ۇكپ باسشىسى Kazakhstan Petrochemical Industries Inc جشس ينتەگراتسيالانعان گاز-حيميا كەشەنىنە جوعارى باعا بەردى. زاۋىت وسى جىلدىڭ قاراشاسىندا ىسكە قوسىلدى.
KPI – شيكىزاتتى تەرەڭ وڭدەيتىن قازاقستاننىڭ مۇناي-گاز حيمياسى سالاسىنداعى العاشقى اۋقىمدى زاۋىت. ونىڭ وندىرىستىك قۋاتى جىلىنا 500 مىڭ توننا پوليپروپيلەندى قۇرايدى. بۇل الەمدىك پوليپروپيلەن ءوندىرىسىنىڭ شامامەن 1%-ىن قۇرايدى. وسىلايشا زاۋىت بۇگىندە الەمدەگى جەتەكشى پوليپروپيلەن وندىرۋشىلەرىنىڭ قاتارىنا كىرەدى. بۇگىندە پوليپروپيلەن ماشينا جاساۋ, مەديتسينا, ەلەكتر تەحنيكا ونەركاسىبىندە بىرقاتار بۇيىمدار, توت باسۋعا قارسى ماتەريال جاساۋدا تاپتىرماس شيكىزات.
«بۇل ەلىمىزدىڭ ۇلكەن مۋلتيپليكاتيۆتى اسەرى بار سەرپىندى جوبالارىنىڭ ءبىرى. قازىرگى كەزدەگى مىندەت – قايتا وڭدەۋ ءوندىرىسىن دامىتۋ ءۇشىن زاۋىت اينالاسىندا ناقتى كلاستەر قۇرۋ. فورۋمنىڭ نەگىزگى يدەياسى وسى. ۇكپ رەتىندە ءبىز بۇل جۇمىستى «قازمۇنايگاز», «بايتەرەك» ۇبح جانە ەڭ باستىسى بيزنەسپەن بىرلەسىپ بەلسەندى تۇردە باستادىق. اتاپ ايتقاندا, ءبىز وسى ءونىمدى تۇتىنۋشىلار ءتىزىلىمىن قالىپتاستىرا باستادىق, قوسىمشا تالداۋ جاسايتىن توپتى جينايمىز. مۇنىڭ ءبارى بيزنەسكە وسى اۋماقتا قانداي وندىرىستەردى ۇيىمداستىرۋعا بولاتىنى تۋرالى ناقتى كورىنىس بەرەتىن دۇرىس جانە ءتيىمدى باعدارلاماعا قۇرىلۋى ءتيىس», دەپ اتاپ ءوتتى ۇكپ باسشىسى.
