امەريكا، افريكا، ەۋروپا: ءتورت مىقتى تۇگەندەلدى

برازيليالىقتاردىڭ «بالەتى» اياقتالدى

ەر-رايانداعى كەزدەسۋدىڭ ءسوزسىز ءفاۆوريتى برازيليا قۇرا­ماسى ەدى. ولار 1/8 فينالدا وڭ­تۇستىك كورەيانى 4:1 ەسەبىمەن ويسى­راتا ۇتقاندا، جانكۇيەرلەر «ەندى نەيمار باستاعان جىگىتتەردى توق­تاتاتىن كۇش جوق شىعار» دەپ پايىم­دادى. بىراق زلاتكو ءداليچتىڭ بۇل ويىنعا ءوز جوسپارى بولدى. وڭتۇستىك امەريكادان كەلگەن وعلانداردان ەش قايمىقپاعان حورۆاتتار 120 مينۋت بويى ايانباي ايقاستى. ءيا، تيتە شاكىرتتەرىنىڭ قارسىلاستارىنا قاراعاندا گول سوعۋىنا مۇمكىندىكتەرى ەداۋىر كوپ بولعانى راس. الايدا سىن سا­عاتتا قارت قۇرلىقتىڭ وكىلدەرى ءبىر جۇدىرىق بولىپ جۇمىلا ءبىلدى. ونىڭ ۇستىنە، قاقپاشى دومينيك ليۆاكوۆيچتىڭ ءمىنسىز ويىنى تامساندىردى. ول ءوز قاقپاسىن تالاي قاۋىپتى جاعدايدان امان الىپ قالىپ، بارلىعى 11 سەيۆ جاسادى.

نەگىزگى ۋاقىت تەڭ اياقتالدى. وۆەرتايمدا برازيليالىقتار ەسەپ اشتى. 105-مينۋتتا نەيمار مەرگەندىك تانىتتى. بىراق ولاردىڭ قۋانىشى ۇزاققا سوزىلمادى. ۇزى­لىستەن كەيىن جانۇشىرا العا ۇم­تىلعان حورۆاتتار كەرەمەت كومبيناتسيا ۇيىمداستىردى. ونىڭ اقىرى برۋنو پەتكوۆيچتىڭ عاجاپ گول سوعۋىمەن اياقتالدى. ەسەپ – 1:1.

پەنالتي سوعۋ بارىسىندا حورۆاتيا فۋتبولشىلارى بارلىق مۇكىن­دىكتەرىن ۇتىمدى پايدالاندى. نيكولا ۆلاشيچ، لوۆرو مايەر، لۋكا مودريچ جانە ميسلاۆ ورشيچ نىسانانى ءدال كوزدەدى. قارسىلاستارى ەكى مارتە قاتەلەستى. رودريگو تەپكەن دوپتى ليۆاكوۆيچ كەرى قايتارسا، ماركينوس باعاناعا تيگىزدى. ەسەپ – 4:2. وسىلايشا، حورۆاتتار جارتىلاي فينالعا جولداما الدى. ال باسەكە اياقتالعان بەتتە التى جىلدان اسا برازيليا قۇراماسىنىڭ باس باپكەرى بولعان تيتە ءوز ەركىمەن قىزمەتىنەن كە­تەتىنىن رەسمي تۇردە مالىمدەدى.

 15 ەسكەرتۋ جاسالعان ويىن

وزگەلەردى ايتپاعاندا، تىس­قاق­قان بۋكمەكەرلەردىڭ وزدەرىنە نيدەرلاند پەن ارگەنتينا قۇرا­مالارى اراسىنداعى كەزدەسۋدىڭ جەڭىمپازىن انىقتاۋ وڭايعا سوق­قان جوق. تىپتەن، كوپتى كور­گەن كانىگى ماماندار مەن ساقا سا­راپ­شىلاردىڭ پىكىرلەرى دە ەكى­گە جارىلدى. باستاپقىدا ءبىز ءىش پىس­تىرارلىق ويىننىڭ كۋاسى بول­دىق. جارتى ساعاتتان اسا ۋاقىت بويى قوس كوماندا ءبىر-ءبىرىنىڭ قاقپا ماڭىنا ماڭايلاي المادى. كوبىنە-كوپ تارتىس الاڭ ورتاسىندا ءوربىدى. تەك 35-مينۋتتا ليونەل مەسسيدەن جاقسى پاس العان ناۋەل مولينا ەسەپ اشتى. الايدا ودان كەيىن دە كوپكە دەيىن ويىن جوعارىداعىداي ستسەناري بويىنشا ءوربىدى.

