جۋىردا قازاقستان, رەسەي ءجانە بەلارۋس پرەزيدەنتتەرى ەۋرازيالىق ەكونوميكالىق وداق قۇرۋ تۋرالى شارتقا قول قويدى. بۇل ەكونوميكالىق ىقپالداستىق ەلىمىزدەگى ءىرى كاسىپورىنداردىڭ جاڭا تىنىسىن اشادى دەپ ويلايمىن. ونىڭ قاتارىندا «وسكەمەن كوندەنساتور زاۋىتى» اق تا بولۋى ءتيىس.
تاريحقا ءسال شەگىنىس جاساساق, كەڭەس وداعى تۇسىندا ەلەكتر جەلىلەرىندەگى شىعىنداردى قالپىنا كەلتىرۋگە ارنالعان العاشقى كوندەنساتورلار 1932 جىلى پايدا بولدى. 1950-جىلداردىڭ باسىندا ەنەرگەتيكا سالاسىنىڭ قارىشتى دامۋىنا بايلانىستى كوندەنساتوردى تۇتىنۋ ايتارلىقتاي ءوستى. الايدا, كوپتەگەن قالالاردىڭ ءوندىرىسى قاجەتتى كوندەنساتور مولشەرىمەن قامتاماسىز ەتۋگە قاۋقارسىز بولاتىن. وسىعان وراي قۋاتتى كوندەنساتورلار سەرياسىن شىعارۋعا ارنالعان مامانداندىرىلعان زاۋىت قۇرىلىسىن سالۋ جونىندە ۇكىمەتتىك شەشىم قابىلدانعانى بەلگىلى.
العاشىندا توم قالاسىنا سالىنباق بولعان كوندەنساتور زاۋىتىنىڭ قۇرىلىسى كەيىن وسكەمەنگە اۋىسادى. سەبەبى, 1952-1953 جىلدارى توم شاھارىندا مۇنداي ءىرى جوبانى جۇزەگە اسىرارلىق الەۋەت جوق بولاتىن. ال وسكەمەندە بۇل كەزدە سۋ ەلەكتر ستانساسىنىڭ قۇرىلىسى اياقتالعان ەدى. وسىلايشا, ەرتىستىڭ وڭ جاعالاۋىنان 6 جىل بويى سالىنعان قۇرىلىس 1959 جىلى العاشقى ءونىمىن بەردى. تۇڭعىش رەت كوندەنساتور ءونىمىنىڭ 62 دانا تاجىريبەلىك-سىناقتىق لەگى شىعارىلدى. ال سول جىلدىڭ شىلدە ايىندا تۇڭعىش ءونىم رەتىندە 1 مىڭ دانا كوندەنساتور سەرياسى دايىندالدى. سول ۋاقىتتان بەرى كەندى التاي وڭىرىندەگى تۇڭعىش ءارى بىرەگەي ەلەكتروتەحنيكالىق ونەركاسىپ كوندەنساتوردىڭ ءتۇرلى ونىمدەرىن ءوندىرىپ كەلەدى.
1992 جىلى مەملەكەتتىك كاسىپورىن اشىق اكتسيونەرلىك قوعام بولسا, 2004 جىلدان باستاپ اكتسيونەرلىك قوعام رەتىندە جۇمىس ىستەۋدە.
كاسىپورىننىڭ ەڭ ۇلكەن نارىعى رەسەي فەدەراتسياسى بولىپ تابىلادى. بۇل رەتتە زاۋىت كورشى ەلدىڭ بىرقاتار اككرەديتاتسيالىق كۋالىكتەرى مەن سەرتيفيكاتتارىنا يە.
«وسكەمەن كوندەنساتور زاۋىتى» اق ساپالى باسقارۋ جۇيەسى 2004 جىلى نيدەرلاندىنىڭ كەما سەرتيفيكاتىنا يە بولىپ, حالىقارالىق تالاپتارعا ساي كەلەتىنى انىقتالدى. كوندەنساتور ءوندىرىسىنىڭ تەحنولوگياسىن جەتىلدىرۋ ماقساتىندا 2004 جىلدان باستاپ كاسىپورىنداعى ەلەكترلى تەرميكالىق كوندەنساتور ءوندىرىسى دامىتىلدى. وندىرىستىك ۇدەرىستەردى اۆتوماتتاندىرۋ ماقساتىندا جاپونيالىق «امادا» جوعارى تەحنولوگيالى كەشەنى ساتىپ الىندى. 2005 جىلى قۋاتى 3000 كۆار-عا دەيىن جەتەتىن جاڭا ەلەكترلى تەرميكالىق قۋاتتى كوندەنساتور سەرياسى دايىندالدى. ودان بەرى دە ءتۇرلى قۋاتقا يە ونىمدەر ازىرلەپ كەلە جاتقان وسكەمەن كوندەنساتور زاۋىتىنىڭ جوعارى تەحنولوگياسى مەن ساپاسى ەڭبەك ونىمدىلىگىن ارتتىرۋعا مۇمكىندىك بەرەدى.
