«اۆتوجول قۇرىلىسى بويىنشا بارلىق نەگىزگى دەگەن جۇمىستار اياقتالدى. قازىرگى ۋاقىتتا اباتتاندىرۋ جانە جول اقىسىن الۋ جۇيەسى ورناتىلىپ جاتىر. كونتسەسسيا تۋرالى زاڭعا سايكەس جوبالار ينۆەستورلارعا مەملەكەت بالانسىنا قابىلدانعاننان كەيىن عانا بەرىلەدى. وسىعان بايلانىستى پايدالانۋعا بەرۋ 2023 جىلدىڭ ەكىنشى جارتىسىنا جوسپارلانىپ وتىر», دەپ حابارلادى يدم اۆتوموبيل جولدارى كوميتەتىنىڭ توراعاسى تولەگەن ابدۋللين.
ايتا كەتەيىك, ءۇاااج-ىن ىسكە اسىرۋدى تۇرىك-كورەي كونسورتسيۋمى جۇزەگە اسىرادى. جۇردەك جول نەگىزىنەن التى جولاقتى, ال كەيبىر جەرلەردە ءتورت جولاقتى بولماق. سوندىقتان رۇقسات ەتىلگەن ماكسيمالدى جىلدامدىقتا, ياعني ساعاتىنا 110-140 شاقىرىم جۇرگەن جاعدايدا, 66 شاقىرىم قاشىقتىقتى نەبارى جارتى ساعاتتا ەڭسەرۋگە ابدەن بولادى.
«بۇل مەملەكەتتىك-جەكەشەلىك ارىپتەستىك اياسىنداعى ورتالىق ازياداعى جول قۇرىلىسىنىڭ ەڭ ءىرى ينفراقۇرىلىمدىق جوباسى. اتالعان جوبانى ىسكە اسىرۋ جولدىڭ ترانزيتتىك الەۋەتىن جوعارىلاتىپ, ترانزيتتىك مارشرۋتتاردىڭ باسەكەگە قابىلەتتىلىگىن ارتتىرادى. سونداي-اق جول قوزعالىسى قاۋىپسىزدىگىن قامتاماسىز ەتىپ, مەگاپوليس كوشەلەرىندەگى كەپتەلىستى ازايتادى جانە ەكولوگيالىق جاعدايدى جاقسارتادى», دەپ اتاپ ءوتتى قر يدم اۆتوموبيل جولدارى كوميتەتىنىڭ توراعاسى تولەگەن ابدۋللين.
ايتا كەتۋ كەرەك, ءۇاااج قاسكەلەڭ ماڭىنداعى قىرعاۋىلدى اۋىلىنان باستالىپ, تالعار جانىنداعى قىزىلقايرات اۋىلىندا اياقتالادى. اتالعان تاس جول الماتى وبلىسىنىڭ قاراساي, ىلە جانە تالعار اۋداندارىنداعى 14 ەلدى مەكەن ارقىلى وتەتىن بولادى. بۇل اۆتوجول باتىس قىتاي - باتىس ەۋروپا ترانزيتتىك ءدالىزىنىڭ نەگىزگى بۋىنى بولۋى كەرەك.
