استانا – ەلدىڭ بايتاعى

گۇلزارلارمەن ءورىلىپ, جاسىل جەلەك جامىلعان ەلباسى نۇرسۇلتان نازارباەۆ ءوت­كەن جىلى ەلوردانىڭ 15 جىلدىق مەرەيلى مەرەكەسىنە وراي جاريالانعان «استانا – قازاقستاننىڭ ۇلى ءداۋىرى جانە ستراتەگيالىق ۆەكتورى» اتتى ماقالاسىندا «استانانىڭ وزىندە جاڭا ساياباقتار مەن گۇلزارلار قۇرىلدى, ال كوگالدى الاڭدار كولەمى ميلليونداعان شارشى مەترگە جەتىپ وتىر. بۇتىندەي العاندا, ەلوردا اينالاسىنداعى قولدان وتىرعىزىلعان اعاشتار اۋماعى 65 مىڭ گەكتارعا جەتتى, مۇنىڭ 14 مىڭ گەكتارعا جۋىعى قالانىڭ ءوز ىشىندە بوي كوتەردى. 2020 جىلعا دەيىن, تۇتاستاي العاندا, قالاىشىلىك جانە قالا ماڭىنداعى دالالى اۋماقتاردىڭ 100 مىڭ گەكتارى كوگالداندىرىلاتىن بولادى», دەپ اتاپ كورسەتتى. ءيا, ەسىل وزەنىنىڭ قوس قاپتالىنداعى قاراوتكەل اتتى سورتاڭداۋ جەرگە ورنا­لاسقان ەلوردامىز – استانا قالاسى سارى­ارقانىڭ بەل ورتاسىنداعى وسىنداي جاسىل جەلەك جامىلعان گۇلزار قالا­عا اينالاتىندىعىنا بىرەۋ سەنسە, ەندى بىرەۋدىڭ كۇدىكتەنگەندىگى دە حاق. دەگەنمەن, بۇلتارتپاس اقيقات ايعا­عى بۇگىندە الەمنىڭ وركەنيەتتى قالا­لارىنىڭ بەل ورتاسىنان قىلاڭ بەرگەن استانانىڭ جاسىل قالاعا اينالعاندىعىن پاش ەتەدى. مەملەكەت باسشىسىنىڭ باستاماسىمەن قولدان جاسالعان ورمان القابى كۇننەن-كۇنگە قاناتىن كەڭ جايىپ, سالقىن سامال ەسكەن ساياباققا اينالۋدا. ماسەلەن, تەك وتكەن 2013 جىلى عانا قالامىزدا 32 مىڭنان استام اعاش جانە كوشەتتەر وتىرعىزىلدى. ال اعىمداعى جىلى قالا بويىنشا 16 مىڭ ءتۇپ اعاش وتىرعىزۋ جوسپارلانۋدا. جىل سايىن وتكىزىلەتىن قالالىق سەنبىلىك ەلوردانى اباتتاندىرۋ جانە كوگالداندىرۋ ماقساتىندا اۋقىمدى شارالار جۇزەگە اسىرىلاتىن ناۋقانعا اينالعان. بۇل ءداستۇر بيىلعى جىلى دا ءساتتى جالعاسىن تاپتى. ءساۋىر ايىندا وتكەن بيىلعى جالپىقالالىق سەن­بىلىكتە الماتى اۋدانىنىڭ تۇرعىندارى  –  2779, ەسىل اۋدانىنىڭ تۇرعىندارى  – 1413, ال سارىارقا اۋدانىندا 450 ءتۇپ اعاش وتىرعىزدى. سەنبىلىك بارىسىندا باس قالامىزداعى 59 904 اعاش ءتۇبى اكتەلىپ, اينالاسى تازارتىلدى. سوڭعى كەزەڭدە استانانىڭ گۇلزارلارىن قىزىلدى-جاسىلدى گۇلمەن كومكەرۋ شارالارى كەڭ ءورىس الدى. وسى يگى ءداستۇردى جالعاستىرا وتىرىپ, بيىلعى جىلى قالا بويىنشا 8 ميلليون ءتۇپ ءارتۇرلى گۇلدەر وتىرعىزىلماق. قازىرگى كۇنى «استانا زەلەنستروي» اكتسيونەرلىك