73-مينۋتتا مەسسي 11 مەتر­لىك نۇكتەدەن نىسانانى ءدال كوز­دەگەننەن كەيىن بارلىعىمىز دا «لۋي ۆان گال شاكىرتتەرى ەندى ەش­تەڭە وزگەرتە المايدى» دەپ وي­لادىق. بىراق مۇنىمىز بەكەر ەكەن. تەك سودان كەيىن بارىپ قانا ەس جيعان نيدەرلاندتىقتار نامىسقا قامشى باستى. ناتيجە كوپ كۇت­تىرەگەن جوق. 83-مينۋتتا ۆاۋت ۆەگ­حورست ەسەپ ايىرماشىلىعىن قىسقارتتى. نەگىزگى ۋاقىتقا تو­رەشى ماتەۋ لاوس تاعى 10 مينۋت قوستى. سول ۋاقىت اياقتالار تۇستا «قىزعالداقتار ەلىنىڭ» فۋتبولشىلارى تارازى باسىن تەڭەستىرىپ كەتتى. ايىپ الاڭىندا تيون كوپ­مەينەرس ءوزى تەپكەننىڭ ورنىنا دوپ­تى ءبىر توپ قورعاۋشى اراسىنان ۆەگحورستقا سىرعىتا سالدى. ول ءمۇلت كەتكەن جوق – 2:2. وۆەرتايمدا جەڭىمپاز انىق­تال­مادى. سودان پەنالتي سو­عىلدى. نيدەرلاند قۇرا­ماسىنىڭ سەركەسى ۆيردجيل ۆان دەيك پەن ستيۆەن بەرگەيس ورىن­داعان العاشقى ەكى سوققىنى قاق­پاشى داميان ەميليانو مار­تينەس كەرەمەت سەيۆتەرمەن كەرى قايتاردى. سول كەزدە ارگەنتي­نالىقتاردىڭ جارتىلاي فينالعا شىعاتىنىنا ەشكىمنىڭ كۇمانى بولمادى. ايتقانداي-اق، ليونەل سكالونيدىڭ كومانداسى كوزدەگەن ماقساتىنا قول جەتكىزدى. جەڭىس گولىن لاۋتارو مارتينەس سوقتى – 4:3. وسى ساتسىزدىككە توزە الماعان 71 جاستاعى تانىمال باپكەر لۋي ۆان گال وتستاۆكاعا كەتتى.

اتالعان باسەكە بارىسىندا 45 جاستاعى يسپانيالىق قازى ماتەۋ لاوس قوس كوماندانىڭ وي­ىن­شىلارىنا 15 مارتە ەسكەرتۋ جاسادى. بۇل – الەم چەمپيوناتتارى تاريحىنداعى تاعى ءبىر رەكورد!

