..ماسەلە كوتەرەدى
ەل دامۋى حالىق سانىنا بايلانىستى
كەز كەلگەن مەملەكەتتىڭ ىشكى-سىرتقى دامۋى حالىق سانىنىڭ وسىمىمەن تىكەلەي بايلانىستى. قازاقستان الەمدەگى حالىق ەڭ از ورنالاسقان ەلدەردىڭ ءبىرى سانالادى. قازىر ەلىمىزدەگى ءبىر شارشى شاقىرىم جەردە تۇراتىندار سانى ورتا ەسەپپەن سەگىز ادامنان اينالادى ەكەن. ەندەشە ءبىزدىڭ ەل ءۇشىن دەموگرافيالىق وسىمدە ۇلكەن گەوساياسي ءمان بار. تاۋەلسىزدىك جىلدارىنداعى حالقىمىزدىڭ تابيعي ءوسىمى توقمەيىلسۋگە نەگىز بولا الماسا كەرەك. وسى سەبەپتى انالار مەن بالالارعا قامقورلىق جاساۋ, جاردەماقى تۇجىرىمداماسىن قايتا قاراۋ كۇن تارتىبىنەن تۇسپەيتىن ماسەلەگە اينالۋعا ءتيىس.
تاعى دا قايتالاپ ايتايىق, حالىقتىڭ تابيعي ءوسىمىن ارتتىرۋدىڭ جولى بىرەۋ – ول بالا تۋدى كوبەيتۋ جانە سول ءۇشىن مەملەكەت تاراپىنان انالارعا بارىنشا قولداۋ كورسەتىپ, جەڭىلدىكتەر جاساۋ. الەۋمەتتانۋشى جاندوس تىلەۋكيننىڭ ايتۋىنشا, ءبىز – انا مەن بالاعا تولىققاندى جاعداي جاساي الماي وتىرعان ەلمىز. قازاقستاندا «انا كاپيتالى», «بالا كاپيتالى» دەگەن مەملەكەتتىك باعدارلامالاردى وتىز جىل بويى ەنگىزە الماي كەلەمىز. مىسالى, كورشى رەسەيدە ەكىنشى بالانى ومىرگە اكەلگەن انالاردىڭ ۇكىمەتتەن الاتىن بىررەتتىك «انا كاپيتالى» 470 241 رۋبلگە دەيىن ءوستى. بۇعان قوسا, رەسەيدە ءۇشىنشى بالانى دۇنيەگە اكەلگەن انالارعا 10 سوتىق جەر بەرۋ, اۋىل شارۋاشىلىعى بيزنەسىمەن اينالىسۋعا جاعداي تۋعىزۋ سياقتى جەڭىلدىكتەر قاراستىرىلعان.
جاپونيا, كورەيا, گەرمانيا دا «انا مەن بالا كاپيتالىن» بىلتىرعى كوكتەمنەن باستاپ ايتارلىقتاي وسىرگەن. ماسەلەن, جاپونياداعى جۇكتىلىك, بالانى دۇنيەگە اكەلۋ جانە بالا كۇتىمىنە بايلانىستى تولەنەتىن بىررەتتىك جاردەماقى مولشەرى 420 مىڭ يەندى (4078 دوللار) قۇرايدى ەكەن. بۇل قارجى مەديتسينالىق ساقتاندىرۋ ەسەبىنەن جانە ايەلدىڭ جۇمىس ىستەۋ-ىستەمەۋىنە بايلانىسسىز بەرىلەتىن كورىنەدى. جۇكتىلىك كەزىندەگى دەمالىستا ايەلدەرگە ايلىق جالاقىسىنىڭ ۇشتەن ەكىسى مولشەرىندە جاردەماقى تولەنەتىنى تاعى بار.
«نەگىزىندە, ۇكىمەت جاعداي جاسايمىن دەسە, انالارعا كوپ نارسە جاساۋعا بولادى. ول ءۇشىن وسى سالانى ۇيلەستىرىپ وتىرعان ەڭبەك جانە حالىقتى الەۋمەتتىك قورعاۋ مينيسترلىگى ساۋاتتى باعدارلامالار, پارمەنى مىقتى زاڭدار ۇسىنا ءبىلۋى كەرەك», دەيدى الەۋمەتتانۋشى جاندوس تىلەۋكين. ءبىزدىڭ دە بۇل ۇستانىمعا قوسىپ-الارىمىز جوق.
