العا ادىمداۋدىڭ ايقىن العىشارتى
وبلىس ورتالىعىندا «بىرلىك-ەدينستۆو.kz» حالىقارالىق جاستار فورۋمى بولىپ ءوتتى. بيىل ءتورتىنشى رەت ۇيىمداستىرىلعان «شەكارالىق ىنتىماقتاستىق جاستار فورۋمىنا» كورشىلەس رەسەي وبلىستارىنان, سونداي-اق, وڭتۇستىك كورەيا, پولشا, بەلارۋستەن كەلگەن جاستار, ەتنوستىق بىرلەستىك وكىلدەرى جينالدى. شاراعا قازاقستان حالقى اسسامبلەياسى توراعاسىنىڭ ورىنباسارى ەرالى توعجانوۆ, وبلىس اكىمى قانات بوزىمباەۆ قاتىستى.
بۇل فورۋم شەكارالىق وڭىرلەردە تۇراتىن ەكى ەلدىڭ جاستارى اراسىنداعى ءوزارا تۇسىنىستىككە ىقپال ەتەرى ءسوزسىز. جاستار ۇيىمدارى باعدارلامالارىن ىسكە اسىرۋ بويىنشا ءىس-شارالار ءبىر-بىرلەرىمەن تاجىريبە الماسۋعا مۇمكىندىك بەرەتىن تۇراقتى ۇنقاتىسۋ الاڭىنا اينالدى. ال, جالپى, «رەسەي وڭىرلەرىمەن ىنتىماقتاستىقتى نىعايتۋ» بارىسىنداعى «قازاقستان حالقى اسسامبلەياسىنىڭ» قىزمەتى تۋرالى قحا توراعاسىنىڭ ورىنباسارى ەرالى توعجانوۆ ايتىپ بەردى.
– سىزدەر, جاستار, ەلدەگى وڭ وزگەرىستىڭ قوزعاۋشى كۇشى بولاسىزدار, – دەدى فورۋم قاتىسۋشىلارىنا وبلىس اكىمى قانات بوزىمباەۆ. – جاس جىگىتتەر مەن قىزدار ءبىلىم الۋدا مەملەكەتتىڭ بارىنشا قولداۋىنا يە. مىڭداعان قازاقستاندىق جاستار «بولاشاق» پرەزيدەنتتىك باعدارلاماسى بويىنشا الەمدەگى ۇزدىك وقۋ ورىندارىندا ءبىلىم الدى, بۇگىندە ولار ەل يگىلىگى ءۇشىن قىزمەت ەتىپ جاتىر. جالپى, ءبىزدىڭ وبلىستا مەملەكەتتىك گرانت بويىنشا 6 مىڭ ستۋدەنت ءبىلىم الۋدا. كوپتەگەن ۇزدىك ستۋدەنتتەر وبلىس اكىمىنىڭ شاكىرتاقىسىن الادى. جەرگىلىكتى جەردە ۇكىمەتتىك ەمەس جاستار ۇيىمدارىمەن تىعىز جۇمىس جۇرگىزىلەدى. وڭىردەگى اسسامبلەيا جانىنان 15 ەتنوستىق جاستار بىرلەستىكتەرى قۇرىلعان.
مىسالى, ايمان ابدىكارىم نوۆوسىبىردەگى «وتان» قازاق مادەنيەتى ورتالىعىنىڭ وكىلى, ونىڭ ايتۋىنشا, بۇگىندە ول جاقتا 12 مىڭنان اسا قازاق تۇرادى ەكەن. ۇلتىمىزدىڭ ءداستۇرىن ساقتايمىز, انا تىلىمىزدە سويلەيمىز, دەيدى ول. وبلىستىق اسسامبلەيا جانىنداعى جاستار ءبىرلەستىگى كەڭەسىنىڭ باسقارۋشىسى ەلينا ءپاۋليدىڭ ايتۋىنشا, 2011 جىلى وبلىس ورتالىعىندا وبلىستىق ەتنومادەني بىرلەستىكتەردىڭ جاستار قۇرىلىمى ەلىمىزدەگى اسسامبلەيانىڭ جاستار بىرلەستىگى ۇيلەستىرۋ كەڭەسىنىڭ باستاماسىمەن العاشقى رەت شەكارالىق وڭىرلەردىڭ «بىرلىك – ەدينستۆو.kz» فورۋمىنىڭ جوباسىن وتكىزدى. فورۋمدا جاستار الەۋمەتتىك يننوۆاتسيالىق باستامالارىنىڭ كورمە-جارمەڭكەسى, «ءححى عاسىردىڭ جاستارى: ۋاقىت جانە ءوزى تۋرالى ديالوگ» پلەنارلىق ءماجىلىسى جانە زاماناۋي جاستار ساياساتىن دامىتۋدىڭ كوكەيكەستى ماسەلەلەرى ايتىلدى. وسىدان ەكى جىل بۇرىن ەكى مەملەكەت باسشىلارىنىڭ قاتىسۋىمەن قازاقستان جانە رەسەي وڭىرارالىق ىنتىماقتاستىعىنىڭ ءىح فورۋمىن وتكىزۋ قارساڭىندا «بىرلىك – ەدينستۆو.kz» شەكارالاس ىنتىماقتاستىقتىڭ ەكىنشى جاستار ەتنومادەني فورۋمى ۇيىمداستىرىلدى. وتكەن جىلى شەكارالاس ىنتىماقتاستىقتىڭ ءۇشىنشى حالىقارالىق جاستار فورۋمى وبلىستاعى «چەرنويارسكايا جەمچۋجينا» دەمالىس ايماعىندا كيىز ۇيلەر ەتنوقالاشىعىندا جالعاستى.
