قوعام • 29 قاراشا، 2022

ارماندار ورىندالادى

82 رەت كورسەتىلدى

قوعام ەمى كۇردەلى نەمەسە ايىقپاس دەرتكە شالدىققان بالالاردىڭ كوڭىلىن اۋلاپ، ومىرگە قۇشتارلىعىن وياتۋمەن شەكتەلمەي، قولدان كەلگەنشە جاردەمدەسۋگە اركەز دا­يىن. مۇنىڭ دالەلى، «ارماندار ورىندالادى» جوباسى اياسىندا دەمەۋشىلەر 3 پەن 14 جاس ارالىعىنداعى 110 بالانىڭ ارمان-مۇراتىن ورىندادى. «قازاقستان مەديتسينا جاستارى» قوعامدىق بىرلەستىگى قولعا العان الەۋمەتتىك جوبا اقپارات جانە قوعامدىق دامۋ مينيسترلىگىنىڭ قولداۋىمەن ازاماتتىق باستامالاردى قولداۋ ورتالىعىنان بولىنگەن گرانت ارقىلى ۇيلەسىمدى ىسكە اسىرىلدى.

جوبا جەتەكشىلەرى اۋىر دەرتكە شالدىققان بالالاردىڭ ومىرگە قۇشتارلىعىن ارتتىراتىن جوباعا مەتسەنات، مەديا سالاسىنىڭ مايتالماندارى، كاسىپكەرلەر مەن ەرىكتىلەردى تارتتى. «قازاقستان مەديتسينا جاستارى» قوعامدىق بىرلەستىگىنىڭ ەرىكتىلەرى ەلدىڭ بارلىق وڭىرىندە بالالاردىڭ بوس ۋاقىتىن قىزىقتى وتكىزۋ ءۇشىن 51 ءىس-شارا ۇيىمداستىردى. وعان 600-گە جۋىق بالا قاتىستى. جوباعا ەلدىڭ ءار ايماعىنان 500-دەن استام ەرىكتى جۇمىلدىرىلىپ، 100 سەرىكتەس قولداۋ كورسەتتى. بۇل جوبا العاش رەت «مەنىڭ ارمانىم» قايىرىمدىلىق قورىنىڭ باستاماسىمەن الماتىدا باستالعان بولاتىن. سودان بەرى بەل­سەندى جاستار مەتسەنات پەن قوعام بەلسەندىلەرىنىڭ باسىن قوسىپ، جىل ىشىندە 100-گە جۋىق بالانىڭ ارمانىن ورىندادى. اتالعان ىزگى جوبانى رەسپۋبليكا كولەمىندە ۇيىمداستىرۋ ءۇشىن مەملەكەتتەن قولداۋ قاجەت-اق. سوندىقتان بەلسەندى جاستار جوبانى كەڭەيتە ءتۇسۋ ماقساتىندا اقپارات جانە قوعامدىق دامۋ مينيسترلىگىنە ۇسىندى. سايكەسىنشە، ازاماتتىق باستامالاردى قولداۋ ورتالىعى جوبانى ىسكە اسىرۋعا گرانت ءبولدى.

«قازاقستان مەديتسينا جاستارى» رقب توراعاسى ابىلايحان ءابدىراش الەۋمەتتىك جوبانىڭ ماقسات-مىندەتى مەن ناتيجەسى تۋرالى باياندادى.

– بيىل جوبا ساتىمەن ىسكە استى دەپ ايتۋعا تولىق نەگىز بار. جوبا جاناشىرلارى كەلەر جىلى دا يگىلىگى مول ىسكە قولداۋ كورسەتسە قۇبا-قۇپ. ارماندا شەكتەۋ جوق. دەسەك تە كەيدە ءبىر ەمەس، بىرنەشە بالانىڭ ارمانى ۇشتاسىپ جاتادى. مۇنداي ساتتەردە سول جاسوسپىرىمدەردىڭ باسىن قوسىپ، اۋقىمدى ءىس-شارا ۇيىمداستىرامىز. وسىلايشا، جەكەلەي ەسەپتەگەندە 100-دەن استام بالانىڭ ارمانىن ورىنداساق، كەيبىر اۋقىمدى ءىس-شارالاردا 500-گە جۋىق بالانى قامتىدىق. جىل باسىندا اقپارات جانە قوعامدىق دامۋ مينيسترلىگىنەن جوباعا 25 ملن تەڭگە ءبولىندى. قاراجاتتىڭ باسىم بولىگى جۇمىستى ۇيلەستىرۋگە جۇمسالسا، مەتسەنات، دەمەۋشىلەر قاراستىرعان 20 ملن تەڭگەدەن استام قارجىعا بالالاردىڭ ارمانىن ورىنداۋعا جاردەمدەستىك. ەلىمىزدە جومارت جاندار كوپ. سولاردىڭ ارقاسىندا 20-دان استام بالانىڭ دەنساۋلىعىندا وڭ ناتيجە بايقالسا، 2 بالا تولىق ساۋىعىپ، ەم الۋدى توقتاتتى، – دەدى بىرلەستىك توراعاسى.

