ءار ادامنىڭ تۇلعا بولىپ قالىپتاسۋى جانە مەملەكەتتىڭ الەۋمەتتىك ساياساتىن ىسكە اسىرۋ ءۇشىن بالالار مەن جاسوسپىرىمدەر سپورتىن جانە بۇقارالىق سپورتتى دامىتۋدىڭ ماڭىزى زور. سوندىقتان ەلىمىزدە بۇل باعىتقا ۇنەمى باسا ءمان بەرىلىپ كەلەدى. سايىسقا قاتىسۋشىلارعا ساتتىلىك تىلەگەن ماۋلەن اشىمباەۆ مەملەكەت باسشىسى قازاقستان حالقىنا ارناعان جولداۋىندا بۇقارالىق سپورتتى دامىتۋ جونىندە ءتيىستى ورگاندارعا ناقتى مىندەتتەر جۇكتەگەنىن ايتتى.
«پرەزيدەنتىمىز قاسىم-جومارت كەمەل ۇلى توقاەۆ ۇلت دەنساۋلىعىنا ەرەكشە كوڭىل ءبولىپ, وسى سالانى دامىتۋدى ايرىقشا نازاردا ۇستاپ كەلەدى. بۇل رەتتە بۇقارالىق سپورتقا, دەنە شىنىقتىرۋعا جانە بالالار سپورتىنا باسىمدىق بەرۋ ماڭىزدى. مەملەكەت باسشىسى ءوزىنىڭ سايلاۋ الدىنداعى باعدارلاماسىندا ءار وقۋشى ءۇشىن سپورت ۇيىرمەلەرىنە تەگىن بارۋدى قولجەتىمدى ەتۋ مىندەتىن جۇكتەدى. وسى رەتتە بۇگىنگى سايىس بۇقارالىق سپورتتى دامىتۋ جانە دارىپتەۋ تۇرعىسىنان ەرەكشە مانگە يە. مۇنداي باستامالار جاس بۋىننىڭ ەرىك-جىگەرى مەن رۋحىن شىڭداي تۇسەدى», دەگەن سەنات توراعاسى اۋىر اتلەتيكا جانە كۇشتىك سپورت تۇرلەرىنەن ەلىمىزدىڭ ءىرى دودالارداعى جەتىستىكتەرى مول ەكەنىن تىلگە تيەك ەتتى.
سايىستىڭ اشىلۋ راسىمىنە وليمپيادا چەمپيوندارى سەرىك ساپيەۆ, ولگا رىپاكوۆا جانە تاعى باسقا سپورتشىلار مەن بەلگىلى تۇلعالار قاتىستى.
ايتا كەتەيىك, تۋرنيرگە ەلىمىزدەن جانە جاقىن شەت مەملەكەتتەردەن 200-گە جۋىق كاسىبي اتلەت قاتىسىپ جاتىر. ولار اۋىر اتلەتيكا, پاۋەرليفتينگ, ارمرەستلينگ, كروسسفيت, ماس-رەستلينگ, گىر سپورتى, ارمليفتينگ, ۆوركاۋت جانە سترونگمەن سايىس تۇرلەرى بويىنشا باق سىنايدى.