2013 جىلى ماسكەۋدە وتكەن رەسەيدىڭ ەلەكتر جەلىلەرى جونىندەگى كورمەگە قاتىسىپ, وسكەمەندە زاپوروجە زاۋىتىنداعى ارىپتەستەرىمىزبەن بىرگە تەحنيكالىق سەمينار ءوتكىزگەن بولاتىنبىز. بيىل ناۋرىز ايىندا قازان قالاسىنداعى «ەنەرگيا. رەسۋرستى ۇنەمدەۋ» اتتى 15 حالىقارالىق مامانداندىرىلعان كورمەگە, ءساۋىر ايىندا گەرمانيانىڭ گاننوۆەر قالاسىندا وتكەن Hannover Messe الەمدىك ءىرى وندىرىستىك كورمەسىنە قاتىستىق. حالىقارالىق كورمەلەر مەن جارمەڭكەلەرگە قاتىسۋ ينتەگراتسيالىق بايلانىستارعا جول اشادى.
ەۋرازيالىق ەكونوميكالىق ينتەگراتسيانىڭ پايداسى جوعارى بولادى دەپ ۇمىتتەنەمىز. ءبىز ءوز ءونىمىمىزدى رەسەيگە ۇنەمى تاسىمالداپ كەلەمىز. سەبەبى, كەڭەس وداعى كەزىندە كوندەنساتور جانە كوندەنساتور قۇرىلعىلارىن وندىرۋمەن اينالىساتىن جالعىز كاسىپورىن بولدىق. سوندىقتان الىس جانە جاقىن شەتەلدەرگە ءوز ونىمدەرىمىزدى تاسىمالدادىق. ءبىزدىڭ ءونىمىمىز 25 الىس شەتەلگە جىبەرىلەتىن. كەڭەس وداعى ىدىراعان سوڭ زاۋىت ونىمدەرىن تمد ەلدەرى اۋماعىنا شىعارۋ جولعا قويىلدى.
ءوندىرىس ءونىمىنىڭ جالپى كولەمى وتكەن جىلى 1 ميلليارد 820 ميلليون تەڭگەنى قۇرادى. بۇگىنگى تاڭدا زاۋىتتا 390 ادام جۇمىسپەن قامتىلىپ وتىر. ولاردىڭ ورتاشا ەڭبەكاقىسى اعىمداعى جىلدىڭ ءساۋىر ايىندا 85 991 تەڭگەگە تەڭ بولدى. ءونىمدى رەسەي, ۋكراينا, بەلورۋسسيا, وزبەكستان جانە قىرعىزستان ەلدەرىنە تاسىمالدايمىز.
بيىل كوندەنساتور ونىمدەرىنە سۇرانىس وتكەن جىلمەن سالىستىرعاندا, تومەندەدى. وعان الەمدىك نارىقتاعى ءتۇرلى جاعدايلار اسەر ەتتى. سوندىقتان, رەسەي ءبىز ءۇشىن ۇلكەن نارىق بولىپ وتىر. وسىعان دەيىن دە ءونىمىمىزدىڭ 70 پايىزدايى رەسەيگە تاسىمالداناتىن. ودان كەيىنگى ورىنداردا بەلارۋس, ۋكراينا تۇر. ال ەلىمىز زاۋىت ءونىمىنىڭ 30 پايىزعا جۋىعىن عانا تۇتىنادى. بۇل وتاندىق كاسىپورىن ءۇشىن ەكونوميكالىق ينتەگراتسيانىڭ پايدالى ەكەنىن كورسەتەدى.
ۆلاديمير اكسەنەۆ,
«وسكەمەن كوندەنساتور
زاۋىتى» اق باس ديرەكتورى.
شىعىس قازاقستان وبلىسى.
