ءباسى جوعارى باسەكەدە استانا قالاسى اكىمدىگىنىڭ №2 بالالار مەن جاسوسپىرىمدەر سپورت مەكتەبىنىڭ سپورتشىلارىمەن قاتار قوستاناي, پەتروپاۆل, حرومتاۋ جانە الماتى قالاسىنىڭ ۇزدىك كونكيشىلەرى جارىستىڭ كورىگىن قىزدىردى. اشىق بىرىنشىلىككە قاتىسۋعا 130 سپورتشى نيەت بىلدىرگەن سوڭ, قالا اكىمدىگى بالالار مەن جاسوسپىرىمدەر قاتىساتىن دودانى داستۇرگە اينالدىرۋدى كوزدەپ وتىر. جارىستىڭ شارتى بويىنشا بالالار 5 جاس ساناتى بويىنشا سىنعا ءتۇستى. ايتۋلى ءتۋرنيردىڭ ءبىرىنشى كۇنىنەن-اق جاسوسپىرىمدەر كوماندالىق سىندا باعىن سىناپ, بابىن بايقاتتى. ءتورت اينالىمدىق ارالاس كوماندالىق سپرينتتە ءار كوماندادان 2 قىز جانە 2 ۇل ونەر كورسەتتى. ناتيجەسىندە, پەتروپاۆل قالاسىنىڭ ورەندەرى – الينا شۇمەكوۆا, كريستينا شۇمەكوۆا, ارتەم ساۆەلەۆ, ۆلاديمير دوۆجەنكو باستاعان تورتتىك قارسىلاستارىن شاڭ قاپتىردى. ال ەكىنشى ورىندى استانا-2 كومانداسى ەنشىلەسە, ءۇشىنشى ورىن ەلوردانىڭ ءۇشىنشى (استانا-3) كومانداسىنا بۇيىردى.
ءساتى تۇسكەندە پەتروپاۆل قالاسىنداعى بالالار مەن جاسوسپىرىمدەر سپورت مەكتبىنىڭ جاتتىقتىرۋشىسى ولگا يحتەندرەستەن كونكيمەن جۇگىرۋ سپورتى تۋرالى جانە جارىسقا كەلگەن بالالاردىڭ اياقالىسى جايىندا سۇراعان ەدىك.
– ءبىز «الاۋ» مۇز ايدىنىنا ءجيى كەلۋگە تىرىسامىز. پەتروپاۆلدا مۇنداي ساپالى مۇز ايدىنى جوق. وسى كەشەندە جاس كونكيشىلەردىڭ بەلگىلى ءبىر جىلدامدىققا جۇگىرۋگە, ارنايى جاتتىعۋىن جاساپ, جارىسقا دايىندالۋىنا تولىق مۇمكىندىگى بار. سول ءۇشىن دە ەل بىرىنشىلىگىنەن بولەك بايراقتى باسەكەلەر دە وسى ەلوردادا ۇيىمداستىرىلادى. بالالار مەن جاسوسپىرىمدەر اراسىندا وسىنداي تۋرنيرلەر ءجيى ۇيىمداستىرىلسا, ءبىز دە قۋانامىز. كەزەكتى الامانعا پەتروپاۆل قالاسىنان 40 ۇل-قىز الىپ كەلدىك. بالالار جاس ەرەكشەلىكتەرىنە قاراي بەس توپتا سىنعا تۇسەدى. ءبىز جارىسقا وزگە قالالاردان بۇرىن كەلىپ, بىرەر كۇندى جاتتىعۋعا, بالالاردىڭ دايىندىعىنا ارنادىق. پەتروپاۆلدا استانا قالاسىنداعىداي جابىق مۇز ايدىنى جوق. ءارى بىزدەگى جارىس جولاعى شاعىن, ياعني ستاندارتقا ساي ەمەس. امال جوق, اۋا رايىنىڭ قولايسىزدىعىنا قاراماي دايىندالامىز. ويتكەنى دارىندى بالالار تاسادا قالماۋى كەرەك, – دەيدى ول.