ءابدىسابىر ومەش ۇلى,
بالالار حيرۋرگى, پروفەسسور
الماتى
...جاڭالىعىن جەتكىزەدى
ۇزدىك كىتاپحاناشىلار انىقتالدى
ساعي جيەنباەۆ اتىنداعى اقتوبە وبلىستىق جاسوسپىرىمدەر كىتاپحاناسىندا «ىمىرتتاعى كىتاپحانا» الەۋمەتتىك-مادەني ءىس-شاراسى اياسىندا «بيبليوstar» كىتاپحاناشىلار اراسىنداعى كاسىبي-شىعارماشىلىق بايقاۋىنىڭ ەكىنشى كەزەڭى مەن قورىتىندىسى شىعارىلدى. بايقاۋدىڭ ماقساتى: كىتاپحاناشى مامانداردىڭ ءيميدجىن كوتەرۋ; كىتاپحاناشىلاردىڭ شىعارماشىلىق قابىلەتىن دامىتا وتىرىپ, سوڭعى ۇلگىدەگى تەحنولوگيالاردى پايدالانۋعا ۇيرەتۋ; كىتاپحاناشى مامانداردىڭ كاسىبي ءبىلىمىنىڭ تولىعۋىنا جول اشۋ.
بايقاۋ تالاپتارى مەن شارتتارى بويىنشا قاتىسۋشىلار ماماندىعىن ناسيحاتتاپ, بەلگىلى ءبىر كىتاپتاعى وزدەرىنە ۇناعان كەيىپكەرلەردىڭ وبرازىن سومدادى. سونداي-اق ءان شىرقاپ, پوەزيالىق شىعارمالاردان ۇزىندىلەر وقىدى. بولاشاق كىتاپحاناشى ماماندار كەلگەن قوناقتار مەن وقىرمان قاۋىمدى سەرگىتۋ ماقساتىندا ۆيكتورينالار ۇيىمداستىردى. كىتاپحانا قىزمەتكەرى گۇلنۇر ەرگەنقىزى مادەنيەت جانە ونەر سالاسى ۇيىمدارى مەن قىزمەتكەرلەرىنىڭ اراسىندا وتەتىن «رۋحاني قازىنا – 2022» رەسپۋبليكالىق فەستيۆالىنە ۇسىنىلعان «كولەڭكەلى قويىلىم» جوباسىنان شەبەرلىك-ساباعىن وتكىزدى. شىعارمانى كولەڭكەلەۋ ارقىلى وقىرمانعا ۇسىنىلاتىن جوبانىڭ جاسالۋ جولى مەن دايىن بەينەروليكتەرىن تانىستىردى.
كەش سوڭىندا ۇزدىكتەر انىقتالدى. باس جۇلدەنى تەمىر اۋداندىق ورتالىقتاندىرىلعان كىتاپحانا جۇيەسىنە قاراستى قوپا اۋىلدىق مودەلدى كىتاپحاناسىنىڭ كىتاپحاناشىسى مارجان يبرايىموۆا يەلەندى. حرومتاۋ اۋداندىق كىتاپحاناسىنىڭ كىتاپحاناشىسى اقجارقىن جاقانوۆا 1 دارەجەلى ديپلوممەن, ويىل اۋداندىق ورتالىقتاندىرىلعان كىتاپحاناسىنىڭ كىتاپحاناشىسى انار ماۋلەنوۆا 2 دارەجەلى ديپلوممەن, ال سارىجار اۋىلدىق كىتاپحاناسىنىڭ كىتاپحاناشىسى اقبوبەك ساعي 3 دارەجەلى ديپلوممەن ماراپاتتالدى. ء«سابيت بايمولودين اتىنداعى ارنايى جۇلدە» مۇعالجار اۋدانىنداعى بۇلاقتى اۋىلدىق كىتاپحاناسىنىڭ كىتاپحاناشىسى ءاليا جۇلماعامبەتوۆاعا, «ساعي جيەنباەۆ اتىنداعى ارنايى جۇلدە» كەڭكياق اۋىلدىق مودەلدى كىتاپحاناسىنىڭ كىتاپحاناشىسى پەريزات ابيەۆاعا تاپسىرىلدى.