مىسالى, ومبىدا وقىپ جۇرگەن پاۆلودارلىق ماكسيم سپوتكاي قازاقستاندىق جاستارمەن بىرلەسىپ, ستۋدەنتتەر كلۋبى, قازاق تىلىندە «زامانداس» گازەتىن شىعارۋدا. نوۆوسىبىردەگى بەلارۋس مادەني ورتالىعىنىڭ جەتەكشىسى اناستاسيا ترۋبەنكوۆانىڭ ايتۋىنشا, ولار قازاقستاندىق جاستارمەن ءجيى كەزدەسۋلەر وتكىزەدى. قازاقستاندىق اسسامبلەيا بىزدەر ءۇشىن ۇلگى, دەيدى ول.
سونىمەن قاتار, حالىقارالىق جاستار فورۋمى اياسىندا «دوستىق» ءۇيىندە قازاقستان حالقى اسسامبلەياسى ءتوراعاسىنىڭ ورىنباسارى, حاتشىلىق مەڭگەرۋشىسى ەرالى توعجانوۆ جەرگىلىكتى ەتنومادەني بىرلەستىكتەردىڭ مۇشەلەرىمەن كەزدەستى. جيىن بارىسىندا ەكى ەل اراسىنداعى مادەنيەتارالىق ۇنقاتىسۋدى دامىتۋ, جاستار اراسىندا تاجىريبە الماسۋعا جول اشۋ, ءوزارا كەلىسىم مەن ىنتىماقتاستىقتى نىعايتۋ, قازاقستان حالقى اسسامبلەياسىنىڭ ءححى سەسسياسىندا ايتىلعان ماقسات-مىندەتتەردى ورىنداۋ جايى باياندالدى. ال «بىرلىك – ەدينستۆو.kz.» اتتى شەكارالىق ىنتىماقتاستىقتىڭ جاستار ەتنومادەني فورۋمىنىڭ دا ماقساتى – كورشىلەس وڭىرلەر اراسىندا جاستاردىڭ مادەني, رۋحاني بايلانىسىن ورناتۋ. ولار مۇنى ءوزارا ارىپتەستىك تۋراسىنداعى سۇحباتتار ارقىلى «بولاشاقتى بىرگە قالايمىز» اتتى اۆتوموتوكروسس, فلەشموب سىندى شارالار ۇيىمداستىرىپ كورسەتتى.
فورۋم «ەكى ەل جاستارى: بولاشاققا كوزقاراس», «سان-الۋاندىلىقتاعى ءبىرلىك» اتتى باعدارلامالارمەن جالعاستى. سۇلتانماحمۇت تورايعىروۆ اتىنداعى وبلىستىق كىتاپحانادا قازاق تىلىندە سويلەيتىن, ءان سالاتىن وزگە ۇلت وكىلدەرىنىڭ جاستارى كەزدەسۋلەر وتكىزدى. جاستار جوعارى وقۋ ورىندارىندا قازاق تىلىندەگى وقۋلىقتاردىڭ سانىن كوبەيتۋ كەرەك دەگەن ۇسىنىس ايتتى. فورۋم سوڭىندا كوڭىلدى كونتسەرت, ويىن-ساۋىق باعدارلامالارى كورسەتىلدى.
فاريدا بىقاي,
«ەگەمەن قازاقستان».
پاۆلودار وبلىسى.
سۋرەتتى تۇسىرگەن
ۆالەري بۋگاەۆ.
