– سۇرانىسقا يە ينجەنەرلىك كادرلاردى دايارلاۋدا قانداي ادىستەمەلەرگە سۇيەنەسىزدەر؟
– حح عاسىردا ادامزات بالاسى تۇسىنىكتى دە وڭاي بولجام جاساۋعا بولاتىن زاڭدىلىقتارمەن ءومىر ءسۇردى. ول زاماندا ناقتى مودەلدەر, ايقىن سحەمالار, تۇراقتى باعدارلار بولدى. ءححى عاسىر باستالىسىمەن ورنىقتىلىقتى تۇراقسىزدىق, بولجامدىلىقتى بەلگىسىزدىك, قاراپايىمدىلىقتى كۇردەلىلىك, انىقتىقتى دۇدامالدىلىق الماستىردى. تەحنولوگيالىق جانە اقپاراتتىق-كوممۋنيكاتسيالىق دامۋداعى كۇرت سەرپىلىس قوعامدىق قۇرىلىستى ترانسفورماتسيالاۋدى ودان ءارى جالعاستىرۋ ۇستىندە. «ۇزدىك تاجىريبە دە كەشە بولعان» دەگەن ءسوز قازىرگى الەمنىڭ وزگەرمەلىلىگىن ءدال بىلدىرەدى.
بەلگىسىزدىكتىڭ, كۇردەلىلىكتىڭ جانە ەكىۇدايلىقتىڭ ارتۋى وزگە دە الەۋمەتتىك-ەكونوميكالىق قۇرىلىمدار سياقتى, ءبىلىم ۇيىمدارىنىڭ دا عىلىمي ماسەلەلەردى, الەۋمەتتىك مىندەتتەردى زامان سۇرانىسىنا ساي شەشۋى كەرەك ەكەنىن ايقىنداپ بەردى. جاڭا جاعداي ۋنيۆەرسيتەتتەردەن «بەلسەندى ءبىلىمى», «ارەكەت ءبىلىمى» بار, عىلىمي, ينجەنەرلىك-كونسترۋكتورلىق, تەحنولوگيالىق جۇمىستى ورىنداي الاتىن, باسەكەلەستىككە قابىلەتتى مامانداردى دايارلاۋدى تالاپ ەتەدى. سوندىقتان, تەك ءبىر باعىتتا جۇرمەيتىن, قۇبىلمالى جانە مازاسىز الەمدە ءومىر سۇرۋلەرىنە تۋرا كەلەتىن مامانداردى دايارلاۋدى جوسپارلاپ وتىرعان ۋنيۆەرسيتەتتەر ءۇشىن بىلىمگە پراكتيكالىق تۇرعىدان باعىتتالعان ءتاسىل باستاپقى نەگىز بولۋى مۇمكىن.
ەلىمىزدىڭ شىعىسىندا ورنالاسقان تەحنيكالىق ۋنيۆەرسيتەت كومانداسى ينجەنەرلىك كادرلاردى دايارلاۋدى قالاي پايىمدايتىنىن ءتۇسىندىرىپ وتسەم دەيمىن.
ينجەنەرلىك ءبىلىم ەلدىڭ ەكونوميكالىق الەۋەتىن قالىپتاستىرادى. ەندەشە, ءبىلىم ساپاسىنىڭ ارتۋى ەكونوميكا مەن ءوندىرىستىڭ جەدەل دە قارقىندى وزگەرۋىن قامتاماسىز ەتەدى. ۋنيۆەرسيتەتتەن قانات قاعىپ ۇشقان تۇلەك ەرتەڭگى كۇنگە, تەحنولوگيالىق جانە وندىرىستىك ۇردىستەرگە ىقپال ەتىپ, ەلدىڭ دامۋىنا ۇلەس قوساتىنىنا سەنىممەن قاراۋعا ءتيىس. جوعارى وقۋ ورنىنىڭ ۇمتىلىسى, جوسپارى مەن مىندەتتەرى دە وسى ماقساتتاردى كوزدەۋى شارت. شقتۋ – بۇل مىندەتتەرگە قول جەتكىزۋى ءۇشىن اۋەلى ۋنيۆەرسيتەتتىڭ ءوزى دامۋى كەرەكتىگىن تۇسىنەتىن, الەۋمەتتىك اكادەميالىق قوعامداستىقتىڭ جەتىستىكتەرىنە باعىت ۇستاعان وقۋ ورنى. بۇل قوعامداستىقتىڭ مۇشەسى بولۋ – كۇردەلى, بىراق جۇزەگە اسىرۋعا تۇرارلىق ءىس.
