بيزنەستىڭ ءورىسى كەڭەيەدى

قازاقستاننىڭ ورتالىق كوممۋ­ني­كاتسيالار قىزمەتىندە پارلا­مەنت سەناتىنىڭ دەپۋتاتتارى اقان بيجانوۆ پەن ۆلاديمير بوبروۆ­تىڭ قاتىسۋىمەن بريفينگ ۇيىمداس­تىرىلىپ, وندا ەۋرازيالىق ينتەگراتسيا جايىندا اڭگىمە قوزعالدى. ا.بيجانوۆ ەۋرازيالىق ەكونوميكالىق وداق قۇرۋ تۋرالى شارتقا قول قويۋ ەلدەر اراسىنداعى تاريحي وقيعا بولىپ سانالاتىنىنا, بۇل باعىتتا مەملەكەتتىك ورگاندار تاراپىنان اۋقىمدى جۇمىستار اتقارىلعانىنا توقتالدى. «ەۋرازيالىق ەكونوميكالىق وداقتىڭ قۇرىلۋى ىشكى نارىقتىڭ اۋقىمىن كەڭەيتۋگە مۇمكىندىك بەرەدى. بۇگىندە ءۇش ەلدىڭ ورتاق نارىعى 2,5 ترلن.-نان استام اقش دوللارىن قۇراپ وتىر. ال جالپى ادام رەسۋرستارى – 168 ملن.- عا جۋىق. مەملەكەتتەردىڭ جالپى وندىرىستىك الەۋەتى 600 ملرد. اقش دوللارىن كورسەتەدى. دەمەك, ءبىزدىڭ ەلدەرىمىزدىڭ اراسىنداعى ينتەگراتسيالىق ۇدەرىستەردىڭ جۇزەگە اسۋى, ءتۇرلى ەكونوميكالىق كەدەرگىلەر مەن شەكتەۋلەردىڭ الىنىپ تاس­تالۋى ءار مەملەكەتتىڭ بيزنەس اينالىمىن كەڭەيتۋگە مۇمكىندىك بەرەتىن بولادى. بۇل رەتتە, قازاقستان, بەلارۋس جانە رەسەي مەملەكەتتەرىنىڭ بيزنەسى مەملەكەتتىك ساتىپ الۋلار جۇيەسىندە تەڭ جانە باسەكەلەستىك قۇقىققا يە بولاتىنىن دا اتاپ وتكەن ءجون. بۇل ءوز كەزەگىندە تاسىمالدىڭ, تاۋارلار مەن قىزمەت كورسەتۋلەردىڭ اۋقىمدى نارىعىن قۇرۋعا جول اشپاق», دەدى ول. سەنات دەپۋتاتىنىڭ ايتۋىنشا, قازاقستاننىڭ وزگە ەلدەرمەن ارىپتەستىك ورناتا وتىرىپ, ءوزىنىڭ ەكونوميكا سالاسىن بىرنەشە باعىتتا دامىتۋىنا مۇمكىندىگى بار. ولار مۇناي جانە مۇناي ونىمدەرىنىڭ, گاز بەن ەلەكتر ەنەرگيالارىنىڭ, ءدارى-دارمەكتەر مەن مەديتسينالىق ونىمدەردىڭ ورتاق نارىعى بولماق. بۇعان قوسا, «ۇشتىك» ەلدەرى اراسىنداعى تاۋار اينالىمىن ودان ءارى ۇلعايتۋ كوزدەلمەك. ماسەلەن, 2013 جىلى مەملەكەتتەر اراسىنداعى تاۋار اينالىمى 24 ملرد.-تان استام اقش دوللارىن قۇراپتى. «بۇل – قازاقستان سەكىلدى تەڭىزگە تىكەلەي شىعار جولى جوق ەلگە كولىك-لوگيستيكالىق جۇيەسىنىڭ الەۋەتىن ارتتىرۋعا دا مۇمكىندىك بەرەتىن بولادى. ەلدىڭ ينۆەستيتسيالىق تارتىمدىلىعى دا ارتپاق. ماسەلەن, قازىرگى تاڭدا شەتەلدىك ساراپشىلار ەلىمىزدە بيزنەستىڭ ورىستەۋى ءۇشىن جاقسى جاعداي جاسالىپ وتىرعانىن ايتۋدا. ياعني, بىزدە سالىق ساياساتىنا, ءتۇرلى كەدەرگىلەردىڭ الىنىپ تاستالۋىنا قاتىستى باسىمدىقتار مەن ارتىقشىلىقتار بار. دەمەك, ءۇش ەلدىڭ قارجىلىق مۇمكىندىكتەرىن بىرىكتىرۋ ارقىلى ۇلتتىق-قارجىلىق جۇيەنىڭ تۇراقتىلىعى مەن ءبىزدىڭ ەكونوميكالارىمىزدىڭ تەتىگىن نىعايتۋ كوزدەلمەك», دەدى دەپۋتات بۇل تۋراسىندا. ال ۆ. بوبروۆ قوعامدا الەۋمەتتىك تۇراقتىلىق پەن مىقتى ەكونوميكالىق تەتىك ورنامايىنشا, كەز كەلگەن ەلدىڭ جاھاندانۋ زامانىنداعى باسەكەلەستىككە توتەپ بەرە المايتىنىن العا تارتتى. «العاشىندا كەدەن وداعىنا قاتىستى سىني پىكىرلەر كوپ ايتىلعانىن بىلەمىز. الايدا, ول شاعىن جانە ورتا بيزنەس ءۇشىن ءوزىنىڭ تيىمدىلىگىن كورسەتىپ بەردى. ەندى ءبىز بۇل كەزەڭنەن كوتەرىلىپ, ينتەگراتسيالىق ۇدەرىستى ەكونوميكالىق ىقپالداستىق اياسىندا جۇرگىزۋگە مۇمكىندىك الىپ وتىرمىز», دەدى ول. سەناتور, سونداي-اق, ەۋرازيالىق ەكونوميكالىق وداق قۇرۋ تۋرالى شارتقا قول قويۋ ەلباسى نۇرسۇلتان نازارباەۆتىڭ مۇقالماس ەرىك-جىگەرىنىڭ ارقاسىندا مۇمكىن بولعانىن اتاپ كورسەتتى. بريفينگ سوڭىندا دەپۋتاتتار جۋرنا­ليس­تەردىڭ قويعان ساۋالدارىنا جاۋاپ بەردى. ءلايلا ەدىلقىزى, «ەگەمەن قازاقستان».