سەبەپ دەيسىز بە؟ سەبەبى مەملەكەتتىك ءتىلدى قولداۋ ماقساتىندا قىرۋار قارجى ءبولىنىپ اتقارىلعان جۇمىستىڭ تاعى دا قازاقتىلدى كورەرمەن سۇرانىسىنان الشاق جاتۋى. وعان كينوتەاترلارداعى 16 جەلتوقسانعا تۇزىلگەن فيلم كەستەسىنە كوز جۇگىرتىپ وتسەڭىز دە جەتكىلىكتى. الىسقا بارماي-اق, ەلىمىزدىڭ باس قالاسى – استاناداعى كينوتەاترلار كەستەسىنە ۇڭىلسەڭىز, «اۆاتار: سۋ جولى» ءفيلمىنىڭ تاۋەلسىزدىك كۇنى كورسەتىلەتىن سەانسىنىڭ 72-ءسى ورىس تىلىندە ۇسىنىلسا, تەك 2-ءۋى عانا قازاقتىلدى كورەرمەننىڭ قالاۋىنا ىڭعايلاستىرىلىپتى.
ونىڭ وزىندە بىرەۋى ستاندارتتى بيلەت باعاسىنا ساي بولسا, ەكىنشىسى VIP زالدا, ياعني 20 مىڭ تەڭگە تولەپ كىرۋگە جاعدايى بارلارعا ارنالعان. قاراپايىم حالىقتىڭ بۇگىنگى قىمباتشىلىق قوس بۇيىردەن قىسىپ تۇرعان قيىن كەزەڭدە قالتاسىنان 20 مىڭىن كيىپ, كينو كورۋگە بارا قويۋى ەكىتالاي. كۇرمەۋگە كەلمەس قىسقا ءجىپ ءبارىبىر قالاۋىنان الشاق.
دەمەك قازاق ءتىلدى كورەرمەننىڭ جاڭا تۋىندىنى كۇنىنە ءبىر-اق ۋاقىتتا عانا كورۋگە مۇمكىندىگى بار. ال ونىڭ بارلىعىنا بىردەي ىڭعايلى بولۋى تاعى قيسىنعا كەلمەيتىن جايت. تاڭداۋى تار حالىق امال جوق قالاۋىنان تىس ورىس ءتىلدى كورسەتىلىمگە بارۋعا ءماجبۇر. سەبەبى دەمالىسقا ىڭعايلى ۋاقىتتىڭ بارلىعىن رەسمي ءتىلدى سەانستار جاۋلاعان. بۇل تۋرالى ءوزىنىڭ الەۋمەتتىك جەلىدەگى پاراقشاسىندا بەلگىلى جۋرناليست كامشات تاسبولات بىلاي دەپ اشىنا جازىپتى: «تاۋەلسىزدىك كۇنى, 16 جەلتوقساندا استاناداعى كينوتەاترلاردا «اۆاتار» ءفيلمىنىڭ قازاقشا نۇسقاسى – 2 رەت, اعىلشىنشاسى – 1 رەت, ال ورىسشاسى – 72 رەت كورسەتىلەدى ەكەن. ەگەر كاسسا ءۇشىن ءبىرىنشى اپتا قاتتى ماڭىزدى بولسا, ەكى رەتتىك كورسەتىلىممەن قالاي ءتىلدى قولدايمىز؟ تىلدىك نورمالاردى كينوتەاترلاردا تىم بولماسا 50/50 دەڭگەيىنە جەتكىزىڭدەرشى دەپ سۇراۋدىڭ ءوزى كۇلكىلى».