قازىر شقتۋ – ورتالىق ازياداعى حالىقارالىق ستاندارتتار مەن CDIO (Conceive-Design-Implement-Operate/ويلاپ تابۋ-ازىرلەۋ-ەنگىزۋ-باسقارۋ) باستاماسى نەگىزىندە ينجەنەرلىك ءبىلىم بەرۋ تۇجىرىمداماسىن ىسكە اسىراتىن جالعىز ۋنيۆەرسيتەت. باستامانىڭ ماقساتى – قازىرگى قۇبىلمالى جاعدايلاردا (VUCA الەمى جانە Bani الەمى دەپ اتالاتىن) كۇردەلى وبەكتىلەردى, پروتسەستەر مەن جۇيەلەردى جوسپارلاۋعا, جوبالاۋعا, وندىرۋگە جانە قولدانۋعا قابىلەتتى تۇلەكتەردى دايارلاۋ. CDIO جوباسىنا قاتىسۋشىلار – ءبىلىم بەرۋدەگى تەوريا مەن پراكتيكا اراسىنداعى قايشىلىقتاردى جويۋ ارقىلى ينجەنەرلىك ءبىلىم بەرۋدى جەتىلدىرۋ تۇجىرىمداماسىن ەنگىزەتىن ءىرى حالىقارالىق ءبىلىم بەرۋ جوباسى. ءبىزدىڭ ۋنيۆەرسيتەت ۇلىبريتانيا, اقش, اۋستراليانىڭ تەحنيكالىق ۋنيۆەرسيتەتتەرىنىڭ قاتارىنا قوسىلىپ, وسى جاھاندىق باستامانىڭ ءبىر بولىگىنە اينالدى.
بۇل جوبا CDIO ستاندارتتارىنا سايكەس ءبىلىم بەرۋ پروتسەسىن جاڭارتۋعا مۇمكىندىك بەردى: بارلىق ەلەمەنت قۇزىرەتتىلىك جانە تەحنولوگيالار ترانسفەرى ورتالىقتارى ارقىلى ستۋدەنتتەردىڭ ينجەنەرلىك بىلىكتىلىگىن, پراكتيكالىق ءبىلىمى مەن زەرتتەۋ داعدىلارىن قالىپتاستىرۋعا باعىتتالعان.
CDIO-عا قاتىسۋشىلاردىڭ باستاماسىن قولداۋ, بىرىنشىدەن, شىعىس قازاقستاننىڭ جەتەكشى كاسىپورىندارى – «ماشزاۆود» جشس, «قازمينەرالس اقتوعاي» جشس, ء«ۇلبى مەتاللۋرگيا زاۋىتى» اق, «كازتسينك» جشس, «وسكەمەن وندىرىستىك ارماتۋرا زاۋىتى» اق جانە باسقالارمەن تىعىز سەرىكتەستىك بايلانىس ورناتۋعا مۇمكىندىك بەردى. ەكىنشىدەن, ينجەنەرلىك كادر دايارلاۋدىڭ 60 جىلدىق تاجىريبەسى بىزگە قازاقستاننىڭ بارلىق جوعارى وقۋ ورنى پايدالانا الاتىن «وزىق ينجەنەرلىك ءبىلىم بەرۋدىڭ ۇلتتىق مودەلىن» ازىرلەۋشى بولۋعا قۇقىق بەرەدى. وسىلايشا, شەتەلدىك ۇيىمدارمەن جانە جەرگىلىكتى وندىرىسپەن ىنتىماقتاستىقتا جيناقتاعان تاجىريبەمىزدى بۇكىل ورتالىق ازيامەن بولىسە الامىز. ءبىزدىڭ ۋنيۆەرسيتەت بۇل سالادا ءىزاشار بولىپ وتىر.
