ماجارستاندا تەگىن وقۋ كونكۋرسىنا قاتىسۋ ءۇشىن قۇجات قابىلداۋ بيىلعى 12 جەلتوقساندا باستالىپ, 2023 جىلعى 18 قاڭتارعا دەيىن جالعاسادى. وتىنىمدەر Egov.kz ەلەكتروندى ۇكىمەت پورتالى ارقىلى جانە «حالىقارالىق باعدارلامالار ورتالىعى» اق-دا قابىلدانادى.
«بيىل ۇكىمەتارالىق كەلىسىمدەر شەڭبەرىندە بولىنگەن گرانتتار بويىنشا كونكۋرستىق ىرىكتەۋدىڭ ەرەجەلەرى جەتىلدىرىلدى. حالىقارالىق باعدارلامالار ورتالىعىنىڭ باستاماسىمەن كونكۋرستىق ىرىكتەۋدە اۋىلدىق جەرلەردەن ۇمىتكەرلەر ءۇشىن ارتىقشىلىقتار ەنگىزىلدى. سونىمەن بىرگە ۇكىمەتارالىق گرانتتاردىڭ تۇلەكتەرى ءۇشىن ەڭبەكپەن وتەۋ مەرزىمى ءۇش جىلدان ءبىر جىلعا دەيىن قىسقارتىلدى», دەپ حابارلادى «حالىقارالىق باعدارلامالار ورتالىعى» اق باسقارما توراعاسى ءانۋار جانعوزين.
«Stipendium Hungaricum» ستيپەنديالىق باعدارلاماسى قازاقستاندىقتارعا كەلەسى باعدارلامالار بويىنشا 250 گرانت ۇسىنىپ وتىر: باكالاۆريات – 110 ورىن; ماگيستراتۋرا – 90 ورىن; باكالاۆريات ماگيستراتۋرا – 30 ورىن; دوكتورانتۋرا – 20 ورىن.
گرانت ماجار ءتىلى كۋرستارىنان ءوتۋ, اكادەميالىق وقۋ, جاتاقحانادا تۇرۋ, مەديتسينالىق ساقتاندىرۋ شىعىندارىن وتەيدى, سونداي-اق ستۋدەنتتەرگە اي سايىنعى ستيپەنديا تولەنەدى.
وقۋ اعىلشىن جانە ماجار تىلدەرىندە وتەدى. ماجار ءتىلىن بىلمەيتىن قازاقستاندىقتار ءۇشىن تەگىن تىلدىك دايىندىقتان ءوتۋ مۇمكىندىگى قاراستىرىلعان.
كونكۋرسقا قاتىسۋ ءۇشىن نەگىزگى كريتەريلەر: باكالاۆر دارەجەسىن الۋعا ۇمىتكەرلەر ءۇشىن – اتتەستات ورتاشا بالىنىڭ نەمەسە نەگىزگى ورتا ءبىلىمى تۋرالى كۋالىكتىڭ جانە اعىمداعى وقۋ جىلى بويىنشا اعىمداعى ۇلگەرىمى تۋرالى تابەل/ترانسكريپتتىڭ نەمەسە ارنايى ورتا ءبىلىمى تۋرالى ديپلوم ورتاشا بالىنىڭ 5.0-تەن 4.0 بالىنا سايكەستىگى; ماگيستر دارەجەسىن الۋعا ۇمىتكەرلەر ءۇشىن – باكالاۆر/مامان/ديپلومى نەمەسە اعىمداعى ۇلگەرىمى تۋرالى تارانسكريپتىڭ ورتاشا بالىنىڭ 4.0-تەن 3.0 بالىنا سايكەستىگى; دوكتور دارەجەسىن الۋعا ۇمىتكەرلەر ءۇشىن – ماگيستر ديپلومى نەمەسە اعىمداعى ۇلگەرىمى تۋرالى تابەل/ترانسكريپتىڭ ورتاشا بالىنىڭ 4.0-تەن 3.0 بالىنا سايكەستىگى; اعىلشىن تىلىندە وقۋ ءۇشىن كەمىندە IELTS 9.0-دان 5.5, TOEFL 120-دان 46 دەڭگەيدەگى قولدانىستاعى سەرتيفيكاتتار بولۋعا ءتيىس.
ەسكە سالا كەتەيىك, جىل سايىن ۇكىمەتارالىق گرانتتار اياسىندا وتانداستارىمىزعا ەۋروپا مەن ازيانىڭ ۇزدىك جوو-لارىندا باكالاۆريات, ماگيستراتۋرا جانە دوكتورانتۋرا باعدارلامالارى بويىنشا تەگىن وقۋعا 500-گە جۋىق گرانت ۇسىنىلادى.