ماروككو مىقتى ەكەن

سەنبىدەن جەكسەنبىگە قاراعان ءتۇنى دوحاداعى ء«ال-تۋماما» ستاديونىنا جينالعان 45 مىڭعا جۋىق جانكۇيەردىڭ بارلىعى دا تەك ماروككونى قولداعانداي اسەر قالدىردى. ولاي دەۋگە نەگىز، ولار شابۋىلعا شىقسا، بارشا كورەرمەن ايعايعا باسىپ، سىرنايلاتىپ، كەرنەيلەتتى. ال دوپ پورتۋگاليا ويىنشىلارىنا تيسە، كەرىسىنشە، جاقتىرماعانداي سىڭاي تانىتتى. سونىڭ اسەرى بولسا كەرەك، قارا قۇرلىقتان كەلگەن جىگىتتەر وتە سەنىمدى وينادى. پلەي-وففتىڭ العاشقى كەزەڭىندە پيرەنەي تۇبەگىنىڭ تۇلەكتەرى شۆەيتساريانى 6:1 ەسەبىمەن ويسىراتا ۇتقانى بەلگىلى. ول كەزدە قارسىلاستارى بىردەن تىزگىندى ءوز قولدارىنا الۋعا تىرىسقان. ال ونداي ويىن مانەرى پورتۋگاليالىقتارعا جاقسى جاعادى. سودان ماروككولىقتار جاقسى ساباق العان ەكەن. ولار ويىن تىزگىنىن پورتۋگالياعا بەرىپ قويدى دا، وزدەرى قارىمتا شابۋىلعا جۇگىنۋدى ءجون كوردى. بۇل تاكتيكا ءوز جەمىسىن بەردى. 42 مينۋتتا ەسەفف ەن-ناسەري قاقپاشىنىڭ ورەسكەل قاتەلىگىن پايدالانىپ، دوپتى تورعا توعىتتى.

پورتۋگاليا قۇراماسى ۇزى­لىستەن كەيىن دە جاعدايدى تۇزەي المادى. امالى تاۋسىلعان فەر­ناندۋ سانتۋش 51-مينۋتتا كريش­تيانۋ رونالدۋدى الاڭعا شى­عاردى. بىر­اق اتى اڭىزعا اي­نالعان شا­بۋىل­شىنىڭ ءوزى دە جاعدايدى وزگەرتە العان جوق. بۇل كوماندانىڭ ساپىندا جۋان فەليكس وتە بەلسەندى بولدى. الاي­دا ونىڭ تەپكەن دوپ­تارىنىڭ بار­لىعى دا قاقپادان جوعارى كەت­تى. باسقالارى دا ەشتەڭە وندىرە المادى. تاعى ءبىر ساتتە دوپ ماڭ­دايشاعا ءتيدى. ءسويتىپ، 1:0 ەسەبىمەن جەڭىسكە جەتكەن ماروككو جارتىلاي فينالعا شىقتى. ولار تەك افريكا قۇرلىعى عانا ەمەس، اراب الەمىندەگى وسى مەجەگە جەتكەن تۇڭ­عىش كوماندا رەتىندە تاريحتا قالدى.

حارري كەيننىڭ قورلىعىن-اي!

كوپ ۇزاماي ءال-حاۋرداعى ء«ال-بايت» ستاديونىنداعى انگليا مەن فرانتسيا قۇرامالارى اراسىندا الاپات ايقاستى تاماشالادىق. العاشقى تايم تولىقتاي فران­تسۋزداردىڭ باسىمدىعىمەن ءوتتى. ولار وتە سەنىمدى ويناپ، قار­سى­لاستارىن قوس قاپتالدان ءجيى-ءجيى قىسپاققا الدى. اعىلشىندار ارا-تۇرا شابۋىلداعانىمەن، وتە ساق ويناۋعا تىرىستى. سىرت كوزگە ولار قارسىلاستارىنان قايمىعىپ جۇرگەندەي اسەر قالدىردى. ولاي دەۋگە نەگىز، قيت ەتسە، دوپتى ارتقا بەرىپ، تاۋەكەلگە بارمادى. ال دوپ كيليان مباپپەگە تيسە، بىرنەشە ويىنشى ونى قورشاۋعا الىپ، ابدەن ابىگەرگە ءتۇستى. 17-مينۋتتا فران­تسۋزداردىڭ كەزەكتى ءبىر شابۋىلىنان كەيىن ەسەپ اشىلدى. جارتىلاي قورعاۋشى ورەلەن تچۋامەنيدىڭ شامامەن 22 مەتردەي قاشىقتىقتان قاقىراتا تەپكەن دوبى قاقپا تورىنان تابىلدى.