جوبانىڭ نەگىزگى ماقساتى – ەرەكشە قابىلەتى بار جانە ايىقپاس دەرتكە شالدىققان بالالارعا جاردەمدەسۋ. بۇل ماسەلەگە قوعامنىڭ نازارىن بۇرۋ دا وزەكتى. سەبەبى سىرقاتى اسقىنعان بالالارعا تەك مەديتسينالىق كومەك قاجەت دەپ شورت كەسىپ، بايلام جاساۋعا بولمايدى. مىسالى، ۇلىبريتانيانىڭ كەمبريدج ۋنيۆەرسيتەتىنىڭ عالىمدارى 2016 جىلى زەرتتەۋ ناتيجەسىندە «بالا­لارعا مورالدىق قولداۋ كور­سە­تۋدىڭ پايداسى مەديتسينالىق كومەك­تەن كەم ەمەس» دەگەن توقتامعا كەلدى. دە­مەك يگى جوبا بالالاردىڭ ومىرگە قۇشتارلىعىن ارتتىرىپ، دامۋىنا جاردەمدەسەدى. ءاسىلى، اۋىر دەرتكە شال­دىققانداردىڭ ءومىرى اۋرۋحانا مەن ءۇي ماڭايىندا وتەتىنىن كورەمىز. ال «ارماندار ورىندالادى» جوباسى ارقىلى بالالار كۇندەلىكتى ەم-شارادان تىس ويىن-ساۋىق ورتالىعىنا بارىپ، ءبىر ءسات سەرگىپ قايتادى. قوعام بەلسەندىلەرى مەن ەرىكتىلەر اۋرۋحانا، حوسپيس جانە ينتەرناتتاعى پاتسيەنتتەرگە كىتاپ وقۋ بولمەسىن جاساقتاپ، سۋرەت سالۋ، مۇسىندەۋ ساعاتى سياقتى شىعارماشىلىق باعىتتا كوڭىل سەرگىتەتىن ءىس-شارالار وتكىزدى.

«ارماندار ورىندالادى» جوبا­سىنىڭ جەتەكشىسى شاميل ۆانكەەۆ سىرقاتى اسقىنعان بالالارعا كومەك­تەسۋدەن قول ۇزبەيتىنىن جەتكىزدى.

– پرەزيدەنت قاسىم-جومارت توقاەۆ بيىل «بالالار جىلىن» جاريالاعان سوڭ، ەلىمىزدە قوعامدىق بىرلەستىك مۇشەلەرى بالالاردى ىنتالاندىرۋ ماقساتىندا ءتۇرلى ءىس-شارالاردى قولعا الدى. سونىڭ ىشىندە «ارماندار ورىندالادى» جوباسىنىڭ ورنى ەرەكشە. جوبانىڭ وزەكتىلىگى، ماقساتىمىز اۋەلدەن دامۋىندا ەرەكشەلىگى بار، سىرقاتى اسقىنعان بالالاردىڭ ارمانىن ورىنداۋ بولعان ەدى. وسىلايشا، جاسوسپىرىمدەرگە مورالدىق تۇرعىدا كومەك كورسەتۋگە قوعامنىڭ نازارىن اۋدارۋدى كوزدەدىك. جوبانى قولعا العالى كوپتەگەن ۇيىممەن، قوعامدىق بىرلەستىكپەن، بيزنەس وكىلدەرىمەن تىعىز جۇمىس ىستەدىك. وسى ارقىلى جوبا بالالارعا عانا ەمەس، بىزگە دە كەرەك ەكەنىنە كوز جەتتى. بۇگىندە ەلىمىزدە اۋىر حالدە جاتقان 10 مىڭعا جۋىق بالا بار. ياعني ءومىر سۇرۋگە قۇشتار بالالارعا قوعام بولىپ قولداۋ كورسەتكەنىمىز دۇرىس دەپ ويلايمىن، – دەدى جوبا جەتەكشىسى.

جىل باسىندا جوبا جەتەكشىلەرى «ارماندار ورىندالادى» جوباسى تۋرالى يگى ىسكە ەل نازارىن اۋداردى. ىزىنشە ەلىمىزدىڭ ءار ايماعىندا «تىلەكتەر اعاشى» اكتسياسىن وتكىزىپ، ساۋدا-ويىن-ساۋىق ورتالىقتارىنا 17 اعاش قويدى. ءار اعاشقا 30-عا جۋىق بالانىڭ ارمان-تىلەگىن جازىپ ءىلدى. مۇنداي اعاشتار ءىرى ويىن-ساۋىق ورتالىقتارىندا ءالى دە تۇر. مىنە، وسى «ارمان اعاشىنداعى» بالالاردىڭ تىلەگىن ورىنداۋعا دەمەۋشىلەردەن 20 ملن تەڭگە قارجى ءبولىندى. سول قاراجات ەسەبىنەن بالالار ەلگە تانىمال انشى­لەرمەن جۇزدەستى. ولاردىڭ ىشىندە ءباا، ناقتىراق ايتساق، دۋبايعا ساپار شەككەن بالالار دا بار. ەرىكتى جاستار پوليتسيا قىزمەتكەرى، ءورت ءسوندىرۋشى، ءتىپتى قيال-عاجايىپ ەرتەكتەگى «حانشا­يىم» بولۋدى تىلەگەن بالعىنداردىڭ دا ارمانىن ورىنداعان. سوندىقتان داۋن سيندرومىنا، بالالاردىڭ تسەرەبرالدى سال اۋرۋىنا، اۋتيزمگە شالدىققان ەرەكشە بالالاردى قۋانتۋدى كوزدەگەن جوبا جەتەكشىلەرى يگى باستامانى كەلەر جىلى دا جالعاستىرۋعا نيەتتى.

سوڭعى جاڭالىقتار

جاڭا باعىت

ساياسات • كەشە

ءورت: قاۋىپ پەن ساقتىق

توتەنشە جاعداي • كەشە

تۇلعا تۋرالى تۋىندى

ادەبيەت • كەشە

جولبارىس جىمى

ادەبيەت • كەشە

ەل سەنىمىن جالعاعان جوبا

ەكولوگيا • كەشە

جەلاياقتار استانادا جينالادى

جەڭىل اتلەتيكا • كەشە

جانىبەكتى جەكپە-جەككە شاقىردى

كاسىپقوي بوكس • كەشە

ۇقساس جاڭالىقتار