«قالادا جايلى ءومىر ءسۇرۋ - تىرشىلىكتى قامتاماسىز ەتۋ جۇيەلەرىنىڭ جۇمىسىنا بايلانىستى. قالا تۇرعىندارىنىڭ سانى جىل سايىن ءوسىپ كەلە جاتقانىن ەسكەرە وتىرىپ, جۇمىس ىستەپ تۇرعان تىرشىلىكتى قامتاماسىز ەتۋ نىساندارىنىڭ قابىلەتتىلىگىنە كوڭىل ءبولىپ قانا قويماي, جاڭالارىن دا سالۋ قاجەت.
قالانى ارالاۋ بارىسىندا وسىعان دەيىن قۇرىلىسى باستالعان نىسانداردىڭ جۇمىسىمەن تانىستىم. ولار - گاز جىلۋ ستانتسيالارى, اۋىز سۋ ستانتسياسى (سسس-3), جەو-3.
ەكى گاز جىلۋ ستانتسياسىن («تۇران», «وڭتۇستىك-شىعىس») كەلەسى جىلىتۋ ماۋسىمىنان (2023 جىلى) باستاپ ىسكە قوسۋ جوسپارلانىپ وتىر. ولار جىلۋمەن جابدىقتاۋ كولەمىن ەداۋىر ارتتىرۋعا, قۇرىلىسى قارقىندى تۇردە ءجۇرىپ جاتقان بولاشاق اۋدانداردى جىلۋمەن قامتۋعا مۇمكىندىك بەرەدى. جاڭا گاز جىلۋ ستانتسيالارىنىڭ قۋاتى جەو-3 قۋاتىنان اسىپ تۇسەدى. ماسەلەن «تۇران» گاز جىلۋ ستانتسياسى 8 ملن شارشى مەتر تۇرعىن ءۇيدى جىلىتا الادى.
جەو-3-كە توقتالار بولساق, قالاعا قاجەتتى نىساننىڭ ۇزاق قۇرىلىمدى ەكەنى بەلگىلى. 2023 جىلى جەو-3 جۇمىسىن ىسكە قوسۋ مىندەتى قويىلدى. قۋاتى - 3,5-4 ملن شارشى مەتر تۇرعىن ءۇي.
سول سياقتى قالانى قوسىمشا اۋىز سۋمەن قامتاماسىز ەتۋ قاجەت. اۋىز سۋ ستانتسياسىنىڭ دا (سسس-3) تولىق ىسكە قوسىلۋى كەلەسى جىلعا جوسپارلانىپ وتىر. سسس-3 قۋاتى - تاۋلىگىنە 100 تەكشە مەتر سۋدان اسادى.
قالانىڭ قازىرگى دامۋ قارقىنىنا سايكەس جاڭا تىرشىلىكتى قامتاماسىز ەتۋ نىساندارىنىڭ دا قۋاتى جەتكىلىكسىز بولادى. سول سەبەپتى استانانىڭ 2035 جىلعا دەيىنگى دامۋ باس جوسپارىنىڭ جوباسىنا قوسىمشا اۋىز سۋ ستانتسيالارىنىڭ, جىلۋ ستانتسيالارىنىڭ جانە ت.ب. قۇرىلىسى ەنگىزىلۋدە», دەپ جازدى ەلوردا اكىمى.
