مەكتەپ جاسىنان سپورتقا ەتەنە جاقىن بولعان دينا ءتۇرلى جارىستاردا ەل نامىسىن ابىرويلى قورعاپ, قازىرگى كەزدە قالىڭ قازاق جانكۇيەرلەرىنىڭ قوشەمەتىنە بولەنىپ ءجۇر. سولاردىڭ اراسىنداعى ەڭ ەلەۋلىسى – 2019 جىلى اقش-تىڭ گاۆاي شتاتىنداعى كايلۋا-كونا قالاسىندا ترياتلوننان اۋەسقويلار اراسىندا وتكەن الەم چەمپيوناتىنا («Ironman») قاتىسۋى. سپورتتىق بۇل تۇرىندە اتالعان جارىستا جۇلدەگەرلەر ساناتىنان كورىنۋ بىلاي تۇرسىن, جولداما الۋدىڭ ءوزى وڭاي شارۋا ەمەس. وسى جايتتىڭ وزىنەن-اق كەيىپكەرىمىزدىڭ قانداي اۋىر سىناقتاردان وتكەنىن اڭعارتسا كەرەك.
دينا شايمەردەنوۆانىڭ باسقا دا اۋىز تولتىرىپ ايتارلىقتاي تابىستارى از ەمەس. بيىلعى جىلدىڭ وزىندە عانا ول ءباا-دە ۇيىمداستىرىلعان «Ironman 70.3 Dubai» دوداسىندا كۇمىس مەدالدى يەلەنسە, ازەربايجاندا تۇساۋى كەسىلگەن «IronWind 70.3» تۋرنيرىندە باس جۇلدەنى ولجالادى. سونىمەن قاتار ەلوردادا جالاۋى جەلبىرەگەن «IRONMAN 70.3 Astana» جارىسىنىڭ ءابسوليۋتتى سايىسىندا ءۇشىنشى ورىنعا تابان تىرەدى. ال تاياۋدا عانا دينا اقش-تىڭ يۋتا شتاتىنداعى سەنت-دجوردج قالاسىندا جالاۋى جەلبىرگەن الەم چەمپيوناتىندا («Ironman 70.3») قولا مەدالدى موينىندا جارقىراتتى. تورتكۇل دۇنيەنىڭ مىقتىلار جينالعان جارىستا بۇعان دەيىن اتاقتى ۆەلوشاباندوز, وليمپيا ويىندارىنىڭ جەڭىمپازى الەكساندر ۆينوكۋروۆ قانا جەڭىس تۇعىرىنا كوتەرىلگەن ەدى. وسىلايشا, شايمەردەنوۆا ءوز ەسىمىن وسىنداي دارەجەگە جەتكەن قازاقستاننىڭ تۇڭعىش ترياتلونشى قىزى رەتىندە سپورتتىق شەجىرەگە تىركەدى.
نەگىزى دينا كاسىپقوي سپورتشى ەمەس. ونىڭ ەكى جوعارى ءبىلىمى بار. ءسوز ورايى كەلگەندە, 2021 جىلى شايمەردەنوۆانىڭ «ەرەن ەڭبەگى ءۇشىن» مەدالىمەن ماراپاتتالعانىن ايتا كەتكەن ابزال. ول قارجى سالاسى بويىنشا باسشىلىق قىزمەتتەر اتقارا ءجۇرىپ, سپورتتى دا سەرىك ەتۋدە. ال ترياتلونعا دەن قويعانىنا بار-جوعى جەتى جىلداي عانا ۋاقىت بولدى. سوعان قاراماستان, دينا سايانقىزى حالىقارالىق ارەنادا ءوزىنىڭ مىقتىلىعىن مويىنداتىپ ۇلگەردى. مىنە, «تەكتىدەن تەكتى تۋادى» دەپ وسىنداي دا ايتىلسا كەرەك.