قوعامىنىڭ ەڭبەككەرلەرى وسى ءبىر كەشەندى جوبانى جۇزەگە اسىرۋ جولىندا جۇمىلا ەڭبەك ەتۋدە. جوبا بويىنشا استانا قالاسىنداعى جالپى اۋماعى 145 مىڭ شارشى مەتردى قۇرايتىن گۇلزارلارعا 7,9 ميلليون ءتۇپ گۇل وسكىندەرى وتىرعىزىلا باستادى. قالىپتاسقان ءتارتىپ بويىنشا بۇل گۇل القاپتارىن تىڭعىلىقتى باپتاۋ ناتيجەسىندە جاز ايلارىندا قاۋلاي وسكەن القىزىل گۇل شوقتارى قالا جۇرتشىلىعىنىڭ جانە قوناقتاردىڭ كوزايىمىنا اينالادى. سونىمەن قاتار, قالادا بيىل وسىمدىكتەن جاسالىنعان 750 جاساندى ءمۇسىن بوي كوتەرەدى. سونىمەن بىرگە, اعاشتان ورنەكتەلىپ, گۇلمەن كومكەرىلىپ جاسالعان ءارتۇرلى بەينەلەر قالا جۇرتشىلىعىن قۋانتارى ءسوزسىز. قازىر ەلوردادا ساياباقتاردى, گۇلزارلاردى, كوگال الاڭدارىن, سۋ- بۇرقاقتاردى قالپىنا كەلتىرۋ جانە ارلەندىرۋ جۇمىستارى قولعا الىندى. باس قالاداعى ءۇش اۋداننىڭ اكىمدىكتەرى قالاداعى وسىنداي نىساندارعا كوكتەم ايلارىندا ارنايى تەكسەرۋ جۇمىستارىن جۇرگىزىپ, ولاردى جوندەۋ جانە جەتىلدىرۋ جونىندەگى كەشەندى جۇمىستاردى قولعا الدى. الماتى اۋدانىندا «جەرۇيىق», «ستۋدەنتتىك» ساياباقتارىندا, «وتان قورعاۋشىلار» الاڭىندا, ابىلاي حان داڭعىلىنداعى جەلەكتە, اتاتۇرىك ەسكەرتكىشىنىڭ جانىندا, «جاستار» سارايىنىڭ الدىنداعى گۇلباقتا جوندەۋ جانە قالپىنا كەلتىرۋ جۇمىستارى جۇرگىزىلۋدە. قازىرگى ۋاقىتتا جالپى اۋدانى 1 834 شارشى مەتر جەرگە گرانيت پليتالار مەن كەسپە تاستار توسەلدى, 802 كونتەينەر مەن كۇل-قوقىس سالعىش ىدىستار جوندەلدى, 2 212 مەتر كابەل تارتىلدى. ونىڭ ىشىندە 1 330 مەترى كوشەنى جارىقتاندىرۋ جانە 882 مەترى ساياباقتاردى جارىقتاندىرۋعا ارنالعان. سونىمەن بىرگە, بۇگىندە «قازاق ەلى», «وتان قورعاۋشىلار» مونۋمەنتتەرىن, چەرنوبىل اپاتىنا قاتىسۋشىلار مەن «اۋعانستاندا قازا تاپقان ينتەرناتسيوناليست جاۋىنگەرلەرگە ارنالعان» ەسكەرتكىشتەردى قالپىنا كەلتىرۋ جۇمىستارى اياقتالدى. ەسىل اۋدانىندا 5 مەردىگەر ۇيىم كوشەلەردى اباتتاندىرۋ جانە قالپىنا كەلتىرۋ جۇمىستارىمەن اينالىسادى. قالا بويىنشا سۋبۇرقاقتاردىڭ 142 شارشى مەتر گرانيت پليتالارى الماس­تىرىلدى, 3 662 شارشى مەتر كەسپە تاس جابىندىسى جانە ۇزىنا بويى 170 مەتر جولدىڭ شەتى اۋىستىرىلدى. بۇگىنگى تاڭدا كونتەينەرلەر مەن كونتەينەر الاڭدارىن جوندەۋ جانە بوياۋ جۇمىستارىنىڭ 85 پايىزى, «عاشىقتار» ساياباعىندا جانە «اراي» ساياباعىندا, تسيرك جانىنداعى گۇلزاردا, يسلام مادەنيەت ورتالىعىنىڭ جانىندا, «دۋمان» ويىن-ساۋىق ورتالىعىنىڭ ماڭايىندا, «اتامەكەن» – قازاقستان كارتاسى» ەتنو-مەموريالدىق كەشەن­ىن­دە, ديپلوماتيالىق قالاشىقتا, «سە­ۆەرنايا كورونا» تۇرعىن ءۇي كەشەنى جانە باسقا اۋماقتاردىڭ جوندەۋ-قالپىنا كەلتىرۋ جۇمىستارىنىڭ 40 پايىزى ورىندالدى. سارىارقا اۋدانىندا كۇن سايىن حالىق دەمالاتىن قوعامدىق الەۋمەتتىك ماڭىزى بار جەرلەردى قالپىنا كەل­تىرۋ جۇمىستارى جۇرگىزىلۋدە. اتاپ ايت­قاندا, ەسىل وزەنىنىڭ جاعاسىندا, قالالىق الاڭدا جانە كونگرەسس-حولل سارايىنىڭ الدىندا, اباي ەسكەرت­كىشىنىڭ جانىندا, ك.بايسەيىتوۆا اتىنداعى وپەرا جانە بالەت تەاترىنىڭ, م.گوركي اتىنداعى ورىس دراما تەاترىنىڭ, ق.قۋانىشباەۆ اتىنداعى قازاق مۋزىكالىق دراما تەاترىنىڭ اۋماعىندا وسىنداي كەشەندى جۇمىستار جۇزەگە اسىرىلدى. بەكىتىلگەن جوسپار شەڭبەرىندە 574 شارشى مەتر ءمارمار جانە كەراميكالىق پليتا مەن 314 شارشى مەتر پليتا جابىنى اۋىستىرىلدى. سونىمەن بىرگە, 208 شارشى مەتر جەردىڭ ءتۇسىپ كەتكەن ءبارديۋرى اۋىستىرىلدى, 54 مەتر اۋماق قايتا مونتاجدالدى. تۇيىندەي ايتساق, استانا قالاسى بويىنشا كوشەلەردى گۇلزارلار مەن ساياباقتاردى جوندەۋ-قالپىنا كەلتىرۋ جۇمىستارى نەگىزىنەن ماۋسىم ايىنىڭ باسىندا اياقتالادى. مەملەكەت باسشىسىنىڭ تىكەلەي تاپسىرماسىمەن سوڭعى ءتورت جىل ىشىندە استانا قالاسىندا اۋلالاردى اباتتاندىرۋ جۇمىسى بەلسەندى جالعاستىرىلىپ كەلەدى. وسى كەزەڭ ىشىندە ەلوردادا 729 اۋلا كۇردەلى جوندەۋدەن وتكىزىلىپ, اباتتاندىرىلدى. تەك وتكەن جىلى عانا قالامىزداعى 408 اۋلا اباتتاندىرىلىپ, بالالاردىڭ ويناۋ الاڭدارى قۇرىلىپ, قالا تۇرعىندارىنىڭ شەك­سىز ريزالىعىنا بولەندى. استانا قالا­سىنىڭ وسىنداي كۇردەلى جوندەۋدەن وتكەن اۋلالارىنداعى بالالار وينايتىن ءتۇرلى-ءتۇستى قوندىرعىلاردى, قۇم توسەلگەن الاڭداردى, اسفالتتالعان جاياۋ جۇرگىنشىلەر جولدارىن كورگەندە كوڭى­لىڭ تولىپ, باس قالامىزدى كوگال­دان­دىرۋ جانە كوركەيتۋ ماقساتىندا شىن مانىندە اۋقىمدى شارالار اتقارىلىپ جاتقانىنا ءتانتى بولاسىڭ. بيىلعى جىلى دا وسى ءبىر يگى ءداستۇر لايىقتى جالعاسىن تابادى. قالا اكىمدىگىندە بەلگىلەنگەن جوسپار بويىنشا بيىل ەلورداداعى 111 اۋلا اباتتاندىرىلماق. بۇل جۇمىس قازىر قىزۋ جۇرگىزىلۋدە. جىلقىباي جاعىپار ۇلى, «ەگەمەن قازاقستان».

