ۆەدومستۆو باسشىسىنىڭ ايتۋىنشا, قازىر ەلىمىزدىڭ قالالارىنداعى جىلۋ جەلىلەرىنىڭ تۇتاستاي ۇزىندىعى 12,1 مىڭ شاقىرىم, ونىڭ 6,7 مىڭ شاقىرىمىن اۋىستىرۋ قاجەت. ياعني, 45 قالادا جەلىلەردىڭ توزۋى 50%-دان تومەن, 50-70% ارالىعىنداعى توزۋ دەڭگەيى – 19 قالادا تىركەلگەن. تاعى 7 قالادا ونىڭ كورسەتكىشى 70%-دان جوعارى. ال ريددەر, شەمونايحا جانە ارقالىق قالالارىنداعى 4 سۋبەكتكە بايلانىستى ۇزىندىعى 52 شاقىرىم جەلىنىڭ نورماتيۆتىك پايدالانۋ مەرزىمى اسىپ كەتكەن.
وسى رەتتە ەلىمىزدەگى ينجەنەرلىك-كوممۋنيكاتسيالىق ينفراقۇرىلىمدى دامىتۋ ءۇشىن جىلۋ جەلىلەرىن كەزەڭ-كەزەڭمەن جاڭعىرتۋ جوسپارلانعان. ءبىرىنشى كەزەڭدە ۇزىندىعى 1,6 مىڭ شاقىرىم جىلۋ جەلىسىن نەمەسە توزۋى دەڭگەيى 70%-دان جوعارى ينفراقۇرىلىمدى جاڭارتۋ (قاجەتتى ينۆەستيتسيانىڭ مولشەرى 538 ملرد تەڭگە) كوزدەلىپ وتىر. ەكىنشى كەزەڭدە توزۋ دەڭگەيى 50%-دان باستاپ 70% دەيىنگى ارالىقتاعى جىلۋ جەلىلەرى اۋىستىرىلماق. سونداي-اق تابيعي مونوپوليالار سۋبەكتىلەرىنىڭ ينۆەستيتسيالىق باعدارلامالارى شەڭبەرىندە توزۋ دەڭگەيى 50%-دان تومەن جەلىلەردى اۋىستىرۋ ۇسىنىلىپ وتىر.
«قازىر جىلۋ جەلىلەرىن جاڭعىرتۋ مەن سالۋعا بايلانىستى قارجىلاندىرۋدىڭ 3 تەتىگى قاراستىرىلعان. ايتالىق, بيۋدجەتتىك كرەديت ارقىلى, سونداي-اق حالىقارالىق قارجى ينستيتۋتتارىمەن بىرلەسىپ سۋبسيديالاۋ جانە «مونو جانە شاعىن قالالاردى دامىتۋ» بيۋدجەتتىك باعدارلاماسىنىڭ كومەگىمەن نىسانالى ترانسفەرتتەردى اۋدارۋ ارقىلى», دەدى ق.وسكەنباەۆ.
بۇدان باسقا يدم باسشىسى جىلۋ كوممۋنيكاتسيالىق-ينفراقۇرىلىمنىڭ جاعدايىن جاقسارتۋ ءۇشىن وڭىرلىك اكىمدىكتەرگە جىلۋمەن جابدىقتاۋ جەلىلەرىنىڭ توزۋ دەڭگەيىن ەسكەرىپ, ءاربىر سۋبەكتكە بايلانىستى شارالار جوسپارىن بەكىتىپ, 2023 جىلدىڭ ءبىرىنشى جارتىجىلدىعىنا دەيىن جوبالاۋ-سمەتالىق قۇجاتتامانى ازىرلەۋدى اياقتاۋ قاجەتتىگىن جەتكىزدى.
سونىمەن قاتار جەرگىلىكتى اتقارۋشى ورگاندارعا نىسانالى ترانسفەرتتەرگە بيۋدجەتتىك باعدارلاما اشۋعا كەڭەس بەرىلدى. وسى ورايدا مالىمەتتەردىڭ قولجەتىمدىلىگىن قامتاماسىز ەتىپ, تابيعي مونوپوليا سۋبەكتىلەرىنە قاراستى جەلىلەردى دامىتۋدى جەدەل جوسپارلاۋ ءۇشىن ينجەنەرلىك ينفراقۇرىلىمنىڭ دەرەكتەرىن جانە ولاردىڭ تەحنيكالىق احۋالىنا قاتىستى مالىمەتتى قالا قۇرىلىسى كاداسترى جۇيەسىنە ەنگىزگەن ءجون.
