پارتيالىق باقىلاۋ كوميتەتىنىڭ (پبك) توراعاسى, پارلامەنت ماجىلىسىندەگى «AMANAT» فراكتسياسىنىڭ مۇشەسى ارتۋر پلاتونوۆ حالىقتىڭ بەلسەندى اتسالىسۋىنىڭ ارقاسىندا وڭىرلىك 216 سايلاۋالدى باعدارلاما تالقىلانىپ, قابىلدانعانىن اتاپ ءوتتى. وندا ازاماتتاردىڭ 17 مىڭنان استام ۇسىنىسى ەسكەرىلدى.
«وزگەرىستەر جولى: ءار ازاماتقا لايىقتى ءومىر!» دەپ اتالاتىن پارتيالىق باعدارلامانىڭ باسىمدىعى – قازاقستاندىقتاردىڭ ءومىر ءسۇرۋ ساپاسىن ارتتىرۋ, الەۋمەتتىك ادىلەتتىلىكتى قامتاماسىز ەتۋ, ەسەپ بەرەتىن جانە حالىق ۇنىنە قۇلاق اساتىن مەملەكەت قۇرۋ. باعدارلامانى ىسكە اسىرۋعا بارلىعى 21 ترلن تەڭگە تارتۋ جوسپارلانعان. ونىڭ قارجىلىق جانە ادامي رەسۋرستارمەن قامتاماسىز ەتىلگەن بيىك ماقساتى, بايىپتى باعدارى بار», دەدى ارتۋر پلاتونوۆ.
بۇگىندە سايلاۋالدى باعدارلامانى ىسكە اسىرۋ شەڭبەرىندە ەل اۋماعىندا 90 مەكتەپ پايدالانۋعا بەرىلدى. سونىمەن قاتار 259 بالاباقشا اشىلىپ, 180 كوللەدجدە جاڭعىرتۋ جۇمىسى جۇرگىزىلدى. بۇعان قوسا, 11,7 ملن شارشى مەتر تۇرعىن ءۇي (100 مىڭعا جۋىق باسپانا) سالىنىپ, 500 مىڭعا جۋىق جۇمىس ورنى قۇرىلدى.
بۇل رەتتە, جۋىردا مەملەكەت باسشىسى قاسىم-جومارت توقاەۆ ۇكىمەتتىڭ كەڭەيتىلگەن وتىرىسىندا بيىلعى 11 ايدا ەكونوميكا ءوسىمى 4,6%-دان 2,7%-عا دەيىن باياۋلاعانىن, ال ينفلياتسيا سوڭعى 14 جىلدا بولماعان دەڭگەيگە جەتىپ, 19,6%-دى قۇراعانىن مالىمدەدى. ەل ەكونوميكاسىنداعى وسىنداي جاعىمسىز جاعداي پارتيانىڭ سايلاۋالدى باعدارلاماسىن ىسكە اسىرۋ ساپاسىنا تىكەلەي اسەر ەتەدى.
ۇلتتىق ەكونوميكا ءمينيسترى الىبەك قۋانتىروۆتىڭ ايتۋىنشا, بيىل تۇرعىزىلادى دەپ جوسپارلانعان 18 ملن شارشى مەتر تۇرعىن ءۇيدىڭ جىل سوڭىنا دەيىن 15,1 ملن شارشى مەترى نەمەسە 137,7 مىڭ باسپانا سالىنادى.
«شامامەن 3 ملن شارشى مەتردى سالىپ ۇلگەرە الماي جاتىرمىز. بۇعان جۇمىس كەستەسىنەن ارتتا قالۋ, قارجىلاندىرۋدىڭ جەتكىلىكسىزدىگى سەبەپ بولىپ وتىر. الايدا ەڭ باستى كەدەرگى – قۇرىلىس ماتەريالدارىنىڭ قىمباتتاۋى. بەلگىلى ءبىر دەڭگەيدە يمپورتقا تاۋەلدىلىك بولعاندىقتان, ەلگە قۇرىلىس ماتەريالدارىن جەتكىزۋ كەزىندە قيىندىقتار ورىن الدى», دەدى مينيستر.
2022 جىلى اتقارىلعان جۇمىستى قورىتىندىلاي كەلە, ارتۋر پلاتونوۆ بيىل كوميتەت ورتالىق جانە جەرگىلىكتى اتقارۋشى ورگاندارعا 200-دەن استام ناقتى ۇسىنىس بەرگەنىن اتاپ ءوتتى. جەرگىلىكتى جەرلەردە پارتيالىق باقىلاۋ كوميسسيالارىمەن بىرلەسىپ ەڭبەك ۇجىمدارىمەن, تۇرعىندارمەن, قوعام قايراتكەرلەرىمەن جانە تاعى باسقالارمەن 600-دەن استام دوڭگەلەك ۇستەل, 1100-دەن استام كەزدەسۋ, سونداي-اق 5 مىڭنان استام كوشپەلى وتىرىس پەن رەيد وتكىزىلدى.
«ازىق-ت ۇلىك تاۋارلارى, دارىلىك زاتتار جانە جانار-جاعارماي باعاسىنىڭ وزگەرۋىنە باقىلاۋ جۇرگىزۋ بويىنشا 216 مونيتورينگ توبىنىڭ جۇمىسىن ەرەكشە اتاپ وتكىم كەلەدى. بۇل جۇمىس تۇرعىنداردىڭ وڭ باعاسىن الدى. سونداي-اق پارتيالىق باقىلاۋ بەكەتىن قۇرۋ جۇمىسى قولعا الىندى. وڭىرلەردە «AMANAT» پارتياسىنىڭ سايلاۋالدى باعدارلاماسىن ىسكە اسىرۋ شەڭبەرىندە سالىنىپ, جوندەلىپ نەمەسە قايتا جاڭارتىلىپ جاتقان نىسانداردا تامىز ايىنان باستاپ وسىنداي 485 بەكەتتىڭ جۇمىسى ۇيىمداستىرىلدى», دەدى ول.
بيىل پارتيا مۇشەسىنىڭ ادەپ كودەكسىن بۇزعانى ءۇشىن پارتيانىڭ 104 مۇشەسى, ونىڭ ىشىندە قالا جانە اۋدان اكىمدەرى, ولاردىڭ ورىنباسارلارى, ورتالىق جانە جەرگىلىكتى مەملەكەتتىك ورگانداردىڭ دەپارتامەنت جانە باسقارما باسشىلارى, ءتۇرلى دەڭگەيدەگى ءماسليحاتتاردىڭ 22 دەپۋتاتى جاۋاپكەرشىلىككە تارتىلدى.
