قادىر ورتالىعىنىڭ «ەلەۋلى ەسىمدەر» اتتى ءداستۇرلى جوباسى اياسىندا وتكەن ءىس-شاراعا حالىق كوپ جينالدى. كەش يەسىن ورتالىق ديرەكتورى باۋىرجان حاليوللا قۇتتىقتاپ, باتىس قازاقستان وبلىستىق مادەنيەت باسقارماسىنىڭ جانە قادىر ورتالىعىنىڭ اتىنان العىسحاتتار مەن ەستەلىك سىيلىق تابىس ەتتى.
ساحنا تورىنە مەملەكەتتىك سىيلىقتىڭ لاۋرەاتى, «وتان» جانە «قۇرمەت» وردەندەرىنىڭ يەگەرى, اقىن اقۇشتاپ باقتىگەرەيقىزى شىعىپ, قالامداس ءىنىسى تۋرالى تولعانا ءسوز سويلەدى. قالامگەردى جەرلەستەرى – اقجايىق اۋدانى اكىمىنىڭ ورىنباسارى باقبەرگەن ءابۋوۆ پەن تەرەكتى اۋدانى ىشكى ساياسات ءبولىمىنىڭ باسشىسى راۋان ساتىبالديەۆتەر دە قۇتتىقتادى.
وسى كەشتە باۋىرجان فايزوللا ۇلىنىڭ جاڭا قىرى – سازگەرلىك قابىلەتى دە كوپكە تانىلعان ءسات بولدى. اندەردى قازاقستان رەسپۋبليكاسىنىڭ ەڭبەك سىڭىرگەن ءارتىسى قاناتقالي قوجاقوۆ, حالىقارالىق, رەسپۋبليكالىق كونكۋرستاردىڭ لاۋرەاتى نۇرجان تاسبولاتوۆ پەن دارحان قۇلباباەۆ, «BatysStar» توبى كەرەمەت ورىندادى.
كەش بارىسىندا جازۋشى شىعارماشىلىعى جونىندە اسەرلى اڭگىمە ءوربىدى. اسىرەسە قالامگەردىڭ ەكى جىل بۇرىن باسپادان شىققان «بيلەنبەگەن ۆالس» كىتابى حاقىندا وقىرمان قاۋىم, جاستار بىرنەشە سۇراق قويدى. اۆتور ولاردىڭ بارىنە ىجداعاتپەن جاۋاپ بەرىپ, شىعارماشىلىق شەبەرحاناسى تۋرالى وي ءبولىستى.
باۋىرجان عۇبايدۋلليننىڭ ۇلى الپامىس فايزوللا دا اكە ءىزىن جالعاعان جاس اقىن, اۋدارماشى. كەش بارىسىندا الپامىس استانا قالاسىنان قادىرسارايدىڭ كورەرمەن زالىنا ونلاين قوسىلىپ, اكەگە ارناعان ولەڭىن وقىپ بەردى.
باتىس قازاقستان وبلىسى
