سەناتور كەزدەسۋ بارىسىندا گەرمانيا قازاقستاننىڭ ەۋروپالىق وداقتاعى ماڭىزدى ستراتەگيالىق ارىپتەسى ەكەنىن اتاپ ءوتتى. ول ەكى ەلدىڭ پارلامەنتتەرىندە جۇمىس ىستەپ كەلە جاتقان دوستىق توپتارى پارلامەنتارالىق ديالوگتىڭ بەرىك نەگىزىن قۇرايتىنىنا توقتالدى.
ءلاززات قالتاەۆا ەلىمىزدى ودان ءارى دەموكراتيالاندىرۋ جانە ازاماتتاردىڭ مەملەكەتتى باسقارۋعا قاتىسۋىن كەڭەيتۋگە باعىتتالعان اۋقىمدى ساياسي جاڭعىرتۋ باعدارلاماسى تۋرالى حاباردار ەتتى. سەناتور مەملەكەت باسشىسىنىڭ باستامالارى ەلىمىزدىڭ قازىرگى ساياسي جۇيەسىن تۇبەگەيلى وزگەرتەتىنىنە توقتالدى.
«بۇگىندە قازاقستان ءوز دامۋىنىڭ ماڭىزدى تاريحي كەزەڭىندە تۇر. مەملەكەت باسشىسىنىڭ باستاماسى بويىنشا بارلىق سالالاردا كەشەندى جانە جۇيەلى وزگەرىستەر جۇرگىزىلۋدە. ساياسي پارتيالاردى تىركەۋ ءراسىمى جەڭىلدەتىلدى, تىركەۋ كەدەرگىسى تومەندەتىلدى. سايلاۋالدى پارتيالىق تىزىمدەردە جانە دەپۋتاتتىق مانداتتاردى ءبولۋ كەزىندە ايەلدەر مەن جاستارعا 30 پايىزدىق كۆوتا ەنگىزىلدى. ساياسي پارتيالاردىڭ ماجىلىسكە ءوتۋ شەگى 7-دەن 5%-عا دەيىن تومەندەتىلدى. پارلامەنتتىك وپپوزيتسيا ينستيتۋتى قۇرىلدى. اۋىل اكىمدەرىن تىكەلەي سايلاۋ تەتىگى جانە تاعى باسقا دا وزگەرىستەر ەنگىزىلدى. ەلىمىزدە «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» فورمۋلاسىنا سايكەس ساياسي جاڭعىرتۋ جۇزەگە اسۋدا», دەدى ءلاززات قالتاەۆا.
كريستيان گوركە ءوز كەزەگىندە ەكى ەلدىڭ ىنتىماقتاستىعىن ودان ءارى نىعايتۋدىڭ ماڭىزىنا توقتالدى جانە مەملەكەتتەر اراسىنداعى ديپلوماتيالىق قاتىناستار ورناعان ساتتەن باستاپ 30 جىل ىشىندە قازاقستان ءوزىن سەنىمدى ساياسي جانە ەكونوميكالىق ارىپتەس رەتىندە كورسەتكەنىن اتاپ ءوتتى.
