اتىراۋدىڭ احۋالى وڭعا باستى

اتىراۋ وبلىستىق پروكۋراتۋراسىندا زاڭدىلىقتى, قۇقىقتىق ءتارتىپتى جانە قىلمىسقا قارسى كۇرەستى قامتاماسىز ەتۋ جونىندەگى ۇيلەستىرۋ كەڭەسى جۇمىس جاسايدى. وسى كەڭەستىڭ كەزەكتى وتىرىسىندا قازاقستان رەسپۋبليكاسىندا ءدىني ەكسترەميزم مەن تەرروريزمگە قارسى ءىس-قيمىل جونىندەگى 2013-2017 جىلدارعا ارنالعان مەملەكەتتىك باعدارلامانىڭ وڭىردەگى ورىندالۋ ماسەلەسى قارالدى. اتالعان باعدارلامانى ىسكە اسىرۋ ماقساتىندا جەرگىلىكتى اتقارۋشى ورگاندار جانىنداعى اقپاراتتىق-ناسيحاتتاۋ توپتارى­نىڭ قۇرامىنا جوعارى كاسىبي مەملەكەتتىك قىزمەتشىلەر, ءبى­لىكتى تەولوگتار, يمامدار جانە مۇعالىمدەر ەنگىزىلگەن. مۇنداي اقپاراتتىق-ناسيحاتتاۋ توپتاردىڭ جۇمىسى وبلىستىڭ ءدىني احۋالىنا وڭ اسەرىن تيگىزىپ وتىر. سونىڭ دالەلىندەي, بيىل اتىراۋدا ەكسترەميزم جانە تەرروريزممەن بايلانىستى قىلمىستار وتكەن جىلعى كورسەتكىشپەن سالىستىرعاندا 50 پايىزعا تومەندەگەن. ناقتىلاي ايتقاندا, بيىلعى جىل باسىنان بەرى 4 قىلمىس تىركەلىپ وتىر. ونىڭ 3-ەۋى بويىنشا قىلمىستىق كودەكستىڭ 233-3-بابىمەن (تەرروريستىك نەمەسە ەكسترەميستىك قىزمەتتى قارجىلاندىرۋ), تاعى بىرەۋى بويىنشا قىلمىستىق كودەكستىڭ 233-2-بابىمەن (تەرروريستىك توپتىڭ قىزمەتىنە نەمەسە ول جاساعان تەرروريزم اكتىلەرىنە قاتىسۋ) قىلمىستىق ءىس قوزعالىپ, تەرگەلۋدە. جولداسبەك شوپەعۇل, «ەگەمەن قازاقستان». اتىراۋ وبلىسى.