دينا ءوزىنىڭ ءار سوزىندە اكەسى سايان شايمەردەنوۆتىڭ ونىڭ جۇرەگىنە بالا كەزىنەن سپورت پەن سالاماتتى ءومىر سالتىنا دەگەن سۇيىسپەنشىلىكتىڭ دىڭگەگىن قالاپ كەتكەنىن ايتادى. ءيا, بۇل ەسىم جانكۇيەرلەرگە جاقسى تانىس. كەزىندە سىرمىنەز ساياننىڭ ونەرىنە سۇيسىنبەگەن جانكۇيەر جوق-اۋ, ءسارى! كوگالداعى حوككەيدىڭ حاس شەبەرى بولعان ول الماتىنىڭ داڭقتى «ديناموسىنىڭ» نامىسىن ابىرويلى قورعاپ, سەگىز دۇركىن كسرو چەمپيونى اتاندى, ەكى رەت كۇمىسكە قول سوزدى. ەۋروپا چەمپيوندارى كۋبوگىن يەلەنىپ, باسقا دا اسا بايراقتى باسەكەلەردە جەڭىس تۇعىرىنا كوتەرىلدى. وتكەن عاسىردىڭ جەتپىسىنشى جانە سەكسەنىنشى جىلدارى كەڭەس وداعىنىڭ ەڭ مىقتى ويىنشىلارىنىڭ ءبىرى ءارى بىرەگەيى بولعان سايان سافۋان ۇلىنىڭ «حالىقارالىق دارەجەدەگى سپورت شەبەرى» دەگەن اتاعى بار. كەيىننەن باپكەرلىككە دەن قويىپ, قازاقستان رەسپۋبليكاسىنىڭ ەڭبەك سىڭىرگەن جاتتىقتىرۋشىسى جانە ەلىمىزدىڭ كوگالداعى حوككەي فەدەراتسياسىنىڭ پرەزيدەنتى قىزمەتتەرىن اتقاردى. سونىمەن قاتار دينانىڭ ءوسىپ-ءونىپ, ەل ەرتەڭىن ويلايتىن ازاماتشا بولىپ قالىپتاسۋىنا اتاسى – حالىق جازۋشىسى, قازاقستاننىڭ مەملەكەتتىك سىيلىعىنىڭ لاۋرەاتى, «وتان» وردەنىنىڭ يەگەرى سافۋان شايمەردەنوۆ تە ماڭىزدى ءرول اتقاردى.
اتاسىنىڭ قازاق ادەبيەتىندەگى جانە اكەسىنىڭ وتاندىق سپورتتاعى جەتىستىكتەرى دينانى اركەز جارقىن جەڭىستەرگە جەتەلەپ, ۇنەمى شابىتتاندىرىپ وتىرادى.
«اسىل اتامنىڭ ءجۇرىپ وتكەن جولىنا قاراپ, مەن ادالدىق پەن ادىلدىك, ىزگىلىك پەن جاناشىرلىق, جاۋاپكەرشىلىك جانە تاعى باسقا كوپتەگەن ادامي قاسيەتتەردى بويىما ءسىڭىردىم. الدىما بيىك ماقسات قويىپ, سوعان جەتۋ ءۇشىن تىنباي ەڭبەك ەتۋدى ۇيرەندىم. وتانىمدى, ەلىم مەن جەرىمدى ءسۇيۋدىڭ ماڭىزدىلىعىن تەرەڭ ۇعىندىم. اتام مەن اكەمنىڭ ومىرلىك قاعيداتتارى مەن ۇستانعان پرينتسيپتەرى بۇل كۇندەرى ماعان جۇمىستا دا, سپورتتا دا كوپ كومەك بەرۋدە», دەيدى دينا.
جۋىردا عانا اقش-تىڭ يۋتا شتاتىنداعى سەنت-دجوردج قالاسىندا وتكەن الەم چەمپيوناتىنداعى («Ironman 70.3») ءوزىنىڭ جارقىن جەڭىسىن دينا سايانقىزى اتاسى, حالىق جازۋشىسى سافۋن شايمەردەنوۆتىڭ 100 جىلدىق مەرەيتويىنا ارنادى.
