«بۇگىندە ءبىر جارىم مىڭ شاقىرىمنان استام جىلۋ جەلىلەرى اۋىستىرۋدى جانە جوندەۋدى قاجەت ەتەدى. ولاردىڭ ورتاشا توزۋى 75 پايىزدان اسادى, ال ارقالىق, ريددەر, شەمونايحا قالالارىندا جەلىلەردىڭ توزىعى جەتكەن. ۇكىمەت بۇل ماسەلەنى ءۇش جىلدىڭ ىشىندە شەشۋى كەرەك. كوميسسيا ەسەبىنە سايكەس, اڭگىمە 528 ملرد تەڭگە تۋرالى بولىپ وتىر. بۇل قاراجات ءتيىستى بيۋدجەتتىك نەسيەلەۋ جانە تاريفتىك ساياسات ارقىلى قامتاماسىز ەتىلۋى ءتيىس», دەدى پرەزيدەنت.
سونىمەن قاتار پرەزيدەنت 5 جىلدان استام ۋاقىتتان بەرى كارىزدىك تازارتۋ قۇرىلىستارىن سالۋ جانە جاڭعىرتۋ ماسەلەسى ءالى كۇنگە دەيىن شەشىمىن تاپپاعانىنا توقتالدى.
«قازىر ءبىز بيۋدجەتتىك قارجىلاندىرۋ مەن نەسيەلەردى تارتۋ تۋرالى ايتىپ جاتىرمىز. جاريالانعان جوسپارلار ەشقاشان ورىندالمادى. ەندى مىنە, ۇكىمەت پەن اكىمدەر ىلەسۋدىڭ ورنىنا جوسپارلاردى تومەن قاراي قايتا قاراپ, 2025 جىلعا دەيىن نەبارى 7 جوبانى جۇزەگە اسىرۋدى جوسپارلاپ وتىر. ال بۇكىل ەل بويىنشا بىزدە 68 پروبلەمالى كارىزدىك تازارتۋ قۇرىلىستارى بار», دەپ اتاپ ءوتتى پرەزيدەنت.
مەملەكەت باسشىسىنىڭ ايتۋىنشا, بۇل ماسەلەنىڭ باستى سەبەبى - تاريف ساياساتىنىڭ دۇرىس جۇرگىزىلمەۋى.
«وسى ساياسات تابيعي مونوپوليا قىزمەتتەرىنىڭ ساپالى ءارى قولجەتىمدى بولۋىن قامتاماسىز ەتۋگە ءتيىس. بۇل قىزمەتتىڭ تەگىن بولمايتىنى تۇسىنىكتى. نىسانداردى كۇتىپ ۇستاۋعا جانە جاڭعىرتۋعا قاجەتتى قاراجات تاريف ەسەبىنەن ءبولىنۋى كەرەك. بيزنەستەن شىعىنعا باتىپ جۇمىس ىستە دەپ تالاپ ەتۋ ورىنسىز. ءار نارسە جونىمەن جاسالۋعا ءتيىس. مەن بۇل تۋرالى جولداۋدا ايتتىم. بىراق ناقتى ءارى ناتيجەلى جۇمىس ءالى اتقارىلماي وتىر», دەپ قوستى ق.توقاەۆ.
جاڭا تاريف ساياساتىنىڭ ەرەجەلەرى بەكىتىلگەن جوق. تاريفتەردى قاراستىرۋ جانە كەلىسۋ ۇدەرىسى جابىق ەسىك جاعدايىندا وتەدى. تابيعي مونوپوليا سۋبەكتىلەرىنىڭ مىندەتتەمەلەردى ورىنداۋ ءتارتىبىن ءتيىستى دەڭگەيدە قاداعالاۋ كەرەك.
