تىنىشتىعىمىزدى بۇزىپ، اماندىعىمىزعا قاۋىپ توندىرگەن كوروناۆيرۋس ينفەكتسياسىنىڭ دۇربەلەڭى باسىلعانىمەن، ءالى كۇنگە دەيىن ارامىزدان ىرگەسىن اجىراتا قويعان جوق. بىلايعى جۇرتقا بايقالا قويماس، بىراق كۇن سايىن بۇل بالەكەت ىندەتكە شالدىققان جۇزدەن اسا ادام انىقتالىپ جاتىر، اراسىندا ءبىرلى-جارىم قايتىس بولعاندار دا بار.
سۋرەتتى تۇسىرگەن ەرلان ومار، «ەQ»
بۇگىنگى تاڭدا ەلىمىزدە ىندەت جۇقتىرۋ كورسەتكىشىنىڭ ارتۋى بايقالادى. كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ دەرەگى بويىنشا، قاراشا ايىندا الدىڭعى ايمەن سالىستىرعاندا ىندەت جۇقتىرۋ 1،6 ەسە وسكەن. ەلىمىزدىڭ 3 وڭىرىندە – الماتى، استانا جانە قاراعاندى وبلىسىندا اۋرۋشاڭدىق اپتا سايىن 2،2 ەسەگە دەيىن ءوسىپ جاتىر ەكەن. سونداي-اق 5 وڭىردە (اقمولا، اتىراۋ، جامبىل، ۇلىتاۋ وبلىستارى، شىمكەنت قالاسى) كەيىنگى اپتادان باستاپ سىرقاتتانۋشىلىق اپتاسىنا 3،5 ەسەگە دەيىن بىرتىندەپ ءوسىپ كەلەدى.
كوروناۆيرۋسقا قارسى تۇرار ءتۇرلى امال تاۋىپ، كۇرەسىپ باققانىمىزبەن، جاعدايعا بەيىمدەلگىش «جانى ءسىرى» ىندەت مۋتاتسياعا ۇشىراپ، اينالىپ كەلىپ جاۋداي ءتيۋىن تىيار ەمەس. قايتپايتىن ۆيرۋستىڭ وسى كۇنگە دەيىن بىرنەشە شتامى پايدا بولىپ، قانشاما جۇرتتى قان قاقساتتى. ەندى «تسەربەر» دەيتىن تاعى ءبىر ءتۇرى شىعىپ، ەلىمىزدەن مۇنى جۇقتىرعان ادام دا انىقتالدى. الايدا ماماندار «وميكرون» شتامىنىڭ مۋتاتسيالانعان تۇرىنە جاتاتىن بۇل «تسەربەردىڭ» اسا قاۋىپتى ەمەس ەكەنىن ايتىپ وتىر.
دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتىنىڭ مالىمەتى بويىنشا، قازاقستاندا «وميكرون» شتامىنىڭ «تسەربەر» سۋبگەنەتيكالىق جەلىسى تولىق گەنومدىق سەكۆەنيرلەۋ ناتيجەسىندە تابىلدى. اتالعان كوميتەتتىڭ وكىلى جاسۇلان الپىسباەۆ جاڭا شتامم جەڭىل وتەتىنىن، بۇنى ەمدەۋ كوروناۆيرۋس ينفەكتسياسىنىڭ باسقا شتامدارىنان ەرەكشەلەنبەيتىنىن ايتتى.
«SARS-CoV-2 ۆيرۋسىنىڭ گەنەتيكالىق سيپاتتاماسىن تولىق گەنومدىق سەكۆەنيرلەۋ ادىسىمەن قاراشا ايىندا «وميكرون» نۇسقاسىنىڭ اينالىمى انىقتالدى. ونىڭ 0،5%-دا BQ.1.1 سۋبگەنەتيكالىق جەلىسى («تسەربەر») تابىلدى، ال 99،5%-دا – «وميكرون» شتامىنىڭ باسقا نۇسقالارى. «تسەربەر» شتامىنىڭ بەلگىلەرى «وميكروننىڭ» بۇرىنعى كىشى تۇرلەرىنەن ايتارلىقتاي ەرەكشەلەنبەيدى. اۋرۋ كوبىنەسە ءجىتى رەسپيراتورلىق اۋرۋدىڭ جەڭىل تۇرىندە وتەدى. قىزۋدىڭ كوتەرىلۋى، بۋىن اۋرۋى، ازداپ مۇرىننان سۋ اعۋ، السىزدىك بولۋى مۇمكىن، كەيبىرەۋلەرىندە ىشەك اۋرۋلارى بولادى»، دەيدى ج.الپىسباەۆ.
ونىڭ سوزىنە قاراعاندا، شتامم تەز جۇعادى، الايدا اسا قاۋىپتى ەمەس. ناۋقاستاردى دياگنوستيكالاۋ جانە ەمدەۋ باسقا COVID-19 شتامدارىنان ەرەكشەلەنبەيدى. ينفەكتسيادان قورعانۋدىڭ ءتاسىلى – COVID-19-عا قارسى ۆاكتسينالاۋ مەن رەۆاكتسينالاۋ.
قازىرگى ۋاقىتتا مۋتاتسيالانعان «تسەربەر» 65-تەن اسا ەلدە، سونىڭ ىشىندە رەسەيدە، اقش-تا، ەۋروپا ەلدەرىندە انىقتالدى.
