الداعى بەيسەنبىدە سەناتورلار «قازاقستان رەسپۋبليكاسىنىڭ ۇكىمەتى مەن وزبەكستان رەسپۋبليكاسىنىڭ ۇكىمەتى اراسىنداعى توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» جانە «قازاقستان رەسپۋبليكاسىنىڭ ۇكiمەتi مەن تۇرىكمەنستاننىڭ ۇكiمەتi اراسىنداعى ازاماتتىق قورعانىس, توتەنشە جاعدايلاردىڭ الدىن الۋ جانە ولاردى جويۋ سالاسىنداعى ىنتىماقتاستىق تۋرالى كەلىسىمدى راتيفيكاتسيالاۋ تۋرالى» زاڭ جوبالارىن قارايدى.
بۇل زاڭ جوبالارىن قابىلداۋ ارقىلى تاراپتاردىڭ قۇزىرەتتى ورگاندارى اراسىنداعى ءوزارا ءىس-قيمىلدى قامتاماسىز ەتۋگە, توتەنشە جاعدايلاردى بولجاۋ سالاسىندا تاجىريبە الماسۋعا جانە تاراپ-مەملەكەتتەردىڭ وقۋ ورىندارىندا ازاماتتىق قورعاۋ سالاسىندا مامان دايارلاۋعا مۇمكىندىك تۋادى. سونداي-اق جاڭا نورمالار توتەنشە جاعدايلاردىڭ الدىن الۋعا, تۋىنداۋىنا, ولاردى جويۋعا قاتىستى اقپارات الماسۋعا جانە سۇراۋ سالۋ بويىنشا تاراپتاردىڭ اۋماعىندا توتەنشە جاعدايلاردى جويۋ كەزىندە كومەك بەرۋگە جول اشادى.
سونىمەن قاتار سەنات دەپۋتاتتارى پالاتا وتىرىسىندا «قازاقستان رەسپۋبليكاسىنىڭ ۇكىمەتى مەن بىرىككەن اراب امىرلىكتەرىنىڭ ۇكىمەتى اراسىنداعى ينۆەستيتسيالاردى كوتەرمەلەۋ جانە ءوزارا قورعاۋ تۋرالى كەلىسىمدى راتيفيكاتسيالاۋ تۋرالى» زاڭ جوباسىن قارايدى. قۇجات ينۆەستيتسيالىق قىزمەتتى جۇزەگە اسىرۋ ءۇشىن ينۆەستورلار قۇقىقتارىنىڭ كەپىلدىكتەرىن بەكىتۋ ارقىلى ىنتىماقتاستىق ارتتىرۋدىڭ قۇقىقتىق نەگىزدەرى قالىپتاستىرۋدى كوزدەيدى. ودان بولەك, زاڭ جوباسىندا ينۆەستيتسيالىق احۋالدى جاقسارتۋعا جانە ەلدەر اراسىنداعى ءوزارا ءتيىمدى ساۋدا-ەكونوميكالىق ىنتىماقتاستىقتى ودان ءارى دامىتۋعا ىقپال ەتەتىن نورمالار بار.
سەنات وتىرىسىنىڭ كۇن تارتىبىنە ەنگىزىلگەن كەلەسى ماسەلە «قازاقستان رەسپۋبليكاسىنىڭ قىلمىستىق-پروتسەستىك كودەكسىنە سوت القابيلەردىڭ قاتىسۋىمەن قارايتىن ىستەر ساناتتارىن كەڭەيتۋ بويىنشا وزگەرىستەر ەنگىزۋ تۋرالى» زاڭ جوباسى. بۇل قۇجات 2024 جىلعى 1 قاڭتاردان باستاپ تاعى 13 قىلمىس قۇرامىن القابيلەرگە بەرۋدى كوزدەيدى.
سونداي-اق بيۋرو وتىرىسىندا ماجىلىستەن كەلىپ تۇسكەن زاڭ جوبالارى سەناتتىڭ تۇراقتى كوميتەتتەرىنە ءبولىنىپ بەرىلدى.