 كولىك ينفراقۇرىلىمىنىڭ كوكجيەگى

ينفراقۇرىلىم قالا تىرشىلىگىنىڭ قان تامىرى سياقتى. وزىق تەحنولوگياعا نەگىزدەلگەن ينفراقۇرىلىمى بار مەگاپوليس­تە ءومىر دەڭگەيى بارىنشا ساپالى ءارى قولايلى بولماق. استانانىڭ ينفراقۇرىلىمىن دامىتۋ ماقساتى بارىسىندا ەكولوگيالىق تازا كولىكتەرگە ارنالعان تۇراقتار مەن ۆەلوسيپەد قاتىناسىنا قولايلى جول جاساۋ ماسەلەسى ءجيى كوتەرىلەدى. ءيا, بۇگىنگى زامان اعىمىنا ساي قالامىزدا ۆەلوسيپەد تىزگىنىن ۇستاعاندار سانى كۇن ساناپ ارتىپ كەلەدى. سوندىقتان ولارعا مەيلىنشە جاعداي جاساۋ قاجەتتىلىگى تۋىنداپ وتىر. وسىعان بايلانىستى  سارىارقا كوپىرىنەن تەلمان ەلدى مەكەنىنە دەيىنگى ارالىقتا ارنايى ۆەلوسيپەد جولىن سالۋ ماسەلەسى قولعا الىندى. وسى جوبا نەگىزىندە ادامداردىڭ ەكولوگيالىق تازا كولىكپەن ءجۇرىپ-تۇرۋى جانە سەرۋەندەۋىنە ارنالعان كەستە جاسالىندى. وندا جاعاجاي ايماعىن دامىتۋ, ۆەلوجولدى دەنەشىنىقتىرۋ-ساۋىقتىرۋ ماقساتىندا بارىنشا ءتيىمدى پايدالانۋ جوسپارلانعان. ۆەلوجول قۇرىلىسىن سالۋ جوباسى بارىسىندا كولىككە ارنالعان تۇراق, ۆەلوسيپەدتەردى جالعا بەرۋ ورتالىعى, حالىققا قىزمەت كورسەتەتىن شاعىن جانە ورتا بيزنەس سۋبەكتىلەرىنىڭ قىزمەت ورىندارى جانە باسقا دا شارالار قاراستىرىلعان. ۆەلوجولدىڭ ۇزىندىعى 22 شاقىرىمدى قۇرايدى. ۆەلوسيپەد جۇرگىزۋشىلەردىڭ بۇل قاتىناس جولدارىنا جاڭا تەحنولوگيالارعا ساي جابىندى توسەلىنەدى. سونىمەن بىرگە, ۆەلوجولدى 8 بولىككە ءبولۋ كوزدەلىنىپ وتىر. ءاربىر  بولىك نەگىزىندە بەلگىلى ءبىر ەلدى مەكەندى قامتۋ ويلاستىرىلعان. ماسەلەن, ۆەلوجولدىڭ ءبىر بولىگى يلينكا ەلدى مەكەنىندە سالىنادى. ال ەلوردانىڭ ىشىندەگى ۆەلوجول جاعاجاي ماڭايى ارقىلى سالىناتىن بولادى. جالپى, ۆەلوسيپەد جۇرگىزۋشىلەرگە ارنالعان ارنايى جول سالۋداعى باستى ماقسات – بۇكىل الەمدە بۇگىنگى تاڭدا بەلەڭ العان ادامداردىڭ نازارىن ەكولوگيالىق تازا كولىككە اۋدارۋ بولىپ وتىر. بۇل