جاقىندا زەرتتەۋ ورتالىعىنىڭ بازاسىندا عىلىم جانە جوعارى ءبىلىم ءمينيسترى ساياسات نۇربەك پەن قازۇۋ-ءدىڭ باسقارما توراعاسى – رەكتورى جانسەيىت تۇيمەباەۆتىڭ قاتىسۋىمەن وسىمدىك شيكىزاتى نەگىزىندە يننوۆاتسيالىق ءونىم ازىرلەيتىن شاعىن ءوندىرىس اشىلعان بولاتىن.
مۇندا سۇرانىستاعى ونىمدەردىڭ ءبىرى – تۇماۋ جانە COVID-19 اۋرۋلارىنا قارسى بيولوگيالىق بەلسەندى قوسپا. 2020 جىلى دايىندالعان تابيعي تۇنبانىڭ قۇرامىنا وكپەنى قۋاتتايتىن, قاقىرىق تۇسىرەتىن, قاندى سۇيىلتاتىن, قانداعى مايلاردى جوعالتىپ, قان اينالىمىن جاقسارتاتىن, كۇش-قۋات بەرىپ, ۇيقىنى رەتتەيتىن قاسيەتى بار وسىمدىكتەر قوسىلعان.
ورتالىق ديرەكتورى جانار جەڭىس اتالعان قوسپانىڭ كوۆيدكە بەلسەندىلىگىن تەرەڭ زەرتتەۋ ماقساتىندا جۋىردا ميسسيسيپي ۋنيۆەرسيتەتىنە ارنايى باردى. وسى ساپار ناتيجەسىندە ەندى قازۇۋ بازاسىندا دايىندالعان بيولوگيالىق ءونىم اقش ۋنيۆەرسيتەتىنىڭ زاماناۋي زەرتحانالارىندا جان-جاقتى سارالانىپ, وزگە سىرقاتتارعا ەمدىك اسەرى انىقتالاتىن بولدى.
«ماقساتىمىز – دايىندالعان قوسپا قۇرامىنداعى نەگىزگى بيولوگيالىق بەلسەندى قوسىلىستاردى ءبولىپ الۋ, قۇرىلىمدارىن جەتىلدىرۋ جانە فارموكولوگيالىق بەلسەندىلىگىن زەرتتەۋ. قازىرگى تاڭدا تۇماۋ جانە COVID-19 اۋرۋلارىنا قارسى قوسپانىڭ كوۆيدكە بەلسەندىلىگىن تەرەڭ زەرتتەۋ جۇمىستارىن ميسسيسيپي ۋنيۆەرسيتەتىنىڭ عالىمدارىمەن بىرگە شاكىرتىم, ءبىزدىڭ عىلىمي قىزمەتكەرىمىز جاننا اقجىگىتوۆا بىرلەسىپ اتقارۋدا», دەيدى جوبا اۆتورى, پروفەسسور جانار جەڭىس.
ورتالىق عالىمدارى ەمدىك وسىمدىكتەردىڭ قاسيەتتەرىن زەرتتەۋ جۇمىستارىمەن 20 جىلدان بەرى اينالىسىپ كەلەدى. بۇعان دەيىن تۇماۋ مەن باۋىر اۋرۋلارىنان ساقتايتىن جانە يممۋنيتەتتى كوتەرەتىن قوسپالار جانە قانداعى قانت دەڭگەيىن تومەندەتەتىن, قان قىسىمىن رەتتەيتىن, اسقازان-ىشەك جۇيەسىنىڭ جۇمىسىن جاقسارتاتىن جانە يممۋنيتەتتى كوتەرەتىن فيتو-شايلار ءوندىرىلدى.