تاجىريبەلى جاتتىقتىرۋشى و.يحتەندرەس پەتروپاۆل قالاسىنداعى جاس كونكي شەبەرلەرىنىڭ قاتارىنداعى الينا جانە كريستينا شۇمەكوۆالار سىندى ەگىز قىزداردىڭ ءوز جاسىنا ابدەن لايىق ونەر كورسەتىپ جۇرگەنىن ايتادى. جاتتىقتىرۋشىلار بۇعان دەيىن دە تالاي جارىستا توپ جارىپ جۇرگەن ۇزدىكتەرگە وسى تۋرنيردە دە زور سەنىم ارتىپ وتىر. مىسالى, جارىستىڭ العاشقى كۇنىندەگى كوماندالىق سىندا الينا مەن كريستينا كوماندالاستارىن العا سۇيرەدى. پەتروپاۆلدىڭ ۇزدىكتەرى اۋىلدان شىققان. قازىر پەتروپاۆلداعى سپورت ينتەرناتىندا جاتتىعادى. جاتتىقتىرۋشىلار 14 جاستاعى ۆارۆارا گلۋحوۆا ەسىمدى سپورتشىنىڭ دا ۇزدىكتەر قاتارىنان كورىنەتىنىنە ىشتەي سەنىم ارتىپ وتىر. ازىرگە پەتروپاۆل قالاسىنىڭ اتىنان مۇز ايدىنىنا شىعاتىن كىشى توپتاعى ۇلداردىڭ جۇلدەگە ىلىگۋى ەكىتالاي ەكەن. ويتكەنى جاسى كىشى ۇلدار مۇز ايدىنىنا ءجيى شىقپايدى. دەسەك تە سپورت مەكتەبىنىڭ جاتتىقتىرۋشىلارى 2024 جىلى وتەتىن جاسوسپورىمدەر وليمپياداسىنا جوعارىدا ەسىمدەرى اتالعان ۇزدىكتەردى قوسۋعا نيەتتى. ول ءۇشىن, ارينە, جاسوسپىرىمدەر ەل چەمپيوناتىندا قاتارلاستارىنان ءتاۋىر ناتيجە كورسەتۋگە ءتيىس.
– جاقسى ناتيجەگە قول جەتكىزۋ ءۇشىن بالالاردىڭ دايىندىعىنا جوعارى ءمان بەرۋ كەرەك. سوندىقتان ولاردىڭ دۇرىس تاماقتانۋىنا, سالماعىن قالىپتى دەڭگەيدە ۇستاپ, فيزيكالىق الەۋەتىن نىعايتۋعا ەرەكشە ءمان بەرەمىز. كونكي تەبۋ ءۇشىن دە كۇش كەرەك. كونكيشىلەردىڭ جاۋىرىنى, اياق-قولىنىڭ كۇشى مىعىم بولۋى دا ماڭىزدى. ويتكەنى كونكيمەن جۇگىرۋدە ادامنىڭ بۇلشىق ەتى كومەكتەسەدى. ايتكەنمەن بالالاردىڭ دەنە ءبىتىمى قالىپتاسقانشا جەڭىل جاتتىعۋلار جاساتامىز. كونكيمەن سىرعاناۋدى ايتپاعاندا, مۇزدا تىك تۇرۋدىڭ وزىنە جىلعا جۋىق ۋاقىت كەتەدى. ارينە, بالالار اراسىنداعى باسەكەلەردە استانالىقتاردىڭ الدىنا تۇسەتىن كوماندا جوق دەپ ايتۋعا بولادى. بىراق ءبىز دە قاراجاياۋ ەمەسپىز. كەمىندە ءار جارىستان ءبىرلى-ەكىلى سپورتشىمىز جۇلدەلى ورالادى. مۇنى ءتاۋىر ناتيجە دەپ بىلەمىز. بالالاردىڭ بارلىق شىعىنىن سپورت مەكتەبى وتەيدى. جاس كونكيشىلەرگە جاعداي جاساپ وتىرعان وڭىردەگى سپورت باسقارماسىنا العىسىمىز زور. نەگە دەسەڭىزدەر, بىزدەگى بالالاردىڭ بارلىعى قاراپايىم وتباسىدان شىققان. ءتىپتى بالالاردىڭ اراسىندا الەۋمەتتىك جاعدايى تومەن وتباسىندا تاربيەلەنەتىن بالعىندار بار. بىراق سپورت تاريحىندا بابى كەلىسىپ, باعى جانعان سپورتشىلاردىڭ دەنى وسىنداي قاراپايىم وتباسىندا تاربيەلەنگەنىن قاپەردەن شىعارماۋىمىز كەرەك, – دەيدى و.يحتەندرەس.
دەمەك, ەلورداداعى تۋرنيردە جاسىنداي جارقىراعان جاسوسپىرىمدەردىڭ كەلەشەكتە كونكيمەن جۇگىرۋدەن ۇلتتىق قۇرامانىڭ ساپىندا الەمدىك دودالاردا ونەر كورسەتۋگە مۇمكىندىگى مول. ەندەشە, تۋرنيردە توپ جارعان دارىندى بالالاردىڭ سپورتتىق مانسابى تابىستى بولعاي دەمەكپىز.