جالپى، ەلىمىزدە 6 جەلتوقسانداعى دەرەككە سۇيەنسەك، كوروناۆيرۋس ينفەكتسياسىنان بارلىعى 1 374 ادام ەمدەلىپ جاتىر. بۇل قاتاردا كوروناۆيرۋس پنەۆمونياسىنا شالدىققان 191 ناۋقاس ستاتسيوناردا، ال 1 183 ناۋقاس امبۋلاتوريالىق دەڭگەيدە ەم قابىلداپ جاتىر. ىندەت جۇقتىرعانداردىڭ ىشىندە 5 ادامنىڭ جاعدايى اۋىر، 3 پاتسيەنتتىڭ جاعدايى وتە اۋىر، 4 ناۋقاس وكپەنى جاساندى جەلدەتۋ اپپاراتىنا قوسىلعان.
وتكەن تاۋلىكتە كوروناۆيرۋس جۇقتىرعان 140 ادام انىقتالدى. ال كوروناۆيرۋس پنەۆمونياسىنا شالدىققاندار تىركەلگەن جوق. بىراق بۇرناعى كۇنى ءبىر ادامنىڭ پنەۆمونيادان قايتىس بولعانى بەلگىلى بولدى.
ميلليوننان اسا حالقى بار استاناداعى احۋالعا توقتالساق، كوروناۆيرۋس جۇقتىرعان 99 ادام ينفەكتسيالىق ستاتسيوناردا ەمدەلىپ جاتىر. ونىڭ ىشىندە 19 ادام پنەۆمونياعا شالدىققان. ال جانساقتاۋ بولىمشەسىندە 8 پاتسيەنت جاتىر، ونىڭ تورتەۋى ءوجج اپپاراتىنا قوسىلعان.
جالپى، ەلوردادا بۇگىنگە دەيىن 265 921 كۆي جۇقتىرۋ جاعدايى تىركەلسە، ونىڭ 99%-ى اۋرۋىنان ايىققان. كۇن سايىن جەدەل مەديتسينالىق جاردەم ستانساسىنا كۆي بويىنشا ورتا ەسەپپەن 8 ادام جۇگىنىپ جاتىر ەكەن. ال ءبىر تاۋلىكتە 400-دەن اسا ادامعا پتر زەرتتەۋى جۇرگىزىلىپ، 64 ادامنىڭ ىندەت جۇقتىرعانى انىقتالعان. ونىڭ ىشىندە 6 ادام ىندەتتى قايتا جۇقتىرىپتى.
جوعارىدا ايتىلعانداي، بۇل ىندەتكە قارسى تۇرۋدىڭ بىردەن-ءبىر جولى – ۆاكتسينا سالدىرۋ. قالاي دەگەنمەن، كوروناۆيرۋسقا قارسى ۆاكتسينانىڭ تولىق كومپونەنتىن قابىلداعانداردىڭ يممۋنيتەتى جاڭا شتامدارعا توتەپ بەرە الاتىنداي الەۋەتتى بولاتىنىن ماماندار قاپەرگە سالىپ وتىر. بۇل رەتتە ەلىمىزدە بۇگىنگە دەيىن كوروناۆيرۋسقا قارسى ۆاكتسينالاردىڭ ءبىرىنشى كومپونەنتىن 10 849 289 ادام، ال ەكىنشى كومپونەنتن 10 613 754 ادام سالدىرعانىن ايتا كەتكەن ءجون.
حالىقتى كوروناۆيرۋس ينفەكتسياسىنا قارسى ۆاكتسينلاۋمەن قامتاماسىز ەتۋ ماقساتىندا وڭىرلەرگە 12 جاستان اسقانداردى ۆاكتسينالاۋ جانە رەۆاكتسينالاۋ ءۇشىن Pfizer ۆاكتسيناسىنىڭ 200 مىڭ دوزاسى جەتكىزىلدى. ۇجىمدىق يممۋنيتەتتى ساقتاۋ ءۇشىن سوڭعى ۆاكتسينالاۋدان كەيىن 6 اي ارالىقپەن كوروناۆيرۋس ينفەكتسياسىنا قارسى رەۆاكتسينالاۋ الۋ قاجەت. بۇل ءۇشىن رەسپۋبليكادا كوروناۆيرۋس ينفەكتسياسىنا قارسى ۆاكتسينالار مولشەرى جەتكىلىكتى.
قازاقستان ونەرپازدارى «تەاتر بارىسىن» انىقتايدى
سپورت • بۇگىن، 12:08
نۇرباح رۇستەموۆ قىزمەتىنەن بوساتىلدى
قوعام • بۇگىن، 11:51
كيم چەن ىن تاق مۇراگەرىن تاڭدادى
الەم • بۇگىن، 11:47
قازاقستاننىڭ رۋمىنيا جانە سلوۆەنياداعى ەلشىلەرى تاعايىندالدى
تاعايىنداۋ • بۇگىن، 11:45
ەلورداداعى بەيسەكوۆا كوشەسى ەرتەڭنەن باستاپ جابىلادى
قوعام • بۇگىن، 11:33
يۋتا شتاتى جاسوسپىرىمدەردىڭ الەۋمەتتىك جەلىگە كىرۋىنە شەكتەۋ قويدى
الەم • بۇگىن، 11:22
ۇقساس جاڭالىقتار