ماقساتتا ەلوردادا باسقا دا كەشەندى شارالار جۇزەگە اسىرىلماق. وسى رەتتە جەدەل جۇرەتىن قوعامدىق كولىك جولىن سالۋ قولعا الىنادى. جولاۋشىلار قوعامدىق كولىككە ارنالعان جايلى  دا قاۋىپسىز جولمەن كوزدەگەن جەرلەرىنە جەدەل قاتىناپ وتىرادى. سونىمەن بىرگە, سۋ كولىگى, ەكوتاكسي, ەكواۆتوبۋس جوبالارى ءىس جۇزىنە اسىرىلۋدا. وسى ورايدا بيىلعى جىلى مامىر ايىندا ەسىل وزەنىندە كەمە ءجۇزۋ ماۋسىمى اشىلعانىن ايتا كەتكەن ءجون. قازىرگى كەزدە ەسىل وزەنىندەگى كەمەمەن ءجۇزۋ جولىنىڭ قاشىقتىعى 9 شاقىرىمدى قۇرايدى.  سۋ جولىمەن سەرۋەندەۋشىلەرگە 8 كەمە قىزمەت كورسەتەدى. ولاردىڭ قاتارىندا 32, 45, 60 جانە 69 جولاۋشىعا ارنالعان 5 جايلى جولاۋشىلار كەمەسى بار. ەلوردانىڭ سۋ جولىندا «كەنەسارى» جانە «رەديسسون» اتتى ەكى ايلاق جۇمىس ىستەيدى. جولاۋشىلارعا قىزمەت كورسەتۋ ساپاسىن جاقسارتۋ ماقساتىندا قالامىزدا ەكىنشى كوممۋنالدىق اۆتوبۋس پاركىنىڭ قۇرىلىسىن سالۋ جوسپارلانىپ وتىر. العاشقى كوممۋنالدىق اۆتوبۋس پاركىنىڭ قۇرىلىسى ءۇشىن يندۋستريالىق پارك اۋماعىندا 8,5 گەكتار جەر تەلىمى ءبولىندى. قۇرىلىس جۇمىستارى ۇستىمىزدەگى جىلدىڭ قازان ايىندا باستالادى. ال ەكىنشى كوممۋنالدىق اۆتوبۋس پاركىنىڭ قۇرىلىسىن سالۋ بيىلعى جىلدىڭ ەكىنشى جارتىجىلدىعىندا باستالادى. قالاداعى كولىك ينفراقۇرىلىمىن جاقسارتۋ ماسەلەسىندە قۇرىلىس جۇمىستارى قولعا الىنعان جاڭا تەمىرجول ۆوكزالىنىڭ دا قوسار ۇلەسى قوماقتى بولماق. سونىمەن بىرگە, قالاارالىق كولىك قاتىنا­سىنىڭ قولايلىلىعى مەن ساپاسىن ارتتىرۋ ماقساتىندا ەلوردادا جاڭا ەكى اۆتوۆوكزال سالىنادى. قازىرگى تاڭدا بۇل ءىرى قۇرىلىس جو­با­لارىنىڭ تەحنيكالىق-ەكونوميكالىق نەگىز­دەمەلەرى جاسالۋ ۇستىندە. قالاداعى كولىك ينفرا­قۇرىلىمىن جاقسارتۋ ماقساتىندا الداعى ۋاقىتتا يگىلىكتى دە كەشەندى جوبالار ءىس جۇزىنە اسىرىلادى. ۆيتالي سيلەتسكي, استانا ساۋلەت جانە قالا قۇرىلىسى باسقارماسىنىڭ باسشىسى.