– شىعىس قازاقستاننىڭ «قازاقستان يندۋسترياسىنىڭ جۇرەگى» اتانۋىنا ۇيىتقى بولىپ وتىرعان ءىرى كاسىپورىنداردى اتادىڭىز. ءسىز باسقارىپ وتىرعان جوعارى وقۋ ورنى ولارمەن قالاي بايلانىس ورناتىپ وتىر؟
– البەتتە, ۋنيۆەرسيتەت وبلىس كاسىپورىندارىمەن, بيزنەس وكىلدەرىمەن وتە ۇزاق, تىعىز جانە ءونىمدى بايلانىس ورناتىپ وتىر. ارىپتەستەر ءبىلىم بەرۋ باعدارلامالارىن جاڭعىرتۋعا بەلسەندى قاتىسىپ, وقۋ پروتسەسىن جۇرگىزۋ ءۇشىن ءوز رەسۋرستارى مەن ءوندىرىس الاڭدارىن ۇسىنادى, باعدارلامالاردىڭ تاجىريبەگە نەگىزدەلۋىن كۇشەيتەدى. ستۋدەنتتەر ء«ۇلبى مەتاللۋرگيا زاۋىتى», «كەمونت», «قازاقتەلەكوم» اكتسيونەرلىك قوعامدارىندا, «وسكەمەن جەو», وسكەمەن كوندەنساتور زاۋىتىندا, «كازتسينك», «قازاقمىس» كورپوراتسياسىندا, «باقىرشىق تاۋ-كەن ءوندىرۋ كاسىپورنىندا» جانە باسقالارىندا تاجىريبەدەن وتەدى; وقۋ باعدارلاماسىنىڭ ءبىر بولىگى ولاردىڭ تسەحتارى, زەرتحانالارى مەن بولىمدەرىندە ىسكە اسىرىلادى جانە قوسارلى ءبىلىم بەرۋدى قامتاماسىز ەتەدى.
ينجەنەرلىك كادر دايارلاۋ بويىنشا ىنتىماقتاستىقتان بولەك, اتالعان كاسىپورىندار ءۇشىن عىلىمي تەحنولوگيالاردى گەنەراتسيالاۋدى جۇزەگە اسىرىپ, ءوڭىر مەن ەلدى دامىتۋ ءۇشىن جاڭا فورماتسياداعى كومپانيالاردى قۇرۋ شارتتارىن قالىپتاستىرامىز.
شقتۋ عىلىمدى يندۋستريامەن بىرىكتىرۋدىڭ ءتيىمدى تەتىكتەرىن كورسەتىپ وتىر. ماسەلەن, سەرىكتەستەرمەن ءوزارا ءىس قيمىلدىڭ نەگىزگى فورماتى – كادر دايارلاۋ جانە گەولوگيا, گەولوگيالىق بارلاۋ, مەديتسيناداعى ءادديتيۆتى تەحنولوگيالار, اۋىل شارۋاشىلىعى ءۇشىن جەردى قاشىقتىقتان زوندتاۋ ادىستەرى, كومىرتەك قاۋىپسىزدىگى سىندى باعىتتار بويىنشا RnD جوبالارىن ىسكە اسىرۋ. شقتۋ عالىمدارىنىڭ زەرتتەۋلەرى TRL 7-8 دەڭگەيىنە دەيىن ءوسىپ وتىر. ياعني پروتوتيپتىك ونىمدەردى, تەحنولوگيالاردى جانە ەنگىزۋگە دايىن ادىستەمەلەردى قولدانۋعا دەيىن.