لاۋرا سۇلتانبەكوۆا,
ساعي جيەنباەۆ اتىنداعى وبلىستىق جاسوسپىرىمدەر كىتاپحاناسىنىڭ كىتاپحاناشىسى
اقتوبە
...ريزاشىلىعىن بىلدىرەدى
ءومىردى ەڭبەك اجارلايدى
مەن – رەسپۋبليكالىق «Egemen Qazaqstan», وبلىستىق «اق جول», قالالىق «جامبىل-تاراز», ارداگەرلەردىڭ «ارداگەر ايناسى» جانە «عۇمىر-داريا» گازەتتەرىنىڭ تۇراقتى وقىرمانىمىن. بۇل باسىلىمداردى دەر كەزىندە وقىپ وتىرۋ تىكەلەي پوشتا بولىمشەلەرىنىڭ ۇيىمداستىرۋ قىزمەتىنە بايلانىستى.
وسىعان وراي قالامىزداعى 7-شاعىن اۋداندا ورنالاسقان №19 پوشتا بولىمشەسىنىڭ جۇمىسىن اتاپ وتكەندى ءجون كوردىم. بايلانىس سالاسىندا 40 جىلدان بەرى جەمىستى ەڭبەك ەتىپ كەلە جاتقان «ۇزدىك بايلانىسشى» توسبەلگىسىنىڭ يەگەرى گۇلنار ماقاشەۆانىڭ باسشىلىعىمەن جاۋاپكەرشىلىگى مول, سىرت كوزگە ونشا كورىنە بەرمەيتىن تىنىمسىز شارۋالار جۇيەلى تۇردە اتقارىلىپ كەلەدى.
ماسەلەن, ءاليا تورەگەلديەۆا, ورازگۇل يسمايىلوۆا, ايسۇلۋ تورەبەكوۆا سىندى وپەراتورلار پوشتاعا كەلگەن كليەنتتەردى جارقىن جۇزدەرىمەن, جىلى سوزدەرىمەن قارسى الىپ, تۇسكى ءۇزىلىسسىز كۇنى بويى حالىققا قالتقىسىز قىزمەت كورسەتۋدىڭ ارقاسىندا كەلۋشىلەردىڭ ءاردايىم العىسىنا بولەنىپ ءجۇر.
سونداي-اق ءار كۇن سايىن تاڭمەن تالاسا تۇرىپ, كۇنى بويى تىنىم تاپپايتىن حات تاسۋشىلاردىڭ ەڭبەكتەرى دە اتاپ وتۋگە تۇرارلىق. ەرلى-زايىپتى بەردالى-ءاليا شيرانوۆتار, باعداگۇل جانسۇگىروۆا, گالينا لازارەنكو, ساندۋعاش قۇدايبەرگەنوۆا, ەسقارا ۇسىپباەۆ, بازارباي حودجاباەۆ ەسىمدى حات تاسۋشىلار گازەت-جۋرنالدار مەن حات-حابارلاردى يەلەرىنە ۋاقتىلى جەتكىزىپ وتىرادى. سونىمەن قاتار ءتۇرلى مەكەمەلەر مەن ۇيىمداردىڭ رەسمي قۇجاتتارى مەن جەدەلحاتتارىن, سالەم-ساۋقاتتارىن كەشىكتىرمەي جەتكىزۋ دە وڭاي شارۋا ەمەس. مەن «جانسايا» شاعىن اۋدانىنىڭ تۇرعىنى رەتىندە جازىلعان گازەتتەرىمدى ۇزبەي الىپ تۇرامىن. وسى ورايدا ءوز جۇمىسىنا ۇقىپتى ءارى جاۋاپكەرشىلىكپەن قارايتىن حات تاسۋشىمىز بەردالى شيرانوۆقا ريزاشىلىعىم شەكسىز.
ء«ومىردى ەڭبەك اجارلايدى» دەپ دانا حالقىمىز ايتقانداي, جۇمىسىن قاباق شىتپاي ادال اتقاراتىن جارقىن ءجۇزدى جانداردى وزگەلەرگە ۇلگى ەتسەك, ارتىقتىق ەتە قويماس.
الدابەردى مەڭلىباي ۇلى,
قالالىق ارداگەرلەر كەڭەسىنىڭ مۇشەسى
تاراز
