اۋماعى ات شاپتىرىم تەاتر فويەسىن كىشكەنتاي كورەرمەندەردىڭ سىڭعىرلاعان كۇمىس كۇلكىسى تولتىرىپ, توڭىرەكتى شاتتىققا بولەپ تۇردى. الدىمەن, تۇڭعىش قۋىرشاق تەاترىنىڭ اشىلۋ ءراسىمى وتكىزىلدى. اقجارما تىلەكتەر ايتىلىپ, شاشۋ شاشىلدى. كورەرمەندەر زالىنا وتكەن كىشكەنتاي بۇلدىرشىندەردىڭ نازارىنا نينا گەرنەتتىڭ «بالاپان قاز» ەرتەگىسى ۇسىنىلدى. بۇرىن-سوڭدى مۇندايدى كورمەگەن بۇلدىرشىندەر تاڭعاجايىپ تاماشا ەرتەگىنى كورىپ وتىرىپ, كەيىپكەرلەردىڭ توسىننان قويعان سۇراقتارىنا تاپقىر جاۋاپ بەرە ءبىلدى. وسىنىڭ ءوزى ساحنا مەن كورەرمەندەر زالىن تۇتاستىرىپ, ەرتەگى الەمىنە ەلىكتىرىپ اكەتىپ بارا جاتقانداي. ءار كورەرمەن سيقىرلى دۇنيەگە ەنگەن.
جاس ترۋپپا ءدۋالدى وقۋ جۇيەسى بويىنشا ارنايى كەلگەن قازاق ۇلتتىق ونەر ۋنيۆەرسيتەتىنىڭ ستۋدەنتتەرىنەن قۇرالعان. توپ جەتەكشىسى ءارى «بالاپان قاز» ەرتەگىسىنىڭ قويۋشى رەجيسسەرى قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى سەرىكباي ماقۇلبەكوۆ. كىشكەنتايلار كوڭىلىنەن شىققان بالاپان قاز – اقەركە دامۋ, كىرپى – ارسەن بالتاباي, نۇرلىبەك تىلەۋلەس, تۇلكى – دياس ءشارىپ.
– ەرتەگىمەن ەسەيگەن جاقسى. قويىلىم جاس كورەرمەندەرىمىزدىڭ كوكىرەگىنە وي سالارى ءسوزسىز. سوندا رۋحاني كەمەلدەنۋدىڭ العاشقى باسپالداعىن باساتىن بولادى, – دەيدى قويۋشى رەجيسسەر سەرىكباي ماقۇلبەكوۆ.
ىزەتتى ۇل-قىزدى ىزگىلىك الەمىنە جەتەلەيتىن قۋىرشاق تەاترىنىڭ العاشقى كورەرمەندەرىنە بۇل سىي تەگىن جاسالدى. بۇلدىرشىندەر بۇدان بىلاي دا ادەمى الەمنىڭ اجارىمەن قاۋىشىپ, كوكىرەكتەرىن رۋحاني ساۋلە نۇرىمەن جارىق ەتپەك.
كوكشەتاۋ قالاسى