ادەتتە, وڭىرلىك ۋنيۆەرسيتەتتەر ءبىلىم بەرۋ ساپاسىن ارتتىرۋ, جاڭا ءبىلىم بەرۋ تەحنولوگيالارىن دامىتۋ, عىلىمي مەكتەپتەردى قولداۋ شارالارىنا جۇگىنىپ, شەكتەۋلى رەسۋرستار جاعدايىندا ءومىر سۇرۋگە ءماجبۇر. سوعان قاراماستان, ولار كەيبىر كورسەتكىش بويىنشا ەلوردالىق ۋنيۆەرسيتەتتەردەن وزىپ ءجۇر.
ۋنيۆەرسيتەتتىڭ عىلىمي-تەحنيكالىق ينفراقۇرىلىمى قازاقستان ونەركاسىبىنىڭ تەحنولوگيالىق مىندەتتەرىن شەشەتىن 14 قۇزىرەتتىلىك جانە تەحنولوگيالار ترانسفەرى ورتالىعى مەن 53 زەرتحانادان تۇرادى.
جەتەكشى عىلىمي-زەرتتەۋ ينستيتۋتتارىمەن ىنتىماقتاستىق زەرتتەۋ جۇمىستارىنىڭ جوعارى دەڭگەيىن قامتاماسىز ەتىپ, سەرپىندى جوبالاردى ىسكە اسىرۋعا جانە كادر دايارلاۋدى جوعارى دەڭگەيدە جۇزەگە اسىرۋعا مۇمكىندىك بەرەدى. ماسەلەن, اكادەميك ن. د. باتپەنوۆ اتىنداعى ۇلتتىق تراۆماتولوگيا جانە ورتوپەديا عىلىمي ورتالىعىمەن بىرلەسىپ, «دياگنوستيكانىڭ تيىمدىلىگىن ارتتىرۋ, جاراقاتتار, جاراقاتتار سالدارىن, اياق-قول, ومىرتقا جانە جامباس اۋرۋلارىن ەمدەۋ ءۇشىن يننوۆاتسيالىق تەحنولوگيالاردى ازىرلەۋ جانە عىلىمي نەگىزدەۋ» جوباسى جۇزەگە اسىرىلۋ ۇستىندە. ق.ي.ساتباەۆ اتىنداعى گەولوگيا عىلىمدارى ينستيتۋتى «پايدالى قازبالار كەن ورىندارىن انىقتاۋ پەرسپەكتيۆاسى بار قازاقستان قۇرىلىمدارىنىڭ ينۆەستيتسيالىق تارتىمدىلىعىن عىلىمي باعالاۋ» جوبامىزعا قاتىسادى.
شقتۋ تەحنولوگيالىق دامۋ باعدارلاماسىن حالىقارالىق سەرىكتەستەر دە قولدايدى. ولار – كولورادو تاۋ-كەن مەكتەبى, ماسساچۋسەتس تەحنولوگيالىق ينستيتۋتى (اقش), كەرتين ۋنيۆەرسيتەتى (اۋستراليا), ۆروتسلاۆ پوليتەحنيكالىق ۋنيۆەرسيتەتى (پولشا), وبۋدا ۋنيۆەرسيتەتى (ماجارستان), ميفي ۇلتتىق يادرولىق زەرتتەۋ ۋنيۆەرسيتەتى, تومسك پوليتەحنيكالىق ۋنيۆەرسيتەتى (رەسەي) سياقتى 20 شەتەلدىك تەحنولوگيالىق جوعارى وقۋ ورنى.
تاعى ءبىر جاقسى جاڭالىقتى بولىسسەم دەيمىن. بيىل قازان ايىندا ۋنيۆەرسيتەت دۇنيەجۇزىلىك بانكتەن «Smart engineering» قۇزىرەتتىلىك ورتالىعىن قۇرۋ ءۇشىن 422 ميلليون تەڭگە قارجى الدى. جوبا اياسىندا كونسورتسيۋم قۇرىلىپ, وعان شقتۋ-دان بولەك, وتاندىق «مايلى داقىلداردىڭ تاجىريبەلىك شارۋاشىلىعى» جانە «قوستاناي اگرومەحانيكالىق زاۋىتى» سياقتى كومپانيالار قاتىستى. تەحنولوگيالاردى كوممەرتسيالاندىرۋعا مۇمكىندىك بەرەتىن عىلىم مەن بيزنەستىڭ كووپەراتسياسى – ەل دامۋىنىڭ ەڭ سەنىمدى جانە دۇرىس جولى.