جۇلدەلى ەكيپاج جۇيتكىپ ءجۇر

ءاربىر ادامنىڭ بۇل ومىردە ءوزىنىڭ ورنىن تابا ءبىلۋى دە وڭاي نارسە ەمەس. كوز مايىن تاۋىسىپ, بىرنەشە جىل جوعارى وقۋ ورنىندا وقىپ, العان مامان­دىعىن دا يگىلىگىنە جاراتا الماي سەرگەلدەڭمەن جۇرگەندەر قان­شاما. بۇل  رەتتە قانات كۇل­تاەۆتىڭ جولى بولدى. «ساباق­تى ينە ساتىمەن» دەمەكشى, اقي­قاتىندا ول ماماندىق تاڭداپ باس قاتىرا قويعان دا جوق. سا­نا­لى عۇمىرىندا يگەرگەن جال­عىز كاسىبى – جۇرگىزۋشى مامان­دى­عىنىڭ قىرى مەن سىرىن تەرەڭدەي زەردەلەپ, ونى ادال دا سا­پالى يگەرۋگە بارلىق كۇش-جىگەرىن ارنادى. قازىر ەكىنىڭ ءبىرى جۇرگىزۋشى, ماشي­نا­نىڭ قۇلاعىندا وينايدى. بۇل اي­نالاعا قاراپ, اسىعىس ايتىلعان تۇ­جىرىم. كۋالىك الىپ, ماشينا تىزگىنىنە وتىرعاننىڭ ءبارى بىردەي كانىگى جۇرگىزۋشى ەمەس. تەپكىلەي بەرگەن سوڭ تەمىر دە ءتوزىپ, ەرىنبەگەننىڭ ءبارى جۇرگىزۋشى بولىپ ءجۇر. وعان ەلىمىزدىڭ جولدارى مەن قالالار كوشەلەرىندەگى كۇننەن-كۇنگە كوبەيىپ بارا جاتقان جول-كولىك اپاتتارى كۋا. ءومىردىڭ وسى شىندىعىن ساناسى­نا بەرىك سىڭىرگەن قانات ماشينا ءتىز­گىنىن قولىنا العان العاشقى كۇننەن بىلىكتىلىك پەن جاۋاپكەرشىلىكتى ءبىرىنشى ورىنعا قويدى. ول كاسىبي شەبەرلىگىن جەتىلدىرىپ, تەحنيكانىڭ ءتىلىن تەرەڭ ءتۇ­سىنۋدى ءبىر ءسات تە ەستەن شىعارىپ كور­گەن ەمەس. قاناتتىڭ بويىنداعى وسىنداي قابىلەتتى استانا قالاسى №1 اۆتوبۋس پاركىنىڭ باسشىلارى دا جەتە بايقادى. بۇل ۇجىمدا جۇمىس ىستەي باستاعان جىلدار ىشىندە ول ءوز ماماندىعىنىڭ شىن مايتالمانى ەكەندىگىن ناقتى كورسەتە ءبىلدى. جولاۋشىلار قاۋىپ­سىزدىگى سەنىپ تاپسىرىلاتىن اۆتوبۋس جۇرگىزۋشىسىنە قانشالىقتى جاۋاپ­كەرشىلىك جۇكتەلەتىنىن قانات بار بول­مىسىمەن سەزىنىپ, سوعان لايىق شەبەر­لىگىن شىڭداي بەردى. №1 اۆتوبۋس پار­كىنىڭ باسشىلىعى تاجىريبەلى جۇرگى­زۋشىگە ۇنەمى زور سەنىم ءبىلدىرىپ, جاڭا تەحنيكانى, جاۋاپتى باعىتتاردى تاپسىرىپ وتىرادى. بۇگىندە قانات كۇلتاەۆ استانا اۋەجايىنا قاتىنايتىن №10 باعىتتا جولاۋشىلارعا قىزمەت كورسەتىپ ءجۇر. اۆتوبۋس پاركى سوڭعى كەزەڭدە ساتىپ العان سىيىمدىلىعى ۇلكەن جاڭا اۆتوبۋستى تاجىريبەلى جۇرگىزۋشىگە تاپسىرعان بولاتىن. ول سەنىم بيىگىنەن كورىنىپ, جولاۋشىلارعا قالتقىسىز قىزمەت كورسەتۋدى ءوزىنىڭ باستى پارىزى سانايدى. «اۋەجاي ەلوردانىڭ قاقپاسى سياقتى. قالامىزعا تورتكۇل دۇنيەنىڭ ءتورت بۇرىشىنان كەلەتىن جولاۋشىلار وسى قاقپا ارقىلى وتەدى. ولاردىڭ ءبىزدىڭ ەلىمىز تۋرالى العاشقى تۇسىنىگى, باس قالامىز تۋرالى كوزقاراسى اۋەجايدان