قۇجات قابىلداۋ 12 جەلتوقسانعا دەيىن جوعارى وقۋ ورىندارىنىڭ قابىلداۋ كوميسسيالارى, ونىڭ ىشىندە ۆيرتۋالدى قابىلداۋ كوميسسيالارى ارقىلى جۇزەگە اسىرىلادى. بارلىعى 8 مىڭنان استام ادام ماگيستراتۋراعا ءتۇسۋ ءۇشىن ەمتيحان تاپسىردى. ولاردىڭ 40%-عا جۋىعى شەكتى بالل جينادى. ورتاشا كورسەتكىش – 69 بالل. ەڭ جوعارى بالل – 127.
كەشەندى تەستىلەۋ وتكىزۋ بارىسىندا 80 قاتىسۋشىنىڭ ناتيجەسى جويىلدى. ونىڭ ىشىندە 32 وقۋعا ءتۇسۋشى سمارتفون, شپارگالكا جانە باسقا دا تىيىم سالىنعان زاتتاردى الىپ وتۋگە تىرىسقانى ءۇشىن تەست تاپسىرۋ مۇمكىندىگىنەن ايىرىلدى. كەشەندى تەستىلەۋ كەزىندە ەرەجەلەردى بۇزعانى ءۇشىن اۋديتوريادان 48 ادام شىعارىلىپ, ولاردىڭ ناتيجەلەرى جويىلدى.
ماگيستراتۋرادا وقۋعا ارنالعان ءبىلىم بەرۋ گرانتتارى كەشەندى تەستىلەۋ ناتيجەلەرى بويىنشا كونكۋرستىق نەگىزدە بەرىلەدى.
گرانت كونكۋرسىنا قۇجاتتاردى قابىلداۋ 6-12 جەلتوقسان ارالىعىندا جوو-لاردىڭ قابىلداۋ كوميسسيالارى, ونىڭ ىشىندە ونلاين ۆيرتۋالدى كوميسسيالار ارقىلى جۇزەگە اسىرىلادى. ياعني, بولاشاق ماگيسترانتتار قۇجاتتاردى ءداستۇرلى جانە ونلاين فورماتتا تاپسىرا الادى.
كونكۋرسقا قاتىسۋ ءۇشىن كەلەسى قۇجاتتاردى تاپسىرۋ قاجەت: جەكە كۋالىكتىڭ كوشىرمەسى, جوعارى ءبىلىمى تۋرالى قۇجات (ديپلوم جانە قوسىمشاسى); كت سەرتيفيكاتى جانە بار بولعان جاعدايدا شەت ءتىلىن مەڭگەرگەندىگىن راستايتىن حالىقارالىق سەرتيفيكاتتار. 075/ۋ نىسانىنداعى مەديتسينالىق انىقتامانى جوعارى وقۋ ورنىنا تۇسكەندە تاپسىرۋعا بولادى.
«قۇجاتتاردى تاپسىرۋ كەزىندە وقۋعا ءتۇسۋشى ءبىلىم بەرۋ باعدارلامالارىنىڭ ءبىر توبىن جانە ءۇش جوعارى وقۋ ورنىن كورسەتەدى. ماگيستراتۋراعا ءبىلىم بەرۋ گرانتىن تاعايىنداۋ كونكۋرسى 15-25 جەلتوقسان ارالىعىندا وتەدى. ماگيستراتۋراعا تۇسۋشىلەر 4 مىڭعا جۋىق مەملەكەتتىك ءبىلىم گرانتىنا ۇمىتكەر بولا الادى», دەپ حابارلادى قر عجبم ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.
ماگيستراتۋراعا ءبىلىم بەرۋ گرانتى يەگەرلەرىنىڭ ءتىزىمى قر عجبم ۇلتتىق تەستىلەۋ ورتالىعىنىڭ سايتىندا جانە الەۋمەتتىك جەلىلەرىندە جاريالانادى.