باعدارلامالىق-ماقساتتى قارجىلاندىرۋ جوبالارىن جۇزەگە اسىرۋ, 20 گرانتتىق زەرتتەۋ جۇمىسىن ورىنداۋ – ءوڭىر كاسىپورىندارى پروبلەمالارىنىڭ شەشىمى بولماق. ول مىقتى قولدانبالى عىلىمدى قالىپتاستىرىپ, ۋنيۆەرسيتەتتىڭ جالپى بيۋدجەتىندە عىلىمدى قارجىلاندىرۋدىڭ ەلەۋلى ۇلەسىن, ياعني 18 پايىز دەڭگەيىندە قامتاماسىز ەتەدى.
– جەتىستىكتەرىڭىزگە قۋانىشتىمىز. دەگەنمەن, وڭىرلىك ۋنيۆەرسيتەت رەتىندە قانداي قيىندىقتارىڭىز بار؟
– مەن اڭگىمەلەگەن يدەيالار مەن جوبالار وڭىرلىك ۋنيۆەرسيتەتتىڭ بارىنە ءتان قيىندىقتار – كادر رەسۋرسىنىڭ شەكتەۋلىلىگى, جاستاردىڭ ورتالىق قالالارعا كەتۋى جاعدايىندا جۇزەگە اسىرىلىپ جاتىر. جالپى, وڭىرلىك ۋنيۆەرسيتەتتەرگە ءىرى قالالاردىڭ جوو-لارىمەن باسەكەلەسۋ وڭاي ەمەس. تەحنيكالىق ماماندىقتار بويىنشا مەملەكەتتىك ءبىلىم بەرۋ تاپسىرىسى, نەگىزىنەن, الماتى مەن استانانىڭ جوعارى وقۋ ورىندارىنا شوعىرلاندىرىلادى. ال ينجەنەرلىك كادرلاردى دايارلاۋ ءۇشىن تاجىريبەگە باعدارلانعان تەحنيكالىق بازا جانە قازاقستان وڭىرلەرىندەگى وندىرىسپەن تىعىز بايلانىس قاجەت. دەمەك مەملەكەتتىك ءبىلىم بەرۋ تاپسىرىسىنىڭ ەكونوميكا سالالارىنا كادرلار دايارلاۋ مىندەتى ءىشىنارا عانا ورىندالادى.
ەندى ءبىلىم بەرۋ باعىتىن وزگەرتۋ كەرەكتىگىن تۇسىنگەندەيمىز. تارقاتا ايتساق, ەكونوميكا سەكتورلارىن دامىتۋدى تاڭداۋ 18 جاستاعى تالاپكەرلەرگە بايلانىستى بولىپ, ال وڭىرلىك جوعارى وقۋ ورىندارى كونتينگەنت تاپشىلىعىنا ۇشىراپ, وڭىرلەر ءوندىرىسى مەن ونەركاسىبى بىلىكتى كادرلاردىڭ جەتىسپەۋشىلىگىنە تاپ بولىپ وتىرعان قازىرگى كەزدە جاعدايدى وزگەرتۋ قاجەت دەگەن تۇسىنىك پايدا بولدى.