قالاعا باراتىن وسى №10 باعىتتا قالىپتاسادى. سوندىقتان ولاردىڭ ءۇمىتىن ۇكىلەپ, العاشقى پىكىرىنىڭ جوعارى بولۋى ءۇشىن ءبىز جولاۋشىلارعا دەگەن قالتقىسىز قىزمەتتىڭ شىنايى ۇلگىسىن كورسەتۋىمىز كەرەك», دەيدى قانات. ەلوردامىزدا سوڭعى جىلدارى قالا كۇنى مەرەكەسى قارساڭىندا ءوز ءىسىنىڭ مايتالمان شەبەرلەرىن انىقتاۋ ماقساتىندا قالالىق اكىمدىكتىڭ ۇيىمداستىرۋىمەن «استانا تاڭداۋى» اتتى كونكۋرس وتكىزۋ داستۇرگە اينالعان. ەڭبەك ۇجىمدارى ۇسىنعان ۇمىتكەرلەر بارلىق استانالىقتاردىڭ اشىق داۋىس بەرۋى ناتيجەسىندە كونكۋرس جەڭىمپازى رەتىندە تانىلادى. وتكەن جىلى وسىنداي مارەلى باسەكەدە قانات كۇلتاەۆتىڭ مەرەيى ۇستەم بولىپ, «استانا تاڭداۋى-2013» بايقاۋىنىڭ جەڭىمپازى بولىپ تانىلدى. بيىل «استانا تاڭداۋى-2014» جارى­سىن ۇيىمداستىرۋشىلار كونكۋرس قارساڭىندا قوعامدىق كولىك جۇرگى­زۋ­شىلەرىنىڭ اراسىندا «ۇلگىلى قىزمەت ەكيپاجى» اتتى باسەكە وتكىزدى. بۇل باسەكەدە دە قانات كۇلتاەۆتىڭ «اسىعى الشىسىنان» ءتۇستى. قازىر ونىڭ «ۇلگىلى قىزمەت ەكيپاجى» قۇرمەتىنە يە بولعان ءۇر جاڭا اۆتوبۋسى №10 اۋەجاي – استانا باعىتىمەن جۇيتكىپ ءجۇر. جاراس سادۋاقاسوۆ.

«اقبەرەن» بايقاۋىندا توپ جاردى

ەلوردالىق وقۋشىلار كومانداسى «اقبەرەن» اتتى رەسپۋبليكالىق بايقاۋدا ۇزدىك اتانسا, كوماندا مۇشەلەرى ءبىر­نەشە اتالىم بويىنشا جۇلدەلى ورىندارعا يە بولدى. بۇل تۋرالى astana.kz سايتىنا استانا قالاسىنىڭ ءبىلىم باسقارماسى حابارلادى. جارىس قورىتىندىسى بويىنشا شەشەندىك ونەر اتالىمىندا كاميلا ەمانعاليەۆا, كوركەمسوز وقۋ شەبەرلىگىندە جاقىپ ماديار, انكەي ەلدوس ولەڭ وقۋدا, ال البولسىن تاڭنۇر «كورەرمەندەر كوزايىمى» اتالىمىندا توپ جاردى. ەلىمىزدىڭ مەكتەپ وقۋشىلارى اراسىندا دارىنداردى اشۋعا ارنالعان «اقبەرەن» بايقاۋى ەلورداداعى «تىلەپ» قوبىز سارايىندا ءوتتى. بايقاۋعا ەلىمىزدىڭ 13 وبلىسىنان جانە استانا مەن الماتى قالالارىنان 5-10-سىنىپتىڭ 96 وقۋشىسى قاتىستى. ولار التى اتالىم بويىنشا باق سىناستى. اتاپ ايتقاندا, شەشەندىك ونەر, كوركەمسوز وقۋ, شىعارما, ۇلتتىق اسپاپتا ويناۋ, اقىندار ايتىسى, اقىندار ءمۇشايراسى. بايقاۋدىڭ ماقساتى – گۋما­ني­تار­لىق-ەستەتيكالىق باعىتتا دارىندى بالالاردى انىقتاۋ, بالالاردىڭ بويىندا پاتريوتتىق سەزىمدى تاربيەلەۋ. بايقاۋدى «قازاقستان» تەلە­ارناسىنىڭ قولداۋىمەن ءبىلىم باسقارماسىنىڭ «دارىن» رەسپۋب­ليكالىق عىلىمي-پراكتيكالىق ورتا­لىعى ۇيىمداستىردى. «ەگەمەن-اقپارات».

بەتتى ازىرلەگەن جىلقىباي جاعىپار ۇلى,

«ەگەمەن قازاقستان».