىرىس كەزىندە ءبىزدىڭ دەپۋتات ارىپتەستەرىمىز ارال پروبلەماسىن شەشۋ جولىندا پارلامەنتتەرىمىز تاراپىنان اتقارىلاتىن بىرلەسكەن جۇمىسقا قاتىستى تىڭ يدەيالار مەن ۇسىنىستارىن ورتاعا سالادى دەپ ۇمىتتەنەمىز»، دەدى ماۋلەن اشىمباەۆ.

سونىمەن قاتار كوميسسيا وتىرىسىندا سەناتورلار قازاقستان مەن وزبەكستان اراسىنداعى وڭىرارالىق جانە شەكارا ماڭىنداعى ىنتىماقتاستىقتى دامىتۋ، ەكى ەل قالالارىنىڭ باۋىرلاستىق بايلانىستارىن نىعايتۋ ماسەلەلەرىن تالقىلادى.

ءوز كەزەگىندە تانزيلا نارباەۆا پارلامەنتارالىق ىنتىماقتاستىقتى قالىپتاستىرۋ جولىندا جۇيەلى جۇمىس جۇرگىزگەن قازاقستانعا العىسىن ءبىلدىردى.

وتىرىستا سايلاۋدى باقىلاۋ جونىندەگى مونيتورينگتىك ميسسيالار كەزىندە حالىقارالىق ۇيىمدار اياسىنداعى بىرلەسكەن جۇمىس بارىسى دا ءسوز بولدى. ودان بولەك، 2021-2022 جىلدارعا ارنالعان پارلامەنتارالىق ىنتىماقتاستىقتى دامىتۋ جونىندەگى جول كارتاسى قورىتىندىلاندى.

كەزدەسۋ سوڭىندا ەكى ەل پارلامەنتىنىڭ وكىلدەرى ارال پروبلەماسىنىڭ سالدارىن جويۋعا، ءتۋريزمدى دامىتۋ، سۋ رەسۋرستارىن باسقارۋ، ورتالىق ازيا وڭىرىندە قاۋىپسىزدىكتى قامتاماسىز ەتۋ جانە ءوزارا ءىس-قيمىلدىڭ باسقا دا وزەكتى باعىتتارى بويىنشا جۇمىستارعا پارلامەنتشىلەردىڭ ودان ءارى قاتىسۋىن كوزدەيتىن ۇسىنىستار كەشەنىن ازىرلەدى.