عىلىم جانە جوعارى ءبىلىم ءمينيسترى ساياسات نۇربەكتىڭ: «ۇكىمەت وڭىرلىك جوعارى وقۋ ورىندارىن جاڭعىرتۋعا, ولاردىڭ ءرولىن ارتتىرۋعا باسىمدىق بەرەدى» دەگەنى ءبارىمىزدى قۋانتتى. ءوڭىردىڭ ونەركاسىپ قاجەتتىلىكتەرىنە سايكەس بەلگىلى ءبىر سالالاردا ماماندار دايارلاۋدى رەگلامەنتتەيتىن كاسىپتەردىڭ وڭىرلىك اتلاسى جاڭعىرتۋ قۇرالىنا اينالادى. مۇنداي جاعدايدا جەرگىلىكتى تالاپكەر باسقا قالالار مەن ەلدەردە ءبىلىم الۋعا ۇمتىلماي, ءوز ۋنيۆەرسيتەتىندە ءبىلىم الاتىنىن جانە ءوز ماماندىعى بويىنشا جۇمىسقا ورنالاسۋعا كەپىلدىك بەرىلەتىنىن تۇسىنەدى. ءوڭىر ەكونوميكاسىنىڭ قۇرىلىمىنا سايكەس تەحنيكالىق ماماندىقتار بويىنشا مەملەكەتتىك ءبىلىم بەرۋ تاپسىرىسىن كۆوتالاۋ ەكونوميكا مەن ونەركاسىپتەگى جاڭا تەتىكتەردى قامتاماسىز ەتەدى دەپ ويلايمىز.
– كەيىنگى كەزدە اكادەميالىق ورتادا بارلىق قۇرىلىم مەن ۇيىمنىڭ الەۋمەتتىك جاۋاپكەرشىلىگى ماسەلەسى ءجيى تالقىلانىپ ءجۇر. ۋنيۆەرسيتەت قوعامعا قالاي اسەر ەتە الادى؟ بۇل باعىتتا قانداي باستامالارىڭىز بار؟
– وزدەرىڭىز بىلەسىزدەر, ۋنيۆەرسيتەت ميسسياسى – ءبىلىم جانە عىلىم. ءۇشىنشى ميسسيا – جەرگىلىكتى قوعامنىڭ دامۋىنا قوسقان ۇلەسى. شقتۋ وزىق ءبىلىم بەرۋ باعىتتارى مەن عىلىمي زەرتتەۋلەر جۇرگىزەتىن ورىن عانا ەمەس, الەۋمەتتىك ماڭىزدى مىندەتتەردىڭ شەشىمىن بىرلەسىپ ىزدەيتىن ۇجىمدىق كرەاتيۆتىڭ اشىق الاڭى. ءبىز ۇكىمەتتىڭ كومىرتەكتى بەيتاراپتىققا قول جەتكىزۋ تۋرالى باستاماسىن قولداپ, «اۋماقتى كەشەندى باعالاۋ ارقىلى كومىرتەكتى بەيتاراپتىق» جوباسىن ۇسىنىپ وتىرمىز. عالىمدارىمىز پارنيكتىك گاز كوزدەرىنە تۇگەندەۋ جۇرگىزىپ, اۋماقتاردىڭ ءوزىن ءوزى تازارتۋ قابىلەتى مەن اتموسفەرالىق پروتسەستەرىن ەسكەرە وتىرىپ, ونىڭ الەۋەتىن باعالاۋ ادىستەمەسىن نەگىزدەيدى. ناتيجەسىندە, كومىرتەگى بويىنشا اۋماقتاردىڭ قاراپايىم دا تۇسىنىكتى مودەلى جاسالادى.
تاعى ءبىر ۋاقتىلى جوبا – ەلەكتروندى قالدىقتاردى قايتا وڭدەۋ بويىنشا ستارتاپ. پلاستيكتى ۇساقتاۋ جانە ونى قايتا پايدالانۋ ءۇشىن ەلەكتروندىق پلاتانى تالدايتىن شاعىن جەلى ازىرلەندى. ماتەريالداردى دۇرىس تۇتىنۋ, ۇنەمدەۋ جانە قايتا وڭدەۋ ورنىقتى دامۋ پرينتسيپتەرىن جۇزەگە اسىرۋعا, قورشاعان ورتا رەسۋرستارىن ۇنەمدەۋگە, الەمگە ەكولوگيالىق كوزقاراس مادەنيەتىن قالىپتاستىرۋعا جول اشادى.