54-مينۋتتا حارري كەين 11 مەترلىك نۇكتەدەن تارازى باسىن تە­ڭەستىردى. ناعىز قىزىق سودان كەيىن باستالدى. قوس كوماندا الما-كەزەك قاۋىپتى شابۋىل ۇيىم­­داستىرىپ، كورەرمەندەردىڭ دەلەبەسىن ابدەن قوزدىردى. بىراق باسىمدىق ءبارىبىر فرانتسۋزدار جاعىندا بولدى. ولار شيراق ءالى سەنىمدى قيمىلدادى. ناتيجەسىندە، 78-مينۋتتا وليۆە جيرۋ الەم چەمپيوندارىن العا شىعاردى. دەسەك تە ماتچتىڭ سوڭىنا تامان انگليا قۇراماسىنىڭ دا گول سو­عۋىنا مۇمكىندىگى بولدى. VAR-دىڭ كومەگىنە جۇگىنگەن تو­رە­شى ۋگو ءلوريستىڭ قاقپاسىنا تاعى پەنالتي بەلگىلەدى. بىراق بۇل جولى كەيننىڭ تەپكەن دوبى ماڭ­داي­شادان الدەقايدا بيىك كەتتى. ەسەپ – 2:1. ۇزاق جىلدار بويى تۇماندى البيون ەلىنىڭ باستى سۇرمەرگەنى سانالىپ كەلگەن ساقا ويىنشىنىڭ جۇيكەسى سىن ساعاتتا سىر بەردى. سونىڭ سالدارىنان اعىلشىنداردىڭ جۇلدەلى ورىندار ءۇشىن تالاسساق دەگەن ۇكىلى ءۇمىتى ءۇزىلدى. ال ديدە دەشامنىڭ كومانداسى جارتىلاي فينالعا جولداما الدى.

وسىلايشا، جارتىلاي فينالعا شىققان ءتورت مىقتى كوماندا انىق­تالدى. ەندى 13 جەلتوقساندا لۋسايلدا ارگەنتينا مەن حورۆاتيا كۇش سىناسسا، كەلەسى كۇنى ماروككو مەن فرانتسيا شەبەرلىك بايقاسادى. 17 جەلتوقساندا قولا مەدال ءۇشىن تارتىستى تاماشالاساق، ال بيىلعى الەم چەمپيوناتىنىڭ جەڭىمپازى 18 جەلتوقساندا انىقتالادى.

پارلامەنت ءماجىلىسىنىڭ دەپۋتاتى

ساۋىتبەك ابدراحمانوۆ:

ەگەر فۋتبولدا ويىن تاعدىرىن تەك شەبەرلىك شەشەتىن بولسا، ول ءدال مۇنداي تانىمال بولماس ەدى دەپ تە ويلايمىن. فۋتبولدىڭ جاھان جۇرتشىلىعىنىڭ جۇ­رەگىن جاۋلاپ العان كۇشى تەك سپورت­تىڭ شەڭبەرىندە قالىپ قوي­ماي­تىندىعىندا، ونىڭ زاڭدى­لىق­تارىنا باعىن­باي­تىندىعىندا، دومالاق دوپتىڭ دوڭگەلەنگەن دۇ­نيەدەي تىلسىمدىعىندا، ويىن ناتيجەسىن كەيدە بولماشى قاتەلىك، كەيدە ءتىپتى عايىپتان تايىپ كەلە قالعان كەزدەيسوقتىق شەشىپ كەتە بەرەتىن كەرەمەتىندە، قىسقاسى، ءومىردىڭ وزىندەي وزگەرمەلىلىگىندە. سونىسىمەن دە ءاربىر فۋتبول ماتچى قايتالانبايتىن سپەكتاكل سيپاتىمەن ءبىزدى وزىنە تارتا بەرەدى، تارتا بەرەدى.

IT مامانى، ابايتانۋشى

سۇلتان ىبىراي:

برازيليا، پورتۋگاليا... جالپى الەمدى ادىلەتسىزدىك بيلەپ كەتكەندەي كورىنەدى، كورىنگەندە بيلەپ تۇرعانى دا راس قوي... بىرەۋلەر فۋتبول ءولدى دەپتى. ماسەلە، رو­نالدۋدىڭ كوز جاسىندا ەمەس. باپ شاپپادى، باق شاپتى. نيكولا تەسلا مەن يبن باتۋتا ۇرپاقتارى ءۇشىن.