اتالعان ماسەلەنى كينوتەاتر وكىلدەرىنە دە توتەسىنەن قويىپ كورىپ ەدىك, قازاق ءتىلدى كورسەتىلىمدەرگە ادامنىڭ از كەلەتىندىگىن, كوپ جاعدايدا 4-5 كورەرمەن ءۇشىن تۇتاس ءبىر زال قىزمەت ەتەتىندىگىن العا تارتادى. ال كينوتەاتر جەكەمەنشىك كاسىپ بولعاندىقتان, شىعىنىن اقتامايتىن كورسەتىلىمدەرگە سونشا ۋاقىت ءبولۋدىڭ قيسىنسىز ەكەندىگىن جەتكىزدى. بۇل پىكىردى جۋرناليست-بلوگەر بەللا ورىنبەت تە قۋاتتادى. ول ءوزىنىڭ Facebook پاراقشاسىندا: «اۆاتارداعى» نا ۆي حالقى ايتپاقشى, جاتقان تاستىڭ استىنا سۋ بارمايدى. سوندىقتان كورسەتىلىمنىڭ قازاقشا نۇسقاسىنا بارىنشا كوبىمىز بارۋىمىز كەرەك. قازاقشاعا سۇرانىس كوپ بولسا, «سىيلاسقاننىڭ سۋىن ءىش» دەپ كينوتەاتر دا ءبارىن كورەرمەنگە ساي ىڭعايلاستىرادى. كينوپروكاتتا ءبىرىنشى اپتا اسا ماڭىزدى, ونىڭ ناتيجەسىنە قاراپ ەكىنشى اپتانىڭ كەستەسىن جاسايدى. ءبىرىنشى اپتادا ءبارىمىز – وتباسى, بالا-شاعا, كورشى-قولاڭ, اۋىل ايماق بولىپ «اۆاتار» ءفيلمىنىڭ قازاقشا سەانستارىنا تويعا بارعانداي جاپپاي اعىلىپ بارايىق! كينوتەاترلارعا الدىن الا تەلەفون شالىپ, نا ۆي ءتارىزدى ءبارىن انا تىلىمىزدە سۇراپ, قازاقشا دۋبلياجى نەشەدە, قاي زالدا ەكەنىن انىقتاپ, جوق بولسا قوسۋىن تالاپ ەتىپ, تىنىم بەرمەي دابىلداتايىق. ايتپەسە, قازاق دۋبلياجى سۋعا كەتكەندەي تال قارمايدى» دەپ ۇندەۋ تاستايدى.
ەگەر ماسەلەنىڭ بايىبىنا بارىپ, سارالار بولساق, شىنىمەن دە ەكى تاراپتىڭ دا ءۋاجى ورىندى. سۇرانىس بولسا, ۇسىنىستىڭ دا مىندەتتى تۇردە بولارى انىق. ويتكەنى بۇل قازاقتىلدى كورسەتىلىمگە قاتىستى تۋىنداپ تۇرعان العاشقى جاعداي ەمەس. بۇعان دەيىن دە جارىققا شىققان اۋدارما فيلمدەردىڭ ماڭايىنان دا اتالعان شۋ اينالىپ وتكەن جوق. ءار پرەمەرا سايىن قىزۋ تالقىعا ءتۇسىپ جاتادى. كينوتەاترعا ءجيى باراتىن كورەرمەننىڭ ءبىرى رەتىندە بىزدە دە اراسىندا قازاقتىلدى زال مەن ورىس ءتىلدى زالدى سالىستىرىپ كورۋگە مۇمكىندىك تۋىپ تۇرادى. سونداعى بايقاعانىمىز – قازاقتىلدى كورەرمەندەردىڭ كوپشىلىگىنىڭ, وكىنىشكە قاراي, قازاقشا اۋدارمانىڭ ساپاسىنا كۇمانمەن قاراپ, ورىسشا سەانستاردىڭ سۇرانىسىن ارتتىراتىندىعى. ورىسشا نۇسقاسىنىڭ كورىگىن قىزدىرىپ, زالدى لىق تولتىراتىن كورەرمەن ورتاسىنان شىعىپ, قازاق ءتىلدى زالعا كىرە قالساڭ شىنىمەن دە ات شاپتىرىم زالدا قاداۋ-قاداۋ ادامنىڭ باسى قىلتيعانىن كورىپ كوڭىلىڭ سۋ سەپكەندەي باسىلادى. دەمەك بارلىعى وزىمىزگە بايلانىستى. قىرۋار كۇش پەن قارجى جۇمسالىپ اتقارىلعان اۋقىمدى جۇمىستى بارلىعىمىز بىردەي قولداپ, ناسيحاتتاماساق, مەملەكەتتىك ءتىلدىڭ وگەي كۇي كەشكەنى كەشكەن. مەملەكەتتىك ءتىلدىڭ مارتەبەسىن كوتەرىپ, جالاۋىن تەك بيىكتە جەلبىرەتۋ ءھام سۇرانىس اياسىن ارتتىرۋ ارقايسىمىزدىڭ ءوزىمىز بەن وتانعا دەگەن ماحابباتىمىزعا تىكەلەي تاۋەلدى ەكەنى ءسوزسىز. ەندەشە قازاقشا كورسەتىلىمنەن قالمايىق!
