كوكشەتاۋدا «AMANAT» پارتياسى اقمولا وبلىستىق فيليالىنىڭ كەزەكتەن تىس XXXVIII كونفەرەنتسياسى ءوتتى. كونفەرەنتسيا دەلەگاتتارى اشىق داۋىس بەرۋ ارقىلى اينا ءمىسىرالىموۆانى پارتيا فيليالىنىڭ توراعاسى رەتىندە سايلادى.
ول ءوز سوزىندە پارتيانىڭ ايماقتاعى سايلاۋالدى ۋادەلەرىنىڭ ورىندالۋ بارىسىنا توقتالدى. ماسەلەن, بىلتىر وبلىستا 18 مىڭنان استام جاڭا جۇمىس ورنى قۇرىلدى, 70 ءبىلىم بەرۋ ۇيىمىندا جوندەۋ جۇرگىزىلدى, قوسشى قالاسىندا 1200 ورىندىق مەكتەپ پايدالانۋعا بەرىلدى, «ششۋچينسك – ستەپنياك – ءۋاليحانوۆ» جانە «استانا قالاسىنىڭ شىعىس اينالما جولى – سارىوبا ستانساسى» سىندى وبلىستىق ماڭىزى بار 2 اۆتوجولعا كۇردەلى جوندەۋ جۇرگىزىلدى.
ء«موبيلدى قوعامدىق قابىلداۋ بولمەلەرى شالعايداعى ەلدى مەكەندەرگە 40-تان استام ساپار جاسادى. قوعامدىق قابىلداۋلارعا جىل باسىنان بەرى بارلىعى 7 مىڭعا جۋىق ءوتىنىش كەلىپ ءتۇستى. ەرەيمەنتاۋ قالاسىندا دەنە شىنىقتىرۋ-ساۋىقتىرۋ كەشەنى, ەسىل قالاسىندا حوككەي كورتى سالىندى. وبلىستىق «جەر اماناتى» كوميسسياسىنىڭ ارالاسۋىمەن وڭىردە 300 مىڭ گەكتاردان استام جەر مەملەكەت مەنشىگىنە قايتارىلدى», دەدى اينا ءمىسىرالىموۆا.
وسىنداي كونفەرەنتسيا «AMANAT»-تىڭ پاۆلودار وبلىستىق فيليالىندا دا ءوتتى. فيليالدىڭ جاڭا توراعاسى بولىپ يليا تەرەنچەنكو سايلاندى. ول جىل باسىنان بەرى وبلىستا پارتيا باعدارلاماسىن جۇزەگە اسىرۋ شەڭبەرىندە 20 مىڭعا جۋىق جۇمىس ورنى قۇرىلعانىن, ەڭبەك كۇشى ارتىق وڭىرلەردەن پاۆلودار وبلىسىنا 2 مىڭنان استام ادام كوشىپ كەلگەنىن, بيىلعى 10 ايدىڭ قورىتىندىسى بويىنشا 220 مىڭ شارشى مەتر تۇرعىن ءۇي تۇرعىزىلعانىن اتاپ ءوتتى.
«باستاۋىش پارتيا ۇيىمدارىنىڭ پايداسىنا پارتيالىق جارنالاردىڭ 20%-ىن قايتارۋ تۋرالى نورمانى ەنگىزە وتىرىپ, دەمەۋشىلىك ۇيىمدارمەن بىرلەسىپ بيىل جازدا 100-دەن استام زەينەتكەر ءۇشىن ساناتورلى-كۋرورتتىق دەمالىس ۇيىمداستىرىلدى. الەۋمەتتىك ماڭىزى بار ازىق-ت ۇلىك ونىمدەرىنىڭ باعاسىن باقىلاۋ ماقساتىندا پارتيالىق 14 مونيتورينگ توبى قۇرىلدى. بۇگىندە باس-اياعى 317 رەيد جۇرگىزىلدى», دەدى يليا تەرەنچەنكو.
جاڭادان قۇرىلعان اباي وبلىسىنداعى پارتيالىقتار دا شەت قالمادى. وڭىرلىك فيليال بيىل قىركۇيەك ايىندا قۇرىلعانىنا قاراماستان, «AMANAT»-قا 3 مىڭعا جۋىق ادام جۇگىنىپ, 1 مىڭنان استام رەت ازاماتتار قابىلداندى. پارتيانىڭ سايلاۋالدى ۋادەلەرىن ورىنداۋ اياسىندا اقسۋات اۋىلىندا دەنە شىنىقتىرۋ-ساۋىقتىرۋ كەشەنى سالىندى. اقسۋات اۋدانىندا 3 مەكتەپكە كۇردەلى جوندەۋ جۇرگىزىلدى جانە ت.ب.
كونفەرەنتسياعا قاتىسقان دەلەگاتتاردىڭ اشىق داۋىس بەرۋىمەن پارتيانىڭ اباي وبلىستىق فيليالىنىڭ توراعاسى بولىپ قۋانىش سۇلەيمەنوۆ سايلاندى.