بيىل ۋنيۆەرسيتەتتە جاستار كاسىپكەرلىگىن قولداۋ بويىنشا «انگار» جوباسى ىسكە قوسىلدى. «بيونيكالىق قول», «گيدروپونيكالىق جاسىل جەم», «وكپەنى جاساندى جەلدەتۋ اپپاراتى» جوبالارى – قوعام ءومىرىن وزگەرتۋگە باعىتتالعان ستارتاپ ناتيجەلەرى.
سونداي-اق ۋنيۆەرسيتەت Well-being حالىقارالىق تاجىريبەلەرىنە نەگىزدەلگەن عىلىمي جانە ءبىلىم بەرۋ قىزمەتى, بوس ۋاقىت جانە شىعارماشىلىق ءۇشىن بارىنشا قولايلى ورتا قۇرۋعا مۇمكىندىك جاساۋعا ۇمتىلىپ وتىر. «شقتۋ Otbasy – ىرىس-بەرەكە ايماعى «Well-being» جوباسى تابىستى جۇمىس ىستەۋدە. كورپوراتيۆتىك مادەنيەت قاعيداتتارى بويىنشا قولداۋ كورسەتىلەدى. جوبا پرەزيدەنت جانىنداعى مەملەكەتتىك باسقارۋ اكادەمياسىندا وتكەن «Qazaqstan Project Manadgment Awards-2022» فورۋمىندا قازاقستان جوعارى وقۋ ورىندارىنىڭ جوبالارى اراسىندا ۇزدىك دەپ تانىلدى.
ۋنيۆەرسيتەتتە قالىپتاسقان قۇندىلىقتار – ءوزىن ءوزى دامىتۋ, جانعا جايلى ەڭبەك جانە ەموتسيالىق ورتا, كورپوراتيۆتىك بىرلىك, سانالى تۇتىنۋ, سالاماتتى ءومىر سالتى جانە ەڭبەك قۇندىلىقتارى. ستۋدەنتتەردىڭ جايلى جاتاقحانالاردا تۇرىپ, زاماناۋي زەرتحانالاردا ءبىلىم الۋعا, بوس ۋاقىتتارىن كلۋبتار مەن ۇيىرمەلەردە وتكىزۋگە, فيتنەس-زالداردا جانە سپورت الاڭدارىندا سپورتپەن اينالىسۋعا قاجەتتى مۇمكىندىكتەرى بار. پسيحولوگيالىق جەڭىلدىك كابينەتى ۋنيۆەرسيتەت كومانداسىنىڭ كەز كەلگەن مۇشەسى ءۇشىن ارقاشان اشىق. قىزمەتكەرلەر مەن ستۋدەنتتەردىڭ قارجىلىق ساۋاتتىلىعىن, ەموتسيالىق ورنىقتىلىعىن ارتتىرۋعا ارنالعان وقىتۋ سەمينارلارى مەن ترەنينگتەر وتكىزىلەدى. بەلسەندى ۆولونتەرلىك جانە قايىرىمدىلىق قىزمەت ۇجىم مۇشەلەرىنىڭ الەۋمەتتىك جاۋاپكەرشىلىگىن ارتتىرۋعا باعىتتالعان.
شقتۋ-دا جان-جاقتى دامۋ, اشىق قارىم-قاتىناس, ناتيجەلى ىنتىماقتاستىق ءۇشىن قولايلى ورتا قۇرىلىپ, جەتىلدىرىلۋ ۇستىندە. ءبىز جاستاردى, بيزنەستى, يندۋستريانى ءوز ورتامىزعا شاقىرامىز. قازاقستاندى وركەندەتۋ جولىندا ىنتىماقتاستىق ورناتىپ, كۇش-جىگەرىمىزدى بىرىكتىرۋگە ارقاشان دايىنبىز!
– اڭگىمەڭىزگە راحمەت.
اڭگىمەلەسكەن
مەرەي قاينار ۇلى,
«Egemen Qazaqstan»
