قوعام • 02 جەلتوقسان، 2022

شەكارانى بۇكىل ەل قورعايدى

ءحانتاڭىرىنىڭ ەتەگى، رايىمبەك باتىردىڭ مەكەنىندە قوڭىر تىرشىلىك كەشىپ جاتقان حالىقتىڭ شەكاراشىلارعا دەگەن كوڭىلدەرى الابوتەن. وسى وڭىردەن قۇرىلعان ەرىكتى جاساقشىلار توبى بار. بۇل ءوز الدىنا، سۇمبە اۋىلىنىڭ ۇلكەنى مەن كىشىسىنە دەيىن قىراعى. مال قايىرىپ ءجۇرىپ، شەكاراعا جاقىن ماڭنان بوتەن ادامدى بايقاپ قالسا، دەرەۋ شەكاراشىلارعا حابارلايدى. مۇنى شەكارانى شەكاراشىلار عانا ەمەس، بۇكىل ەل قورعايدى دەپ بىلگەندىكتەن جاسايدى.

Egemen Qazaqstan

سۇمبە اۋىلىنىڭ اباي اتىنداعى ورتا مەكتەبىندە قىراعى تۇرعىنداردى ۇلىقتاۋعا ارنالعان سالتاناتتى ءراسىم ءوتتى. ءىس-شاراعا رايىمبەك اۋداندىق ءماسليحاتىنىڭ دەپۋتاتى ە.جۇماحانوۆ، سۇمبە اۋىلدىق وكرۋگىنىڭ اكىمى ە.بەستىباەۆ باستاعان اۋىل تۇرعىندارى مەن مەكتەپ وقۋشىلارى، سونداي-اق شەكارا قىزمەتىنىڭ ارداگەرى وتستاۆكىدەگى پولكوۆنيك قازاقباي ەرتىشپاەۆ قاتىستى. ەل شەبىندە ءىزى سايراپ جاتقان ساڭلاق سارداردىڭ شەكارا تۇبىندەگى اۋىلعا الىستان ات ارىلتىپ جەتۋىنىڭ وزىندىك سەبەبى بار. قازاقباي اعا سوناۋ 70-ءشى جىلدارى ءوزىنىڭ ەل شەبىندەگى العاشقى قىزمەتىن وسى اۋىلدىڭ شەتىندەگى شەكارا زاستاۆاسىندا باستاعان.

«وتان شەكارادان – دەمەك ءدال وسى اۋىلدان، سىزدەردەن باستالادى»، دەدى پودپولكوۆنيك ق.ءادىلوۆ. ول مەملەكەتتىك شەكارانى قورعاۋ ىسىنە بەلسەنە اتسالىسىپ جۇرگەن ازاماتتارعا العىسىن ايتىپ، جىل باسىنان بەرى ۇستالعانداردىڭ ىشىنەن 20-دان استام شەكارا بۇزۋشىنىڭ جەرگىلىكتى تۇرعىنداردىڭ ارقاسىندا قولعا تۇسكەنىنە توقتالىپ ءوتتى.

بۇدان كەيىن ءسوز تىزگىنىن العان ۇقك شەكارا قىزمەتىنىڭ «قۇرمەتتى ارداگەر» توسبەلگىسىنىڭ يەگەرى وتستاۆكىدەگى پولكوۆنيك ق.ەرتىشپاەۆ «شەكارانى بۇكىل حالىق قورعايدى» ۇرانىنىڭ اسىرەسە شەكارا ايماعى ءۇشىن ماڭىزى زور ەكەنىن ايتا كەلىپ، ەل شەبىندەگى ءوز باسىنان وتكىزگەن قىزىقتى وقيعالارىمەن ءبولىستى.

ء«بىز دە جاس، ءبىز دە ءوز ەلىنىڭ پاتريوتى بولدىق. بويىمىزداعى وسى رۋح بىزگە كۇش بەرىپ، كۇنى-ءتۇنى شەكارادان شىققان جوقپىز. حالىقپەن تىعىز ارالاسىپ، شەكارانى بىرگە قورعادىق. وسىندا وتىرعان ەرىكتى جاساقشىلار ول كەزدە وزدەرىڭدەي مەكتەپ بالالارى بولاتىن. شەكاراشىلارعا قاراپ بوي تۇزەگەن بالالار دا از بولعان جوق. مەكتەپ بىتىرگەن سول بالالاردىڭ ىشىنەن شەكاراشىلاردىڭ وقۋىنا ءتۇسىپ، وفيتسەر اتانعاندار دا بولدى. سەندەردەن دە سونداي پاتريوتتىق رۋحتى، وتاندارىڭا دەگەن سۇيىسپەنشىلىكتى كۇتەمىن»، دەدى ق.ەرتىشپاەۆ.

ءىس-شارا بارىسىندا جەرگىلىكتى تۇرعىنداردىڭ ىشىنەن شەكارانى كۇزەتۋ ىسىنە بەلسەنە اتسالىسقان اۋىل ازاماتتارى ۇقك شەكارا قىزمەتى الماتى وبلىسى بويىنشا دەپارتامەنتى رايىمبەك اۋدانى بويىنشا شەكارا باسقارماسى باستىعىنىڭ ماقتاۋ گراموتاسىمەن ماراپاتتالدى. سونداي-اق شەكارا قىزمەتكەرلەرىنە «شەكارا قىزمەتىنە – 30 جىل» مەرەكەلىك مەدالى دە تابىستالدى.

تامارا داۋلەتباەۆا،

ۇقك شەكارا قىزمەتىنىڭ زاپاستاعى پودپولكوۆنيگى.