ء«ادىل جانە ءتيىمدى ەكونوميكالىق ساياسات جۇرگىزىلۋى كەرەك. ەلىمىزدە ءادىل باسەكە ورناپ, بيزنەس ادال جۇمىس ىستەسە, ادىلەتتى نارىقتىق ەكونوميكا قۇرىلادى. ەڭ الدىمەن, وتاندىق كاسىپكەرلەردىڭ سەنىمىن ارتتىرۋ وتە ماڭىزدى. ەكونوميكانى مونوپوليادان ارىلتۋ ءۇشىن مەكەمەارالىق كوميسسيا قۇرىلدى. بۇل كوميسسيا قاجەتتى جۇمىستى ءتيىمدى جۇرگىزىپ جاتىر», دەدى پرەزيدەنت.
سونداي-اق قازىر جەكە مەنشىككە زاڭسىز ءوتىپ كەتكەن اكتيۆتەردى قايتارۋعا باسا ءمان بەرىلىپ وتىر. بىراق, مەملەكەت باسشىسىنىڭ ايتۋىنشا, كەيبىر ماسەلەلەر نازاردان تىس قالىپ بارادى.
«ەكونوميكاعا مەملەكەتتىڭ قاتىسۋىن ازايتۋ, مونوپوليستەردى وزىنە جاناما قاتىسى بار نارىقتىڭ قىزمەتىنە ارالاستىرماۋ – وتە ماڭىزدى جۇمىس. اكىمشىلىك كەدەرگىلەردى ازايتىپ, نارىققا باعا بەلگىلەۋ ارقىلى قىسىم جاساۋدى توقتاتۋ كەرەك», دەدى قاسىم-جومارت توقاەۆ.
پرەزيدەنت باس پروكۋراتۋرانىڭ جانىنان ارنايى قۇرىلعان كوميسسيانىڭ جۇمىسىنا قاتىستى دا پىكىر ءبىلدىردى.
«كوميسسيا زاڭسىز جولمەن الىنعان جانە سىرتقا شىعارىلعان اكتيۆتەردى مەملەكەتكە قايتارۋمەن شۇعىلدانادى. مەن جاقىندا ارنايى جارلىققا قول قويدىم. وسىلايشا, بۇل باعىتتاعى جۇمىستىڭ اياسى ناقتىلاندى. وسى شارۋامەن اينالىساتىن قىزمەتتەر ۇيىمداستىرۋ جانە كادرلىق جاعىنان كۇشەيتىلەدى. جۇمىستىڭ تيىمدىلىگى ارتادى دەپ سەنەمىن», دەدى مەملەكەت باسشىسى.
