مەملەكەتتىك سىيلىق مەملەكەت مەرەيىن وسىرگەندەرگە بەرىلۋى ءتيىس

ونەردىڭ, ادەبيەتتىڭ, مادەنيەتتىڭ حاس تارلاندارى قوعامنىڭ ماقتانىشىنا اينالىپ جاتادى. مۇنداي تۇلعالارعا لايىقتى باعا بەرىپ, مارتەبەسىن كوتەرىپ وتىرۋ – مەملەكەتتىڭ مىندەتى. مىنە, وسىعان وراي كەشە الماتىداعى پرەزيدەنت رەزيدەنتسياسىندا مەملەكەتتىك حاتشى ادىلبەك جاقسىبەكوۆتىڭ توراعالىعىمەن ادەبيەت جانە ونەر سالاسىنداعى قازاقستان رەسپۋبليكاسىنىڭ مەملەكەتتىك سىيلىعىن بەرۋ جونىندەگى كوميسسيانىڭ وتىرىسى ءوتتى. – وتاندىق مادەنيەت جان-جاقتى دامىپ جاتقانى بەلگىلى. ەلباسى بۇل سالاعا ارقاشان قولداۋ كورسەتۋدە. ادەبيەت پەن ونەر سالاسىنداعى مەملەكەتتىك سىيلىق وسىعان دالەل. بيىل كوميسسيا قاراۋىنا كوپتەگەن تۋىندى ءتۇستى. كونكۋرسقا قاتىسۋشىلار ەلگە تانىمال ادامدار. بىراق, مەملەكەت­تىك سىيلىق ءۇش اتالىمدا بەرىلەدى. سوندىقتان, كوميسسيا ۇزدىك ەڭبەكتى تاڭداۋى قاجەت. تاڭداۋ بارىسىندا تاۋەل­سىز­دىكتى جانە ەل دامۋىن ناسيحات­تايتىن ەڭبەكتەرگە نازار اۋ­دارىلۋى كەرەك. بۇل – ءبارىمىز­گە ۇلكەن جاۋاپكەرشىلىك. وتى­رىستا شىعارمالاردى جان-جاقتى تالقىلاپ, ءادىل باعاسىن بەرەيىك, – دەگەن مەملەكەتتىك حاتشى كوميسسيا قاراۋىنداعى ەڭبەكتەردى سارالاۋ جاۋاپتى ادامدارعا ۇلكەن مىندەتتەر جۇكتەيتىنىن اتاپ ءوتتى. ول سونداي-اق, قازاقستان رەسپۋبليكاسىنىڭ مەم­لەكەتتىك سىيلىعىن بەرۋ ءجو­نىندەگى كوميسسيانىڭ قۇرا­مىن­دا وزگەرىستەر بولىپ, جاڭا مۇشە­لەرمەن تولىققانىن جەتكىزدى. وتىرىس بارىسىندا كوميسسيا مۇشەلەرىنە 2014 جىلعى ادەبيەت پەن ونەر سالاسىنداعى مەملەكەتتىك سىيلىقتى الۋ ءۇشىن ۇسىنىلعان جۇمىستار, ولاردىڭ تىركەلۋى, قارالۋى جانە العاشقى ساراپتامادان ءوتۋى تۋرالى اقپارات بەرىلدى. بۇدان كەيىن ەڭبەكتەردى تالقىلاۋ مەن جاسىرىن داۋىس بەرۋ پروتسەسى ادەبيەت, مۋزى­كا, تەاتر جانە كينو, بەينەلەۋ ونەرى مەن ساۋلەت سىندى ءۇش سەكتسيا بويىنشا جالعاستى. تال­قىلاۋلاردىڭ, جاسىرىن داۋىس بەرۋ­لەردىڭ, ودان كەيىنگى جالپى وتى­رىستىڭ قورىتىندىسى بويىن­شا بايقاۋدىڭ كەلەسى كەزەڭىنە ءجى­بەرىلەتىن شىعارمالار تۋرالى شەشىم قابىلداندى. – مەملەكەتتىك سىيلىق ادەبيەت پەن ونەر سالاسىنداعى جاڭا­شىل ەڭبەكتەردىڭ قاتارىنا جاتقى­زىلعان, قوعام تاراپىنان مويىن­دالعان, حالىقتىڭ مادەني-رۋحاني مۇراسىنا اينالعان تۋىندىلار ءۇشىن بەرىلۋى ءتيىس. مەملەكەتتىك سىيلىق تۋرالى شەشىم پرە­زيدەنتتىڭ جارلىعىمەن بەكىتىلەدى. سىيلىقتى پرەزيدەنتتىڭ ءوزى تابىستايتىن بولادى. بۇل لاۋرەات­تارعا دەگەن ۇلكەن قۇرمەتتىڭ بەلگىسى, – دەپ اتاپ ءوتتى ادىلبەك جاقسىبەكوۆ. قالىپتاسقان ەرەجەگە ساي ىرىكتەۋدەن ءوتىپ, كەلەسى كەزەڭگە جولداما العان جۇمىستار ءتىزىمى قوعامدا كەڭىنەن تالقىلانۋ ءۇشىن «ەگەمەن قازاقستان» جانە «كا­زاحستانسكايا پراۆدا» گازەت­تەرىندە جاريالاناتىنى ءمالىم بولدى. كەشە مەملەكەتتىك حاتشىنىڭ الماتىداعى ءىسساپارى ش.ايمانوۆ اتىنداعى «قازاقفيلم» كينوستۋدياسىندا جالعاستى.ادىلبەك جاقسىبەكوۆ وندا ءبۇ­گىندە ءتۇسى­رىلىمنىڭ باسىنان باس­تاپ ەكرانعا شىعۋعا دەيىنگى ارالىق­تاعى كينووندىرىستىڭ تولىق تسيك­لىن ءجۇ­زەگە اسىرۋعا مۇمكىندىك تۋعى­زاتىن جاڭارتىلعان ساندىق جانە ءتۇسىرۋ كەشەنىن, انيماتسيالىق ستۋ­ديانى, باسقا دا نىسانداردى ارالاپ كوردى. سونداي-اق, ۇلتتىق كينو­ستۋدياداعى ەلىمىزدىڭ جەتەكشى كينوگەرلەرىمەن كەزدەسۋى اياسىندا كينو سالاسىنىڭ اعىمداعى جاي-كۇيى, «قازاقفيلمنىڭ» جا­ڭا جوبالارى مەن وتاندىق كينە­ما­توگرافيانىڭ كەلەشەگى تۋرالى پىكىر الماستى. ايناش ەسالي, «ەگەمەن قازاقستان». الماتى. سۋرەتتى تۇسىرگەن يۋري بەككەر.