رەسپۋبليكالىق كەزەڭدەگى زياتكەرلىك سايىسقا وبلىستىق تۋرنيرلەردىڭ جەڭىمپازى اتانعان 100-دەن استام وقۋشى قاتىسقانىن ايتا كەتەيىك. ءىس-شارا قازاقستاننىڭ تاۋەلسىزدىك كۇنىنە وراي ۇيىمداستىرىلدى.
قازاق, ورىس جانە اعىلشىن ليگالارى بويىنشا ءبىرىنشى ورىندى جانە وقۋ-اعارتۋ مينيسترلىگىنىڭ كۋبوگىن پاۆلودار جانە اقتوبە وبلىستارىنىڭ كوماندالارى جەڭىپ الدى. ۇزدىك سپيكەرلەر ورالعازى اقنيەت (سەمەي ق.), ءمۇرزادىلوۆا ارۋحان (استانا ق.), ابدۋساماتوۆا سەۆينچ (تۇركىستان وبلىسى) اتاندى.
وقۋ-اعارتۋ ءمينيسترى جەڭىمپازداردى قۇتتىقتاپ, مينيسترلىك الداعى ۋاقىتتا دا وقۋشىلار اراسىندا دەبات قوزعالىسىن ناسيحاتتاۋ جۇمىسىن جالعاستىرا بەرەتىنىن اتاپ ءوتتى.
«مەن ستۋدەنتتىك كەزىمدە دەباتتارعا بەلسەنە قاتىستىم. سوندىقتان دەباتتاردىڭ كوپتەگەن ماڭىزدى قۇزىرەت پەن داعدىنى ۇيرەتەتىنىن بىلەمىن. پىكىرتالاسقا دايىندالعان كەزدە سەن كەز كەلگەن ماسەلەگە ادەتتەگىدەي تەك ءبىر جاعىنان عانا ەمەس, سونىمەن بىرگە سىني تۇرعىدان قاراۋدى, جاعىمدى جانە جاعىمسىز جاقتارىن كورۋدى ۇيرەنەسىڭ. بارلىق دۇرىس جانە كەمشىن تۇسىن ولشەيسىڭ. بۇل وتە ماڭىزدى. قازىر بالالار گادجەتتەردى ءجيى پايدالانادى, بۇل رەتتە وقۋشىلارىمىز ءوز ۇستانىمدارىن دالەلدەي ءبىلىپ, سىني تۇرعىدان ويلاۋى, توپتا جۇمىس ىستەي ءبىلۋى ماڭىزدى. بارلىق قاتىسۋشىنى جەتىستىكتەرىمەن قۇتتىقتاپ, جاڭا جەڭىستەر تىلەگىم كەلەدى. سىزدەرمەن بىرگە دەبات قوزعالىسىن دامىتۋدى جالعاستىرامىز», دەپ ايتتى اسحات ايماعامبەتوۆ.
بۇگىنگى تاڭدا قازاقستاندىق مەكتەپتەردە دەبات قوزعالىسى بەلسەندى دامىپ كەلە جاتقانىن ايتا كەتەيىك. جالپى رەسپۋبليكا بويىنشا دەبات كلۋبتارىنىڭ سانى 6 مىڭنان اسادى. ولارعا 100 مىڭنان استام وقۋشى بارادى.
قازاقستاندا جىل سايىن 20 مىڭنان استام دەبات ءتۋرنيرى وتكىزىلەدى, وعان ونداعان مىڭ ستۋدەنت پەن وقۋشى قاتىسادى. ەلىمىزدە وقۋشىلاردى پىكىرسايىس ونەرىنە باۋليتىن 100-دەن استام ادامنان قۇرالعان تاجىريبەلى ۇلتتىق پىكىرسايىسشىلار پۋلى قالىپتاستى. سونىمەن قاتار كوللەدجدەر مەن مەكتەپتەردە دەبات كلۋبتارىنا كومەكتەسۋ ءۇشىن ستۋدەنتتىك دەسانتتار قۇرىلىپ جاتىر.
